الماتى قالاسىنىڭ اكىمى باۋىرجان بايبەك ارىقتار جۇيەسىنىڭ بۇزۋلىۋىنا كاسىپكەرلەردى كىنالاپ وتىر، - دەپ حابارلايدى Qamshy.kz كتك ارناسىنا سىلتەمە جاساپ.

الماتىنى سۋ باسىپ قالا بەرەتىنىنە قاتىستى ۇكىمەت باسشىسىنان ەكى مارتە ەسكەرتۋ العان قالا اكىمى بۇگىن ارىق ماسەلەسىن كەڭىنەن قوزعادى. مالىمەت بويىنشا، سوڭعى 6 جىلدا نەبارى 113 شاقىرىم ارىق جوندەۋدەن وتكەن. ال ونىڭ جالپى ۇزىندىعى 1200 شاقىرىمنان اسادى. تۋرا وسىنداي قارقىنمەن جۇمىس جۇرگىزىلگەن جاعدايدا ول ءبىر عاسىر ۋاقىتتى الۋى مۇمكىن. بۇل جەردە قارجى تاپشىلىعى دا قولبايلاۋ ەكەنىن ايتقان باۋىرجان بايبەك قولاستىنداعىلارعا ارىق جۇيەسىن رەتتەۋگە اقشانى ۇنەمدەپ جۇمساۋدى تاپسىردى.

باۋىرجان بايبەكتىڭ قابىلداۋ بولمەسىنىڭ الدىندا ونىڭ ورىنباسارلارى، باسقارما باسشىلارى مەن اۋدان اكىمدەرى جينالدى. ارينە، اۋدان باسشىلارى ەرەكشە قوجالجىپ تۇر. سەبەبى ءاربىر جاۋىننان سوڭ سۋ باسقان ۇيلەردەن تۇسەتىن شاعىم ازايار ەمەس. بۇگىنگى جيىندا ارىق ماسەلەسى ەرەكشە ايتىلدى. ال وسى سالادا اتقارىلىپ جاتقان جۇمىس قارقىنى تىم باياۋ ەكەن.

ەرلان اۋكەنوۆ، الماتى قالاسى اكىمىنىڭ ورىنباسارى:

-تۋرا وسىنداي قارقىنمەن جۇمىس جۇرگىزەتىن بولساق ارىق جۇيەسىن تولىق جوندەۋدەن وتكىزىپ، جاڭالارىن جۇرگىزۋ ءۇشىن 100 جىل دا جەتپەيدى.قازىرگى كۇنگە دەيىن جاۋىن سۋى اعاتىن ارنايى جۇيە جوق. بۇل جۇيەنىڭ قايدا ەكەنىن تابۋدىڭ ءوزى قيىنعا سوقپاق. 

شەنەۋنىكتەر 3 اي بويى ۇزىندىعى 1200 شاقىرىمدى قۇرايتىن ارىقتاردىڭ بارلىعىن تەكسەرىپ شىققان. سوڭعى 6 جىلدا ونىڭ نەبارى 113 شاقىرىمى عانا جوندەۋدەن ءوتىپتى. ال قالعان بولىگىنىڭ جاعدايى كوڭىل كونشىتپەيدى. سەبەبى، جاڭادان قوسىلعان ايماقتاردا ارىق اتاۋلى مۇلدەم جوق، ال ساۋدا ۇيلەرى بار جۇيەنىڭ تاس-تالقانىن شىعارىپتى.

باۋىرجان بايبەك، الماتى قالاسىنىڭ اكىمى:

-جولدى جوندەپ، بارلىعىن اسفالتپەن جاۋىپ تاستايدى. بۇل ساۋلەت جانە قۇرىلىس باسقارماسىنىڭ كاناسى. ولار قۇرىلىستاردى قاداعالاۋى كەرەك. ەندى جەكە كاسىپكەرلەر ءوز ولقىلىقتارىن وزدەرى جويسىن، بيۋدجەتتىڭ اقشاسى بۇعان جەتپەيدى.

الماتىنىڭ ارىق جۇيەسىن قالپىنا كەلتىرۋ ءۇشىن شامامەن 4 ملرد تەڭگە قاجەت ەكەن. ارينە، بيۋدجەتتەن مۇنداي قارجىنى الۋ وڭاي ەمەس. ال ەسەپ-قيساپتى تەكسەرمەستەن ماقۇلدايتىن اتقامىنەرلەردىڭ ارەكەتى بايبەكتىڭ اشۋىن كەلتىردى.  

–وتكەن جولى اۋدان اكىمدەرىن سۇرادىم، قانشا اقشا كەرەك ەكەنىن وزدەرى بىلمەيدى. سمەتانىڭ نە ەكەنىن ءتۇسىنىپ وتىرعانى دا شامالى. بۇل دەگەن مەملەكەتتىڭ اقشاسى ەمەس پە؟

جاۋىن سۋلارىنا ارنالعان جۇيەنىڭ كارتاسىن جوسپارلاۋعا تاعى 3 اي قاجەت ەكەن. ال ول ۋاقىتقا دەيىن ارىقتار قولعا الىنباق. قازىرگى تاڭدا ولار قوقىستان تازارتىلىپ، جەر-جەرلەردە ءتيىستى جۇمىستار باستالعان.

قالا ىشىندەگى ارىقتاردى جوندەۋ، قالپىنا كەلتىرۋ نەمەسە جاڭادان جۇرگىزۋ ارزان دۇنيە ەمەس. ماسەلەن ءدال مىنانداي اشىق ارىقتىڭ ءاربىر مەترى كەمىندە 11 مىڭ تەڭگە تۇرادى. بۇل تەك قانا قاجەتتى قۇرىلىس ماتەريالدارىنىڭ باعاسى. ال ودان بولەك اتقارىلاتىن جۇمىس قۇنى بار. سوندىقتان بيۋدجەت اقشاسى جەتپەگەن جاعدايدا نوسەر جاۋىننان سوڭ سۋ ارىقپەن ەمەس، كوشەمەن اعۋى جالعاسا بەرمەك. سەبەبى، ارنايى جاۋىن سۋى قۇيىلاتىن ارنالار تەك جوسپاردا عانا بار.