الماتى مەن ونىڭ اينالاسىنداعى اۋدان تۇرعىندارى زاڭ بويىنشا ءاربىر ازاماتقا بەرىلۋى ءتيىس 10 سوتىق جەر ماسەلەسىن تاعى كوتەرىپ وتىر، - دەپ حابارلايدى Qamshy.kz 31-ارناعا سىلتەمە جاساپ.

زاڭ بويىنشا ءاربىر ازاماتقا بەرىلۋى ءتيىس تەگىن 10 جۇزدىك جەر الۋدان ءۇمىتتى حالىق تاعى جينالدى. بۇل جولى تۇرعىندار الماتىنىڭ الاتاۋ اۋدانىندا باس قوسىپ، جەردىڭ ناقتى قاي جەردەن بەرىلەتىنىن سۇرادى.  ەڭ قىزىعى، اكىمدىكتەگىلەر   جەر الۋعا وتىنىشتەردىڭ بارلىعىن  قابىلداپ،   ءار  ءوتىنىش بەرۋشىگە  10 كۇننىڭ ىشىندە  «جەر جوق» دەگەن جاۋاپتى قايتارامىز دەدى.

الماتىدا كۇن قايناپ تۇر. "جەر بەرىلەدى" دەگەنگە ەلىككەن حالىقتىڭ تەمپەراتۋراسى دا ودان ەش تومەن ەمەس. سوندىقتان، ولاردى سابىرعا شاقىرۋ قيىن.

جۇرت ساساتىن سىڭاي تانىتپادى، كەرەك بولسا پوليسيا مەن وموننىڭ يتەرگەنىنە دە توتەپ بەرۋگە دايىن. كەرىسىنشە كوستيۋم كيىپ كوپ اراسىنان كوزگە تۇسكەن شەندىلەردەن مازا قاشتى. سوندىقتان ولار جينالعان حالىقتى تارقاتۋعا كىرىستى.

نۇرلان سىدىقوۆ، الماتى قالاسى ىشكى ىستەر ساياساتى باسقارماسىنىڭ قىزمەتكەرى:

- سىزدەرگە جاعداي جاساپ، ارنايى مىنە اۆتوبۋستار قويىلىپ وتىر. وسى اۆتوبۋستارعا وتىرىپ ءقازىر جەتىسۋ اۋدانىنداعى ، قۇلاگەر ىقشام اۋدانىنداعى سونعا بارىڭىزدار. وندا ەشقانداي كەزەك جوق. سول جەرگە بارىپ وتىشتەرىڭىزدى قالدىرىڭىزدار.

ايتسە دە الەۋمەت اكىمدىكتەگىلەردىڭ عاجاپ مەيىرباندىعىنا اسا قۇلاق اسپادى. حالىققا قىزمەت كورسەتۋ ورتالىعىن قورشاۋعا الىپ،  ىشكە باسىپ كىرۋگە تالپىندى. ءبىراق بۇل جولى جەر كوميسسياسىنىڭ مۇشەلەرى  جاعدايدى ەگجەي تەگجەيلى تۇسىندىرمەك بولدى.

داۋرەن بابامۇراتوۆ،جەر كوميسسياسىنىڭ مۇشەسى:

- قۇرمەتتى حالايىق، ءقازىر وسى جەردە بوسقا ساندالىپ، ءوز ۋاقىتتارىڭىزدى الىپ جاتىرسىزدار. الماتى قالاسىنىڭ شەڭبەرىندە جەر جوق جانە الماتى قالاسىنان جەر بەرۋگە سىزدەردەن وتىنىشتەر قابىلدانبايدى. قاتەلەسپەسەم الماتى قالاسىنان باسقا كەز كەلگەن جەردە، جەرگە ءوتىنىش قابىلدانادى.

الايدا، بەلسەندى داۋرەن مىرزا قاتتى قاتەلەسكەن ەدى. ەشبىر مەملەكەتتىك ورگاننىڭ ازاماتتار ءوتىنىشىن قابىلداماۋعا قاقىسى جوق.

سارا تاگايەۆا، قالا تۇرعىنى:

- جاڭا ايتىپ جاتىر جەر بەرىلمەيدى دەپ، جەر جوق دەيدى الماتىدا. نەگە وسى ۋاقىتقا دەيىن ايتپاعان؟ حالىق نەگە مۇندا ساندالىپ ءجۇر؟ بۇل اقىماقتىق قوي. نەگە وندا ءوتىنىشتى قابىلداپ جاتىر؟

الماتى قالاسى بويىنشا جەر الۋعا ءقازىردىڭ وزىندە 100 مىڭنان استام ادام ءوتىنىش ءبىلدىرىپتى. ال رەسپۋبليكا بويىنشا ميليوننان اسىپ جىعىلادى بۇل كورسەتكىش. حالىق جەر كودەكسىندەگى 50 باپتىڭ 2 تارماعى بويىنشا ءاربىر ازامات 10 جۇزدىك جەرگە يەلىك ەتە الادى دەگەندى باسشىلىققا العان. ال، بيلىكتەگىلەر ينفراقۇرىلىمى دايىن ەمەس ايماقتان بىردە-بىر جەر بەرىلمەيتىنىن شەگەلەپ ايتىپ وتىر.