ءاليا اۋىلىنداعى مال اۋرۋى وزەندەگى ميكروورگازيمدەر سەبەبىنەن بولۋى مۇمكىن. بۇل تۋرالى «اقتوبە اقپارات» ورتالىعىندا وتكەن بريفينگ بارىسىندا وبلىس اكىمىنىڭ ورىنباسارى مۇحتار جۇماعازييەۆ ايتتى، - دەپ حابارلايدى Qamshy.kz Aktobenews.kz -كە سىلتەمە جاساپ.

وسىدان ەكى ايداي ۋاقىت بۇرىن اقتوبە وبلىسىنىڭ قوبدا اۋدانى ءاليا اۋىلىندا ءىرى قارا مالى اۋرۋعا ۇشىراعان بولاتىن. 10 كۇننىڭ ىشىندە اۋرۋ 160-قا جۋىق مالعا جۇققان. كەيىن اۋىل شارۋاشىلىعى مينيسترلىگى ۆەتەرينارلىق قاداعالاۋ جانە باقىلاۋ كوميتەتى مالدىڭ قىرىلۋىن زەرتتەۋ بارىسىندا پاستەرەللەز بەن لەستەرەزگە قاتىستى كلينيكالىق بەلگىلەر بايقالعانىن ايتقان-دى.

— مال اۋرۋعا ۇشىراعان بويدا اتالعان كوميتەتتەن ارنايى ماماندار كەلدى. بۇل جايتتىڭ بىرنەشە سەبەبى ايتىلدى. ءاليادا ەكى جايىلىم بار. ءبىر جاعى باتىس جاعىنا قاراي، ەكىنشىسى شىعىس جاعىنا قاراي جايىلادى. شىعىس جاعىندا جايىلاتىن مال اۋرۋعا ۇشىراعان. بۇل جاقتا مال وزەندى كەسىپ وتەدى. بولجام بويىنشا، مال سۋمەن كەلگەن ميكروورگانيزمدەر سالدارىنان اۋرۋعا ۇشىراعان بولۋى مۇمكىن. زەرتتەۋ ءالى جۇرگىزىلىپ جاتىر، — دەدى مۇحتار جۇماعازييەۆ.