بۇگىن الماتىعا ىسساپارمەن كەلگەن «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد پارتيالاستارىنا جەر رەفورماسىن ءتۇسىندىرۋ جۇمىستارىن جانداندىرۋدى تاپسىردى، - دەپ حابارلايدى Qamshy.kz قازاقپاراتقا سىلتەمە جاساپ.

وسى ساپار بارىسىندا ول پارتيانىڭ الماتى قالالىق فيليالىندا بولىپ، پارتيا قىزمەتكەرلەرىنىڭ مەملەكەتتىك باعدارلامالاردى جۇزەگە اسىرۋ، سايلاۋالدى ناۋقانى جانە باسقا دا ماسەلەلەر بويىنشا اتقارعان جۇمىستارىنا باعا بەردى.

«سايلاۋ الدى ناۋقانىنىڭ قورىتىندىسىن جۇزەگە اسىرۋ ماقساتىندا بيىل ءبىز تۇڭعىش رەت پارتيا تالىمگەرلەرى ينستيتۋتىن ەنگىزەمىز. ول 8 تالىمگەردەن قۇرالادى»، - دەدى م. قۇل-مۇحاممەد.

سونىمەن قاتار، ول جەر كودەكسىنىڭ ەرەكشەلىكتەرىن تۇرعىندارعا تۇسىندىرۋدە جىبەرىلگەن كەمشىلىكتەرگە توقتالدى.

«ەلباسى موراتوريي جاريالادى، وسىلايشا بىزگە جەر رەفورماسىنا قاتىستى بارلىق پۋنكتتەردى تۇسىندىرۋگە مۇمكىندىك بەردى.   

ال ولاردى جان-جاقتى ءتۇسىندىرۋ قاجەت ەدى. ويتكەنى، الماتى -  جاستاردىڭ قالاسى. ءبىراق، وكىنىشكە قاراي، بۇل جۇمىس الماتىداعى پارتيا ۇيىمدارىندا ناشار اتقارىلدى. ەگەر ءتۇسىندىرۋ جۇمىستارى ستۋدەنتتەرمەن دەر كەزىندە جۇرگىزىلگەندە ءبىزدىڭ 400 مىڭ جاقتاسىمىز بولار ەدى. ويتكەنى، الماتىدا وسىنشا ستۋدەنت بار. ال وسى كەزدە جان-جاققا تاراپ جاتقان ولار، وزدەرىنىڭ تۋعان جەرلەرىندە ءتۇسىندىرۋ جۇمىستارىن جۇرگىزەر ەدى.  

ەندى سپيكەر-ساراپشىلاردىڭ قىزمەتىن جانداندىرۋ قاجەت. مەن بىلەمىن، سىزدەردە ارنايى كلۋب اشىلعان. ولار ءاقپاراتتىق-تۇسىندىرۋ جۇمىستارىن جۇرگىزەدى. حالىقتى كەڭىنەن قامتۋ ءۇشىن ەندى قوعامدىق كەڭەستى دە وسى جۇمىسقا تارتۋ كەرەك بولادى»، - دەدى پارتيا ءتوراعاسىنىڭ ءبىرىنشى ورىنباسارى.

سونداي-اق، ول بۇل جۇمىسقا تانىمال بلوگەرلەردى، جاستاردىڭ ۇكىمەتتىك ەمەس ۇيىمدارىن تارتۋعا شاقىردى.

«تۇرعىنداردى تۇرعىن ءۇي ماسەلەسى، كوممۋنالدىق شارۋاشىلىق قىزمەتتەرىنىڭ جۇمىسى مازالايدى. بۇل ماسەلەلەر شەشىلۋى ءتيىس. الماتى قالاسى بويىنشا تۇرعىن ۇي-كوممۋنالدىق جەلىلەردى جاڭارتۋعا 9،2 ملرد. تەڭگە بولىنگەن. ازىرگە بۇل سومانىڭ 20 پايىزى عانا يگەرىلىپتى. ءبىزدىڭ مىندەت: قارجىنىڭ جۇمسالاۋىن جانە جوبالاردىڭ جۇزەگە اسىرىلۋىن قاداعالاۋ»، - دەدى ول. 

سونداي-اق، كەزدەسۋ بارىسىندا الماتىدا «نۇروتاندىقتاردىڭ» سانىن 100 مىڭ ادامعا جەتكىزۋ كەرەكتىگى بويىنشا ءتيىستى تاپسىرمالار بەرىلدى.

ايتا كەتەلىك، وسى كەزدەسۋدەن كەيىن م. قۇل-مۇحاممەد «اقساي» نان-توقاش كومبيناتى ج ش س جانە قازاق ۇلتتىق اگرارلىق ۋنيۆەرسيتەتىندە بولىپ، اتالمىش مەكەمەلەردىڭ قىزمەتىمەن تانىستى.