بۇرىنعى توتەنشە جاعدايلار ءمينيسترى، ءقازىر ءماجىلىس دەپۋتاتىنىڭ كرەسلوسىنا جايعاسقان ۆلاديمير بوجكو ۋكراينا ساياساتكەرى يرينا فاريوندى سالداقىعا تەڭەدى، - دەپ حابارلايدى Qamshy.kz informburo.kz-كە سىلتەمە جاساپ.

دەپۋتات بۇل مالىمدەمەسىن قاراعاندىدا ەتنو-مادەني ورتالىقتار وكىلدەرىمەن كەزدەسۋدە ايتقان.

دەپۋتات ەلدىڭ وڭتۇستىك وڭىرلەرىندە ورىس ءتىلىنىڭ قولدانىس اياسى تارىلىپ، ول تىلدە وقىتۋدىڭ ازايعانىنا الاڭداۋلى كورىنەدى. ول بۇل جاعدايدى كەڭەستىك كەزەڭدەگى قازاق ءتىلىنىڭ تاعدىرىمەن ۇقساتاتىنىن اڭعارتقان.

«بىرەۋلەر بىلەر، بىرەۋلەر بىلمەس، 1991 جىلى ەلدە قازاقشا وقىتاتىن جالعىز-اق جوعارى وقۋ ورنى بولدى. ول – قىزدار پەداوگيكالىق ينستيتۋتى. قالعاندارى تۇگەل ورىس تىلىندە وقىتتى. مەن مەكتەپتى الماتىدا وقىدىم، بىزدە قازاق ءتىلى ءمۇعالىمى بولمادى. ياعني، قازاقتار ءوز تىلدەرىن جوعالتىپ الا جازداعان جاعداي بولعان»، - دەگەن دەپۋتات مۇنداي جاعدايدىڭ ەندى ورىس ءتىلىنىڭ باسىندا قايتالانباۋ كەرەكتىگىن ايتىپتى.

ۋكراينا مەن رەسەيدىڭ ءتىل ماسەلەسىندەگى كەلىسپەۋشىلىگى قاقتىعىسقا ۇلاسقانىن بوجكو تاقىرىپقا تۇزدىق ەتىپتى. قىزدى-قىزدىمەن ءوزارا داۋلى ماسەلەلەرى بار ەكى ەلدىڭ ىشكى جۇمىسىنا ارالاسىپ، ءبىرىنىڭ ساياساتكەرىن سالداقى ەتىپ تاستاپتى.

«مەن تاريحتىڭ انا سالداقى فاريوندى (ي. فاريون – ۋكراينانىڭ ۇلتتىق باعىتتاعى ساياساتكەرى – رەد.) ورنىنا قويعانىن قالايمىن. سىزدەر مەنى كەشىرىڭىزدەر، ارينە، ول ۋكراينادا حالىقتىڭ 30-40 پايىزى ورىس تىلىندە سويلەيدى دەيدى، نەگىزى وندا بارلىعى ورىسشا سويلەيدى. ول ورىس تىلىندە سويلەيتىندەردى ادام سانامايدى، ورىسشا سويلەۋگە قۇقىق بەرمەۋدى، ورىسشا ءان تىڭداعان تاكسيشىلەرگە ايىپ پۇل سالۋ كەرەك دەيدى. مۇندايدى جوعارى زاڭ شىعارۋشى ورگاندا ايتۋ ءۇشىن قانداي ناقۇرىس بولۋ كەرەك؟»، - دەگەن بوجكو ءوزىنىڭ بۇل توتەنشە مالىمدەمەسى بوتەن ەلدىڭ ىشكى ساياساتىنا ارالاسۋ ەكەنىن اڭعارماي قالعان سەكىلدى.

اڭعارماعانى بولسا كەرەك، ۋكراينا قوعامىنداعى ءتىل ماسەلەسىنە «مەملەكەتتىك باسقارۋ ورگاندارىنىڭ جۇمىسىنداعى ولقىلىق» دەپ باعا دا بەرىپ تاستاپتى.

دەپۋتات قازاقستاننىڭ بۇل ماسەلەدەگى «جەتىستىكتەرىنە» توقتالۋدى دا ۇمىتپاعان.

«قۇجات اينالىمى ەكى تىلدە جۇرگىزىلەدى. حات قاي تىلدە كەلسە، سول تىلدە جاۋاپ جازىلادى. بۇل قوعامداعى شيەلەنىس وشاقتارىن جويۋعا كومەكتەسەدى»، - دەپتى ۆ. بوجكو.

بىزدەگى بيلىك وكىلدەرىنىڭ حالىقارالىق ماسەلەدە دورەكىلىك تانىتۋى ءبىر بۇل ەمەس. مادەنيەت جانە سپورت ءمينيسترى ارىستانبەك مۇحامەدي ۇلى دا مامىر ايىندا ماسكەۋ قوناق ۇيلەرىندە دارەتحانا جۋاتىن قىرعىز قىزدارىن ءسوز ەتەمىن دەپ، كورشى ەلدىڭ سىرتقى ىستەر مينيسترلىگى نارازىلىق نوتا جىبەرۋىنە سەبەپ بولعانى بار.