قاراعاندىدا كومىر بايىتۋ جونىندەگى جاڭا كاسىپورىن اشىلدى. ونىڭ اشىلۋ سالتاناتىنا كاسىبي شارشى الاڭدا تاپقان تابىسىن وسى جوباعا ينۆەستيسيا رەتىندە قۇيعان الەم چەمپيونى گەنناديي گولوۆكين قاتىستى، - دەپ حابارلايدى Qamshy.kz BNews.kz -كە سىلتەمە جاساپ.

بۇگىن قاراعاندىدا وندىرىستىك قۋاتتىلىعى جىلىنا 500 مىڭ توننا ەكىباستۇز جانە قاراعاندى كەن ورىندارىنان وندىرىلگەن كومىردى بايىتاتىن فابريكا اشىلدى.

اتالمىش جوباعا «KAZفەرريت» جەرگىلىكتى كاسىپكەرلەرى، «سامۇرىق-قازىنا» ۇلتتىق ءال-اۋقات قورى، سونداي-اق قازاقستاندىق بوكسشى، الەم چەمپيونى گەنناديي گولوۆكين اتسالىسىپ وتىر.

— اكەم 35 جىل شاحتادا ەڭبەك ەتتى. ءبىز قارا جۇمىستىڭ ءقادىرىن بىلەتىن وتباسىندا وستىك. بۇل ورتا ماعان وتە جاقسى تانىس، اتالعان ىسكە ءومىرىن سارپ ەتكەن مامانداردى دا بىلەمىن. مەن كەنشىلەردىڭ استاناسى – قاراعاندىدا ءتۋىپ-وستىم، بۇگىن ايماقتىڭ دامۋىنا وزىمشە وسىلاي ۇلەس قوسىپ وتىرعانىما قۋانىشتىمىن، – دەدى گەنناديي گولوۆكين.

اتاقتى سپورتشىنىڭ ايتۋىنشا، ول ەكونوميكاعا ينۆەستيسيا قۇيۋ ارقىلى ەلىنە پايدا اكەلگىسى كەلگەن.

— ماعان بۇل وي مەملەكەت باسشىسىنىڭ ءبارىن جەڭىپ، سوسىن ەلگە قايت دەگەن سول ءبىر سوزىنەن كەيىن كەلگەن بولاتىن. بوكستا ءالى دە الار اسۋلارىم بار. ءبىراق قازىردەن باستاپ ەلىمە ينۆەستيسيا قۇيۋ ارقىلى پايدامدى تيگىزە الامىن دەپ شەشتىم. ويتكەنى مەن ءۇشىن سپورت ءوزىمدى تانىتۋدىڭ جولى ەمەس، مەن ءۇشىن ەلىمنىڭ اتىن شىعارىپ، تۋىمىزدى جەلبىرەتۋ ماڭىزدى، سوندىقتان مەيلى بيزنەستە نەمەسە سپورتتا بولسىن، مەن ەلىمە پايدا اكەلۋگە تىرىسامىن، – دەپ اتاپ ءوتتى گولوۆكين.

كومىردىڭ ساپالى قاسيەتتەرىن ارتتىرۋعا باعىتتالعان ينۆەستيسيالار ەاەو-دا، كەيىن دسۇ-دا قازاقستاندىق كومىر ونەركاسىبىنىڭ باسەكەگە قابىلەتتىلىگىن ارتتىرۋدىڭ نەگىزى بولىپ تابىلادى. جاڭادان اشىلعان وندىرىستە 150 جۇمىس ورنى قاراستىرىلعان. الداعى ۋاقىتتا فابريكا كەڭەيىپ، دامىپ، ءوندىرىستى ۇلعايتپاق.

كومىردى بايىتۋ – ول بارلىق باعالى مينەرالداردى بوس جىنىستاردان ءبولۋ ماقساتىندا كومىردى وڭدەۋدىڭ باستاپقتى پروسەستەرىنىڭ جيىنتىعى بولىپ تابىلادى.