جۇلدىزدار ونەرىنەن بولەك، ەلدىڭ اۋزىنا قالاي ىلىگەدى؟ جارىنا «ەكىنشى ايەل» الىپ بەرەمىن دەپ ەلدى شۋلاتقان ءانشى قاراقات ءابىلدينا ءوز سوزىنە قالاي جاۋاپ بەردى؟ ال، مس سايلاۋبەكتى اتىپ كەتكەنى راس پا؟ بۇل سۇراقتارعا 31-ارناداعى «جۇلدىزدار جارقىرايدى» باعدارلاماسى ىزدەيدى.

سوڭعى ۋاقىتتا شوۋ-بيزنەس وكىلدەرى ەلدى شۋلاتىپ، دۇرلىكتىرۋدى سانگە اينالدىرعان سياقتى. سول ارقىلى تانىمالدىعىمىز ارتادى دەپ ويلايتىنداي. جاقىندا ءانشى قاراقات ءابىلدينا جۇبايى ءقىدىرالى بولمانوۆتىڭ تۋعان كۇنىنە "ەكىنشى ايەل" سىيلايتىنىن ايتقان بولاتىن. الايدا، ءانشىنىڭ بۇل جازباسى جەلىدە ۇلكەن تالقىعا تۇسكەن ەدى. ءتىپتى، ساحناداعى ارىپتەستەرى دە قاراقاتتىڭ بۇل ارەكەتىن تۇسىنبەي قالىپتى.

الايدا، ءانشى ارتىنان ويلانىپ، جۇبايىنا توقال الىپ بەرۋ نيەتىنىڭ بولماعانىن، تەك ريزاشىلىعىن وسىلايشا بىلدىرگىسى كەلگەنىن ايتتى. دەگەنمەن، ونىڭ پيار ءۇشىن جاسالعانىن جاسىرمايدى.  

ال، ءقىدىرالى بولسا، ءوزىنىڭ جاۋابىن ءوزى تۋرالى جازىپ جاتقان كىتابىندا بىلدىرمەك. پروديۋسەر ەكىنشى ايەل ماسەلەسىن سول تۋىندىسىندا اعىنان جارىلىپ ايتپاق.

ءقىدىرالى بولمانوۆ، پروديۋسەر:

- نەدەن شىققان اڭگىمە ەكەنىن كەڭىنەن بىلگىڭىز كەلسە مەنىڭ كىتابىمنان وقىپ الاسىزدار. ءبىر، ەكى اي كولەمىندە ول كىتاپ جارىق كورەدى. وندا كوپ نارسە ايتىلعان.

«اتىڭ شىقپاسا جەر ورتە». بۇل رەپەر مس سايلاۋبەككە قاراتا ايتىلسا كەرەك.  وتكەن اپتادا رەپەرگە بەلگىسىز بىرەۋلەر وق اتىپ، مس سايلاۋبەك اۋىر حالدە اۋرۋحاناعا ءتۇستى دەگەن سۋىت حابار كوپشىلىكتى بەيجاي قالدىرمادى. الايدا، بۇل اقپارات جالعان بولىپ شىقتى.

اڭداماي جاسالعان جارناما مس سايلاۋبەكتىڭ ەكى بىردەي پروديۋسەرىنە وڭاي تيمەي تۇر. سەبەبى، جالعان اقپارات تاراتىپ، كوپشىلىكتى شۋلاتقانى ءۇشىن ولاردىڭ ۇستىنەن قىلمىستىق ءىس قوزعالعان.

سالتانات ازىربەك، ءىىد باسپا ءسوز حاتشىسى:

- ءيا، قىلمىستىق ءىس قوزعالدى. 293 باپ بويىنشا، بۇزاقىلىق.

وسىلايشا، ويىننان وت شىققان بۇل كادرلەر رەپەردىڭ ءتۇسىرىلىپ جاتقان «ومىرگە ورالۋ» اتتى فيلمىنەن ءۇزىندى بولىپ شىقتى.

باقىتجان جۇنىسبەكوۆ، مس سايلاۋبەك پروديۋسەر:

- ومىرىندە ءبىراز تاياق جەدى، 20 ادام جابىلعان،  سونداي پەرەلومنىي مومەنتتەر بولعان. نەگىزى سونى كورسەتكىلەرىڭىز كەلدى مە؟ نەگىزى ول سەنارييدە بار،  بۇكىل ومىرىندەگى وقيعاسى،  بىلتىردان باستاپ ءتۇسىرىلىم جاسادىق.

شوۋ-بيزنەس جۇلدىزدارى ۇنەمى ەلدىڭ نازارىندا جۇرگەندى قالايدى. سوندىقتان دا، ءسال ەلەنبەي قالسا ءتۇرلى جارناما تاسىلدەرىنە جۇگىنەتىندەرى بار.

ال، ديزاينەر جادو جاقىندا وتكەن تۋعان كۇن مەرەكەسىندە اق بوز اتتى يەلەندى. 

جادونىڭ مال شاراۋشىلىعىمەن اينالىساتىنىن ءبىرى بىلسە، ءبىرى بىلمەس. ءانشى سەرىكبول سايلاۋبەك تە تۋعان كۇنىندە قىمبات كولىك مىنگەنى بەلگىلى.

شوۋ-بيزنەستە جۇرگەندەردىڭ قۇلاعىمىزعا سىبىرلاپ ايتقان اڭگىمەلەرىنە قاراعاندا، كەيدە بۇنداي قىمبات ءارى تاڭ قالدىرارلىق سىيلىقتاردى ونەر يەلەرى وزدەرىنە وزدەرى جاسايدى. بۇنداي امالدار دا ات شىعارۋدىڭ ءبىر ءتۇرى دەيدى.

ال، شانشار تەاترىنان تانىمال بولعان اكتريسا جۇلدىزاي دۇيسەنبييەۆا ساحنالىق ارىپتەسى نۇرجان تولەندىگە كوپ جاعدايدا ادىلەتسىز كۇيە جاعىلاتىن دەپ ەسەپتەيدى.

ءانشى، سازگەر مارات وماروۆ اتاق پەن داڭققا يە بولۋ ءۇشىن ءوزىن-وزى جارنامالاپ، شۋ جاسايتىن ارىپتەستەرىن ءبىراز سىناپ تاستادى. 

ءانشى بۇگىندە ون جاسار قىزى ءبيبىماريام وماروۆاعا كونسەرت ۇيىمداستىرىپ، حالىققا تانىستىرىپ ءجۇر. قىزى حالىقارالىق بىرنەشە بايقاۋلاردىڭ جەڭىمپازى اتانعان. حالىقتى الداپ ەمەس، ادال ەڭبەگىمەن تانىلسىن دەيدى. جۇلدىزداردىڭ وسى جانە وزگە دە جاڭالىقتارىن كەلەسى باعدارلامادان تاماشالاي الاسىزدار.