الماتىدا تەرگەۋ اباقتىسىنىڭ قىزمەتكەرلەرى ءقازىر جازاسىن وتەپ جاتقان ايەلدى زورلادى دەپ ايىپتالۋدا! 32 جاستاعى ناتاليا سلەكيشينا 155/18 مەكەمەسىندە جاتقاندا 4 ازاماتتىڭ جىنىستىق قاتىناسقا ماجبۇرلەگەنىن ايتادى، - دەپ حابارلايدى Qamshy.kz كتك ارناسىنا سىلتەمە جاساپ.

ول ءتىپتى سول كەزدە جۇكتى بولىپ قالعان. ءبىراق جاقىندا عانا تۋىلعان بالانىڭ اكەسى كىم ەكەنى بەلگىسىز. ال قىلمىستىق اتقارۋ جۇيەسىنىڭ قىزمەتكەرلەرى تاعىلعان ايىپتى مويىنداماي وتىر.

32 جاستاعى ناتاليا سلەكيششينا تەرگەۋ قاپاسىندا تالاي قورلىق كورگەنىن ايتادى. وتكەن جىلدىڭ تامىزىندا سونداعى 4 قىزمەتكەر ونى زورلاپ كەتكەن كورىنەدى. سودان كەيىن ول جۇكتى بولىپ، جۋىردا عانا قىز بالانى دۇنيەگە اكەلگەن. ءبىراق ءنازيرا دەگەن ات قويىلعان نارەستەنىڭ اكەسى تورتەۋدىڭ قايسىسى ەكەنى بەلگىسىز.

ناتاليا سلەكيشينا، جابىرلەنۋشى:

– ولار تورتەۋ بولدى. سوندىقتان بالانىڭ اكەسى كىم ەكەنىن بىلمەيمىز. ءقازىر دنك-نىڭ ناتيجەسىن كۇتىپ وتىرمىز. جەدەل ۋاكىل، رەجيم باستىعى، كۇزەتشى جانە ستارشينا قوسىلىپ زورلادى.

بالانىڭ اكەسىن انىقتايتىن ساراپتاما ناتاليانىڭ ءوزى شاعىم تۇسىرگەننەن كەيىن تاعايىندالعان. تەك 10 اي بويى ناتيجەنى كۇتىپ شارشاپتى. تۇرمە قىزمەتكەرلەرىنە قاتىستى قىلمىستىق ءىس تە قوزعالعان ەكەن. ءبىراق، ءجابىر كورگەن ايەل ءىستىڭ دە شالا جۇرگىزىلىپ جاتقانىن ايتىپ وتىر.

ناتاليا سلەكيشينا، جابىرلەنۋشى:

– مىنە، 10 اي ءوتتى. ەشقانداي قوزعالىس بايقالمايدى. شاعىم جازباعان جەرىم جوق. تەك قىلمىستىق ءىستىڭ قوزعالعانى تۋرالى جازىلعان قاعاز الامىن. ءقازىر باس پروكۋراتۋراعا جازىپ جاتىرمىن.

ناتاليانىڭ ءوزى الاياقتىق ءۇشىن سوتتالعان. ءقازىر الماتى وبلىسىنداعى جاۋعاشتى تۇرمەسىندە. ونىڭ وسىندا تۋىلعان ءنازيرادان بولەك 2 بالاسى بار ەكەن. ولار جاڭا باۋىرلارى بارىنان بەيحابار. ايەل زورلىقشىلار جازاعا تارتىلسا دەپ وتىر. الايدا تەرگەۋ اباقتىسىنىڭ باسشىلىعى دا، اتالعان ءتورت قىزمەتكەر دە تاعىلعان ايىپتى مويىنداعان جوق.

سەرگەي كۋريلوۆ، لا-155/18 مەكەمەسى باستىعىنىڭ تاربيە جۇمىسى جونىندەگى ورىنباسارى:

-ايەلدىڭ ءوزى تەرگەۋگە، سوت وتىرىستارىنا بارىپ-كەلىپ ءجۇردى. ونىڭ سول جاقتاردا جۇكتى بولىپ قالۋى دا مۇمكىن. ءبارىن تەرگەۋ كورسەتەدى. دەگەنمەن، قىزمەتكەرلەرىمىزدىڭ مۇنداي ارەكەتكە بارمايتىنىنا سەنىمدىمىن.

كانى تاعىلىپ وتىرعان 4 ازامات تا وسى مەكەمەدە ۇزاق ۋاقىتتان بەرى قىزمەت ەتىپ كەلەدى. ءبارىنىڭ جاسى 35-تەن اسقان. بالا-شاعالارى دا بار.

ءقازىر ايىپتالعان 4 قىزمەتكەر دە جۇمىس ورنىنا ەمىن-ەركىن كەلىپ ءجۇر. ال، تۇرمەدە وتىرعان ايەلدى زورلاعاندارى دالەلدەنسە، قىزمەتتەن قۋىلىپ قانا قويماي، ءتيىستى جازاعا تارتىلاتىن بولادى. ءبىراق، بۇل ناتاليا سلەكيششينانىڭ جازاسىن جەڭىلدەتۋگە كومەكتەسپەك ەمەس. ياعني، ول قانداي جاعدايدا دا ءتيىستى 8 جىل مەرزىمىن وتەپ شىعۋعا مىندەتتى.