ءانشى، پروديۋسسەر ءقىدىرالى بولمانوۆ بۇگىن «ۇلىتاۋ» توبىنىڭ الداعى كونسەرتىنە وراي وتكەن بريفينگتە ءوزىنىڭ رەسەي عىلىم اكادەمياسىنىڭ پروفەسسورى اتاعىن العانىن مالىمدەدى، - دەپ حابارلايدى Qamshy.kz.

«ءقازىر قاۋىرت كەز، حالىقتىڭ ەش ۋاقىتى جوق. سوندىقتان حالىق ەشتەڭەنى ويلاماۋ ءۇشىن جەڭىل اۋەزدى مۋزىكاعا قۇمار بولا تۇسۋدە. ءبىز ۆيرۋستىق الەمدە ءومىر ءسۇرىپ جاتىرمىز. ول ءبىزدى تەلەديدار، ينتەرنەت ارقىلى بالاباقشادا دا، مەكتەپتە دە جاۋلاپ العان. بۇل بىزگە، اسىرەسە بالالارىمىزعا تۇبەگەيلى قاجەت ەمەس. ءبىز مۇنىمەن «بال بالا» ارقىلى كۇرەسۋدى باستاپ كەتتىك. كومپانيا عىلىمي-وندىرىستىك وشاققا اينالۋدا. عالىمدارىمىز دا بار، العاشقى وقۋ-ادىستەمەلىك كەشەنىمىز دە دايىن بولىپ قالدى. ءدال وسى ماسەلەگە وراي مەن ماسكەۋدە ديسسەرتاسيا قورعادىم. بۇگىن مەن رەسەي عىلىم اكادەمياسىنىڭ پروفەسسورى اتاندىم. ءبىز ءوز كەڭىستىگىمىزدى، ءوز مادەنيەتىمىزدى، اسىرەسە، يدەولوگيالىق كەڭىستىگىمىزدى قورعاۋىمىز كەرەك»، - دەيدى ءانشى.

سونداي-اق، ءقىدىرالى بولمانوۆ ءوزىنىڭ شىعارماشىلىق ءومىر جولى جايىندا كىتاپ جازىپ جاتقانىن دا تىلگە تيەك ەتتى.

«مەن ءقازىر كىتاپ جازىپ جاتىرمىن. كەيدە بۇرالاڭ، كەيدە قيىن، ەندى بىردە تاماشا جەتىستىكتەرگە جول اشقان امەريكاداعى، ەۋروپاداعى، گران-پريدەگى كونسەرتتەرىمىزگە كوز جۇگىرتسەم، اللا تاعالانىڭ ءبىزدىڭ ۇمتىلىسىمىزدى ەلەگەنى-اۋ دەگەن ويعا كەتەمىن. ءتىپتى، ءبىز كوروليەۆا وردەنىن دە الدىق»، - دەيدى ق.بولمانوۆ.

«بۇگىن، اسىرەسە «ۇلىتاۋدىڭ» جىلدىق مەرەيتويلىق كونسەرتى الدىندا  ەڭبەگىمنىڭ ەش كەتپەگەندىگىن سەزىنىپ وتىرمىن. 20 جىلدىڭ ىشىندە مەن انشىلەر مەن جوبالاردىڭ تۇتاس ارمياسىن قالىپتاستىردىم دەپ ايتا الامىز. كەيدە مۇنىڭ بارلىعىنا دا قالاي ۇلگەرگەنىمدى تۇسىنبەيمىن دە»، - دەپ قۋانىشىن ءبولىستى بولمانوۆ.

ايتا كەتەيىك، «ۇلىتاۋ» ەتنو-روك توبى 6 شىلدەدە - ەلوردا كۇنىندە «الاۋ» مۇز سارايىندا كونسەرت وتكىزەدى. كەلۋشىلەر «ۇلىتاۋ» توبى، قاراقات ءابىلدينا مەن ءقىدىرالى بولمانوۆتىڭ ورىنداۋىنداعى ەرەكشە جارىقتاندىرۋدىڭ سۇيەمەلدەۋىمەن جاڭا جانە ەسكى اندەردى تىڭدايدى. مەرەيتوي يەلەرىن شىعارماشىلىقتاعى ارىپتەستەرى مەن دوستارى دا قۇتتىقتايدى.