«ەي، يمان ەتكەندەر! كۇنالاردان ساقتانىپ، تاقۋالىققا جەتۋلەرىڭ ءۇشىن سەندەرگە بۇرىنعىلارعا پارىز ەتىلگەندەي ورازا پارىز ەتىلدى».  

(«باقارا» سۇرەسى، 185 ايات)

اسا مەيىرىمدى، راحىمدى اللانىڭ اتىمەن باستايمىن! بارلىق ماقتاۋلار اللاعا ءتان. پايعامبارىمىز مۇحاممەدكە، ونىڭ وتباسىنا، ساحابالارىنا سانسىز سالاۋاتتار بولسىن!
مىنە، ايلاردىڭ ۇلىعى، ايلاردىڭ سۇلتانى، كۇللى مۇسىلمان بالاسى ءۇشىن قاسيەتتى رامازانتابالدىرىعىمىزعا تاقاپ تۇر. اللا قالاسا قاسيەتتى ايمەن قاۋىشاتىن كۇن دە كەلەر. اللا تاعالا ءتورت كوزىمىز تۇگەل سول قاسيەتتى ايمەن امان قاۋىشۋدى جازعاي!

اللا تاعالا ادام بالاسىن قاسيەتتى قۇراندا «ينسان» دەگەن اتپەن اتاعان. بۇل ءسوزدىڭ قازاقشا ماعىناسى ۇمىتۋشى دەگەندى بىلدىرەدى. ەندەشە، بىزدەر ادامدار ۇمىتۋشىمىز. اقىلىمىز دا شەكتەۋلى. سول سەبەپتى دە، ءبىر-بىرىمىزدىڭ ەسىمىزگە سالىپ وتىرۋ مۇسىلماندىق مىندەتىمىز. سول مۇسىلماندىق مىندەتىمىزدىڭ ءبىر پاراعى بولسىن دەپوسى ورازا حاقىندا قالام تەربەگەن جايىمىز بار. ەندى  اڭگىمەمىزدى ارلەپ، ارمەن قاراي ءسوزىمىزدى ساباقتايىق.

ارداقتى اعايىن،«بەينەتتىڭ دە زەينەتى بار» دەپ اتام قازاق ايت قانداي، اللا جولىندا توگىلگەن تەر، كورگەن بەينەت اقتالادى. ال، دۇنيە ءۇشىن قايرات جۇمساۋ ماڭدايىڭىزدان شىققان ءبىر تامشى تەرگە تاتىمايدى. بۇگىن بار دا ەرتەڭ جوق.دۇنيە — الدامشى نارسە. سول ءۇشىن بابالارىمىز «دۇنيە جالعان» دەپ تاماشا ءتامسىل قالدىرعان. اللانىڭ رازىلىعى ءۇشىن جاساعان جاقسى امالدارىڭىزبەن قۇلشىلىعىڭىزدىڭ قايتارىمى ءسىزدىڭ ەنشىڭىزدەن ەشقايدا كەتپەيدى. ىستەگەن ىزگى  ءىسىڭىز، وزىڭىزدەن باسقا ەشكىم الالمايتىن بانكوماتتاعى جەكە شوتىڭىزعا سالعان اقشاڭىز سياقتى. سىزدەن باسقا ەشكىمنىڭ ەنشىسىنە بۇيىرمايتىن ساۋاپتى امالىڭىز اقىرەتتەگى ازىعىڭىز بولىپ قالا بەرمەك. اللا تاعالا پەندەلەرىنىڭ ىستەگەن ىزگى ىستەرىنىڭ قارىمتاسىن  ون ەسەلەپ قايتاراتىنى جايلى قاسيەتتى قۇراندا بىلاي دەپ ۋادە بەردى. «كىم جاقسى امالمەن كەلسە، وعان سوندايدىڭ ونى /ەسەلەنىپ/ بەرىلەدى...». («ءال-انعام» سۇرەسى، 160-ايات).

ال، جاراتقانعا جاعىمدى، جاقسى ءىستى رامازان ايىندا جاساپ جاتساق ساۋاپتىڭ ءتىپتى سان ەسەلەنەتىنى ءسوزسىز.

سەبەبى، بۇل اي — مەيىرىم ايى. بۇل اي — ىستەگەن ءاربىر جاقسىلىعىمىز ءبىزدى ءجانناتقا جەتەلەيتىن ايلاردىڭ سۇلتانى.

اللا — ۇلى. اللا — شەكسىز قۇدىرەتتى. اللا — شەكسىز مەيىرىمدى. اللانىڭ ادىلدىگىن ايتىپ ءتىلىمىز تىپتەن جەتپەسى انىق. ال، سونشالىقتى ءادىل بولعان ۇلىق اللا ءوزى بەرگەن ۋادەسىن بۇزبايتىنى بارىمىزگە بەلگىلى. ەندەشە، اللانىڭ ۇلى ۋادەسىنىڭ ءبىرى — وسى رامازان ايى. اللا تاعالا قاسيەتتى قۇراندى وسى رامازان ايىندا ءتۇسىردى جانە سول قاسيەتتى قۇران تۇسكەن قادىر ءتۇنىن موينىن يگەن مۇسىلمانعا مىڭ ايدان دا قايىرلى ەتىپ قويدى.

«نەگىزىنەن قۇراندى قادىر تۇنىندە تۇسىردىك. قادىر ءتۇنىنىڭ نە ەكەنىن بىلەسىڭ بە؟ قادىر ءتۇنى مىڭ ايدان دا قايىرلى». («قادىر» سۇرەسى، 1-2-3-اياتتار).

ويلاڭىزشى!!!

 بۇنان باسىم تۇسەر باسقا باقىت بارما؟! 

—   البەتتە، جوق.

ءاربىر پەندە ءۇشىن اللانىڭ ساۋابىن الۋدان اسقان باقىت بولۋى مۇمكىن ەمەس. سونداي سۇبەلى ساۋاپتى ءسۇزىپ الار مول مۇمكىندىكتى قۇشاعىنا قىسقان رامازان ايىن ايلاردىڭ سۇلتانى دەمەي نە دەرسىز!

اللانىڭ اق جولىنان اينىمايتىن، پەيىلى كەڭ پەندەسى ءۇشىن شەكسىز ساۋاپى شەلەكتەپ بەرگەن مەيىرىمدى اللانىڭ مەيىرىمىن ايتىپ جەتكىزۋگە ءسىرادا ءسوزىمىز جەتپەس. 

سول ءبىر ءسوز جەتپەس مەيىرىمدى اللانىڭ مەيىرىمىن مۇسىلماندارعا سىيلاعان رامازان ايىنىڭ قاسيەتى جونىندە يبن ابباس (ر.ا) كەلتiرگەن ءبىر حاديستە پايعامبارىمىز (س.ع.س): «ەگەردە مەنiڭ ۇممەتiم رامازان ايىنىڭ iشiندە قانداي قاسيەتتەر بار ەكەندiگiن بiلسە عوي، وندا، جىلدىڭ بارلىعى رامازان ايى بولسا ەكەن دەپ ءۇمiت ەتكەن بولار ەدi»، — دەيدى.

قاراڭىزشى، رامازان ايىنىڭ قادىرى تۋرالى حاقتىڭ ەلشىسى قالاي ايتتى؟!

اللانىڭ اقيقاتىن عانا ايتاتىن سۇيىكتى پايعامبارىمىز (س.ع.س): «...رامازان ايىنىڭ ىشىندە قانداي قاسيەتتەر بار ەكەنىن بىلسە عوي...»، — دەپ قانداي قاسيەتتەردى ايتىپ وتىرعانى جايلى دايەكتى دالەلدەردى وقي وتىرىپ، وي ەلەگىڭىزدەن وتكىزىپ كورىڭىزشى!

ويىمىز ويپاڭعا ءتۇسىپ كەتپەس ءۇشىن جانە ءبىر حاديسكە جۇگىنەلىك. تاعى ءبىر تاماشا حاديستە اللانىڭ ەلشىسى (س.ع.س) اللا تاعالا: «اۋزى بەرىك ادام ىشىپ-جەۋىن مەن ءۇشىن دوعاردى. ورازا – مەنى مەن قۇلىمنىڭ اراسىنداعى عيبادات. وعان بەرىلەتىن سىيدى مەن عانا ولشەپ، مەن عانا بەرەمىن. اۋزى بەرىك قۇلىمنىڭ اشتىق پەن شولدەن اۋىزىنانشىققان ءيسى مەن ءۇشىن ميسك اتىرىنەن دە تاماشا»، — دەيدى. 

مىنەكي، بۇل حۇدسي حاديستە اللا تاعالا: «...ورازا – مەنى مەن قۇلىمنىڭ اراسىنداعى عيبادات. وعان بەرىلەتىن سىيدى مەن عانا ولشەپ، مەن عانا بەرەمىن...»، —دەيدى. باسقا ەشبىر قۇلشىلىق امالدارىنا مۇنداي ۋادە بەرمەگەن اللا وسى ورازانىڭ ساۋابىن ءوزىم بەرەمىن دەپ تۇرعان جوق پا؟! ءتىپتى، «...اۋزىنان شىققان ءيسى مەن ءۇشىن ميسك اتىرىنەن دە تاماشا»، — دەيدى. مىڭ ايدان دا قايىرلى قادىر ءتۇنىن وسى ورازا ۇستاۋشى قۇلدارى ءۇشىن قيعان ۇلى جاراتۋشىنىڭ جومارتتىعى دا رامازان ايىنىڭ ەنشىسىندە ەكەن. ولاي بولسا وسى رامازان ايىنىڭ ىشىندە قانداي قاسيەتتىڭ بارىن باعامداي بەرىڭىز.

پاي-پاي، شىركىن!

قانداي كەرەمەت!!!

مىنا ءبىر كەرەمەت حاديسكە دە دەن قويىپ قاراڭىزشى! 

يمام توباراني جانە يمام يبن ءناججار ريۋايات ەتكەن بۇل حاديستە بۋبا يبن ءاس-ساميت (ر.ا) ايتادى: «رامازان تاياپ قالعان بولاتىن. راسۋلۋللاھ (س.ع.س) ءبىر كۇنى: «بەرەكە ايى بولعان رامازان جاقىنداپ قالدى. بۇل ايدا حاق تاعالا سەندەرگە نازارىن سالادى. ءارى راحمەتىن ءتۇسىرىپ، كۇنالاردى كەشىرىپ، دۇعالاردى قابىل ەتەدى. اللا تاعالا سەندەردىڭ يگىلىك ىستەۋگە جارىسقاندارىڭدى كورىپ، ونى پەرىشتەلەرىنىڭ الدىندا ماقتانىش ەتەدى. ونداي بولسا، حاق تاعالاعا جاقسى امالدارىڭدى كورسەتىڭدەر! ءتىپتى، وسى ايدىڭ وزىندە اللا تاعالانىڭ راحمەتىنەن ماقۇرىم قالعان پەندە اقيقاتىندا باقىتسىز»،— دەدى».

قاسيەتتى رامازان ايىندا اللا تاعالا پەندەلەرىنە نازارىن سالىپ، راحىمەتىن ءتۇسىرىپ، كۇنالارىن كەشىرىپ، دۇعالاردى قابىل ەتسە، بىزگە ەندى ونان باسقا نە كەرەك؟! اللا تاعالا ءتىپتى، يگىلىك ىستەۋگە جارىسقاندارىڭدى كورىپ، پەرىشتەلەرىنە ماقتان ەتەدى دەپ تۇرعان جوقپا!

وسى جەردە ءسال دە بولسا ويلانايىقشى!

ەگەر، اللا تاعالا پەندەسىن جاقسى كورمەسە، پەندەسىنىڭ ىستەگەن بولماشى ىزگى ءىسىن پەرىشتەلەر الدىندا  ماقتان ەتەرمە ەدى؟! بۇل اللانىڭ پەندەسىنە دەگەن پەيىلىنىڭ، ناعىز مەيىرىمنىڭ كەرەمەت كورىنىسى ەمەسپە؟!

اسا مەيىرىمدى اللانىڭ راحمەتىنەن الىس قالعان ادام، شىندىعىندا شىنايى باقىتسىزدىقتىڭ بۇلتى باسىنا تونگەن بەيباق بولماق. ال، بۇل دۇنيەدەگىقۇدايعا قىلعان قۇلشىلىعىڭىز، قيامەتتە قىل كوپىردەن قينالماي ءوتۋىڭىزدىڭ كەپىلى ەدى. وسى كەپىل بولار كەرەمەت مۇمكىندىكتى مەيىرىمدى اللا رامازان ايىنىڭ ەنشىسىنە جازىپ قويىپتى. باسقا ايلاردا جاساعان قۇلشىلىقتان ساۋابىن سان ەسە ارتىق ەتىپ رامازانداي ۇلى قۇلشىلىق ايىن بەرگەن مەيىرىمدى اللانىڭ مەيىرىمىنە بولەنۋ باقىتى بۇيىرىپ تۇرعان وسى ورايلى ءساتتى وڭتايلى پايدالانىپ قالۋعا بارىمىزدى سالايىق باۋىرلار! البەتتە،  ءونبىر اي بويى قامپايىپ جۇرگەن قارنىڭىز، ورازانىڭ العاشقى ون كۇنىدەسىزدى ءبىراز سىلكىپ الار. الايدا، كۇننىڭ اپتابىندا اشتىققا شىداپ باقساڭىز، مەيىرىمگە تولى ونكۇندىكتە مەيىرىمىڭىزدى مەيلىنشە ارتتىرساڭىز، الدىڭىزدا كۇتىپ تۇرعان ورتاڭعى ون كۇندىكتە كۇناڭىزدىڭ توگىلەرىنە تاماشا تاعان قالاعانىڭىز. ال، كۇنالارىڭىز سارى كۇزدە سارعايعان جاپىراقتى تالدى سىلكىگەندەي توگىلسە، توزاق وتىنان قۇتىلۋعا قام قىلاتىن ورازانىڭ سوڭعى ون كۇندىگىندە ءسىزدىڭ قورجىنىڭىز قامپايارىنا كۇمانىڭىز بولماسىن. ويتكەنى، بۇلار اللانىڭ ۋادەسى. تەك، نيەتىڭىز تۋرا، امالىڭىز تولىق بولعاي!

پايعامبارىمىز (س.ع.س)ءبىر حاديسىندە: «رامازان ايىنىڭ العاشقى ون كۇنى — مەيىرىم، ورتاسى — كۇنادان ارىلۋ، سوڭى — توزاق وتىنان قۇتىلۋ»، — دەگەن.

ولاي بولسا باۋىرلار، سانسىز ساۋاپتان سالىمسىز قالماۋعا قامدانايىق! ساۋاپتىڭ سىيىسۇلۋلىعىنا ءسوز جەتپەس جۇماقتىڭ سارايىبولماق. مەيىرىمدى اللانىڭ مەيىرىنەن ايىرىلىپ، جاراتقان يەم ءوزى ۋادە ەتكەن ءجانناتتىڭ سارايىنان قۇر قالۋ، وكىنىشكە وراي شىنايى باقىتسىزدىق. اللا تاعالام اقىرەتتەگى باقىتسىزدىقتى باسىمىزعا بەرمەسىن!

اقىرەتتىك ازىعىمىزدى اياماي ءۇيىپ بەرگەن بەرەكەلى رامازان ايىنداعى سۇبەلى ساۋاپتى ءسۇزىپ الۋعا ساقاداي سايلانىپ، قامبامىزدى «قازىناعا» تولتىرايىق، قادىرمەندى قالايىق!

اللا تاعالا ەلىمىزگە، جەرىمىزگە اماندىق، تىنىشتىق سىيلاپ، بەرەكەسى بۇزىلماعان وتانىمىزدابەيبىتشىلىكتىڭ بەسىگى تەربەلە بەرگەي!  ءامين!!!

نۇرجان قاجى تالاس ۇلى

الماتى قالاسى، «تاۋگۇل-3» مەشىتىنىڭ باس يمامى