الماتى قالاسى مەدەۋ اۋدانى اكىمىنىڭ ورىنباسارى تالعات ءابدىحالىقوۆ ەكى اي مەرزىمگە قاماۋعا الىندى، - دەپ حابارلايدى  Qamshy.kz informburo.kz – كە سىلتەمە جاساپ.

ت. ءابدىحالىقوۆقا مەملەكەتتىك ساتىپ الۋ بايقاۋىندا توعىز لوت بويىنشا ساتىپ الۋ بايقاۋىنىڭ الماتى قالاسى بويىنشا قارجىلىق باقىلاۋ ينسپەكتورلارى تاراپىنان كۇشى جويىلماۋى ءۇشىن پارا الدى دەپ ايىپتالىپ وتىر. شەنەۋنىكتىڭ اقشانى 2016 جىلدىڭ ساۋىرىنەن ماۋسىمىنا دەيىن بىرنەشە بولىككە ءبولىپ العانى ايتىلۋدا.

«كۇدىكتى 12 جىلعا دەيىن باس بوستاندىعىنان ايىرۋ جازاسى كوزدەلگەن اۋىر قىلمىس جاساعان. مەدەۋ اۋداندىق №2 سوتىنىڭ قاۋلىسىمەن ونى ەكى اي مەرزىمگە قاماۋعا الۋ بۇلتارتپاۋ شاراسىن بەلگىلەۋ تۋرالى ءوتىنىش قاناعاتتاندىرىلدى»، - دەيدى الماتى قالالىق سوتى اقپاراتتىق قامتاماسىز ەتۋ ءبولىمىنىڭ جەتەكشىسى دياس ماحامبەتوۆ.