ەلىمىزدىڭ ۇلتتىق وليمپيادالىق كوميتەتى قازاقستاندىق سپورتشىلاردان الىنعان دوپينگ سىنامالاردىڭ قايتا تەكسەرىلگەنىن راستادى، - دەپ حابارلايدى Qamshy.kz 24.kz-كە سىلتەمە جاساپ.
سالا ماماندارىنىڭ حابارلاۋىنشا، بەيجىڭ مەن لوندون وليمپيادالارىنا قاتىسقان بىرنەشە سپورتشى رۇقسات ەتىلمەگەن پرەپارات قولداندى دەگەن كۇدىك تۋدىرىپ وتىر. سولاردىڭ ىشىندە قازاقستاندىق وعلاندار دا بار. سوندىقتان حالىقارالىق وليمپيادالىق كوميتەت سىنامالاردى شۆەيساريانىڭ لوزاننا قالاسىنداعى ارنايى زەرتحانادا قايتا تەكسەرىپ جاتىر. ايتا كەتەيىك، بۇگىن ءبىرقاتار قازاقستاندىق جانە شەتەلدىك بۇقارالىق اقپارات قۇرالدارى اۋىر اتلەتيكادان وليمپيادا چەمپيوندارى يليا يلين مەن ءزۇلفيا چينشانلو التىن مەدالدەرىنەن ايىرىلادى دەگەن مالىمەت جاريالادى. بۇعان قوسا ولاردىڭ بيىلعى ريو جارىسىنا قاتىسا المايتىنىن دا جارىسا جازىپ جاتىر. الايدا وسى ماسەلەگە قاتىستى ءالى رەسمي مالىمدەمە جاسالعان جوق. ال ۇلتتىق وليمپيادالىق كوميتەت قايتا تەكسەرۋ ناتيجەسى بەلگىلى بولعاننان سوڭ ءتيىستى تۇسىنىكتەمە بەرەتىن بولدى.
