الماتىنىڭ العاباس ىقشام اۋدانىنداعى قيسايعان ءۇيدى سالعان كومپانيا باسشىلىعى تۇرعىنداردى باسقا پاتەرگە كوشىرۋ مۇمكىندىگىنىڭ جوقتىعىن ايتادى، - دەپ حابارلايدى Qamshy.kz.

 «استانا-قۇرىلىس» كومپانياسىنىڭ پرەزيدەنتى بەكبولات امانتۋرين كومپانيانىڭ تۇرعىنداردى كوشىرۋ تۋرالى شەشىم قابىلداماعانىن ايتىپ وتىر. ال، بۇعان دەيىن الماتى قالاسى اكىمىنىڭ ورىنباسارى سۇلتانبەك ماكەجانوۆ اپاتتى جاعدايداعى ءۇيدىڭ سۇرىلەتىنىن، ال، تۇرعىنداردى ءۇيدى سالعان مەردىگەر كومپانيا باسقا باسپانامەن قامتاماسىز ەتۋ تۋرالى شەشىم شىعارىلعانىن حابارلاعان ەدى.

«ازىرگە ونداي شەشىم جوق. تاعى قايتالاپ ايتامىن، كوميسسيا شەشىمىنسىز ءبىز ونداي جاۋاپكەرشىلىكتى موينىمىزعا الا المايمىز»، - دەيدى «استانا-قۇرىلىس» كومپانياسىنىڭ پرەزيدەنتى بەكبولات امانتۋرين.

ءۇي قۇرىلىسىنا كەتكەن شىعىن سوماسىن ايتۋدان باس تارتقان كومپانيا باسشىسى ارنايى كوميسسيا كىنالى دەپ تاپسا، بار اۋىرتپالىقتى كوتەرەتىنىن ايتادى.

«ءقازىر كوميسسيا قورىتىندىسىن كۇتىپ وتىرمىز. ەگەر ءبىزدىڭ كومپانيانىڭ كىناسى انىقتالسا، ءبىز ونى جوققا شىعارمايمىز، شارا قولدانامىز. تەك كوميسسيا شەشىمى شىققاننان سوڭ»، - دەيدى ول.