قازاقستاندىق رەجيسسەر ەرمەك تۇرسىنوۆ قازاق ەستراداسىنداعى تانىمال انشىلەر زاتتىبەك كوپبوسىن ۇلى مەن قايرات نۇرتاستىڭ تىڭدارماندارىن مايمىلعا تەڭەدى، - دەپ حابارلايدى Qamshy.kz newtimes.kz-كە سىلتەمە جاساپ.

ءوزىن قازاق تاريحى مەن مادەنيەتىنەن جاقسى حاباردار، ۇلت رۋحانياتىنا زور ۇلەس قوسىپ جۇرگەن ونەر قايراتكەرى سانايتىن ەرمەك تۇرسىنوۆ سوڭعى ۋاقىتتا ساياسي، قوعامدىق ماسەلەلەر تۋرالى دا كەيبىر باسىلىمدار بەتىندە ءجيى قالام تەربەيتىن بولىپ ءجۇر. الايدا، ول ماقالالارىنداعى ويلارى دا «كەلىن» ءفيلمى سياقتى قوعامنىڭ قارسىلىعىنا تاپ بولۋدا. تانىمال رەجيسسەر جاقىنداعى ءبىر سۇحباتىندا ەلىمىزدەگى كينو ءوندىرىسى تۋرالى ايتا كەلىپ:

«انا جاقتا زاتتىبەك، قايرات نۇرتاس ءان ايتىپ تۇرادى، زالدا مايمىلدار تولى، ءوز قۇدايلارىن تاپقان. بولدى. مۇنىڭ ءبارى وتكەن. مۇندايلاردى ديسنەي ءتۇسىرىپ تاستاعان. اقىلدى ادامدار باياعىدا ءتۇسىرىپ تاستاعان تاماشا مۋلتفيلمدەر بولعان. مەن تەلەديداردى سيرەك كورەمىن. شاماسى جاڭا جىل كۇنى-اۋ دەيمىن.  بارلىعى دەمالىپ جاتتى. تەلەديداردى قوسسام قايرات نۇرتاستىڭ بەنەفيسى 3 ساعاتقا سوزىلدى، ارتىنان زاتتىبەك كەتتى. بارلىق ارنالاردا باسقا جىگىتتەردى كورسەتىپ جاتتى. بۇل نەگىزى كاتاستروفا»، - دەپ ءبىر-اق قايىرىپتى. رەجيسسەردىڭ ويىنشا الگى انشىلەردى تىڭداۋشىلاردىڭ تالعامى تومەن كورىنەدى.

قوعامداعى تەرىس قۇبىلىستارعا وزىندىك پىكىرىن ايتىپ، قاجەت جەردە بيلىك پەن قوعامنىڭ كەم-كەتىك تۇستارىن اشىق ايتىپ جۇرەتىن رەجيسسەر سوڭعى ۋاقىتتا اداسايىن دەدى. كوپ جەردە جاناما تۇردە بيلىكتى اقتاپ، قوعامداعى قيىندىقتار مەن ساتسىزدىكتەردىڭ بارلىعىنا حالىقتى كىنالى ەتىپ كورسەتەتىن بولىپ ءجۇر. ەرمەكتىڭ «پرەزيدەنتى قانداي بولسا حالقى سونداي ەمەس، حالقى قانداي بولسا – پرەزيدەنتى دە سونداي» دەگەن سياقتى وي ورامدارى سونىڭ ايعاعى. رەجيسسەردىڭ ويىنشا، ءقازىر حالىق تويىنعان، تويعاندىقتى كوتەرە الماي، كەرتارتپالىققا سالىنىپ جاتقان كورىنەدى. «سەمىزدىكتى قوي عانا كوتەرەدى. ءبىز سوعىستان وتتىك، اشتىقتان وتتىك. ءبىراق، امان قالدىق. ءبىراق، ءبىز سەمىزدىكتى كوتەرە الماۋدامىز. سوندىقتان كوشەلەرىمىزدە داراقىلىق كوپ، ەلدەر كولىگىمەن كو.نەن كەيىن قاراي جۇرەدى، كولىكتەر جاياۋ جۇرگىنشىلەردى باسىپ كەتە بەرەدى، ۇسەنوۆششينا ءورشىپ تۇر» دەگەن ە. تۇرسىنوۆ بار كىنانى حالىقتىڭ وزىنە ارتۋ دەگەن تاماشا پوزيسيا تاۋىپ العان سياقتى. ءبىر قاراعاندا وتكىر سىن ايتىپ جاتقان سياقتى كورىنەدى. الايدا، ول سىن ءتيىستى جەرلەرگە، ءتيىستى تۇلعالارعا ەمەس، قاراپايىم حالىقتىڭ، سول ۇسەنوۆششينا، جەمقورلىق پەن الىمجەتتىكتىڭ قۇربانى بولىپ وتىرعان بۇقارانىڭ وزىنە باعىتتالۋدا. وسىعان قاراپ، بىرنەشە فيلم ءتۇسىرىپ، اتى ءبىراز جەرگە تانىلعان رەجيسسەرىمىزدىڭ ءوزى «سەمىزدىكتى كوتەرە الماي» جۇرگەن جوق پا دەگەن سۇراق تۋادى. قايرات نۇرتاستى تىڭدايتىن - قازاق، زاتتىبەكتىڭ دە سەنەتىنى - قازاق. ال، ولار مايمىل، باندەرلوگالار بولسا، ەرمەك تۇرسىنوۆتىڭ ءوزى كىم؟

دارحان مۇقانتەگى