قاراعاندىدا بىرنەشە كۇننىڭ ىشىندە ءۇش بالا جوعالىپ كەتتى، - دەپ حابارلايدى Qamshy.kz Tengrinews.kz -كە سىلتەمە جاساپ.

11 جاستاعى اقارىس تىلەۋكە مەن 10 جاستاعى ايان مەدينوۆ 6 شىلدەدە قاراعاندى وبلىسى اقتاس اۋىلىندا جوعالعان. ەرىكتىلەردىڭ مالىمەتىنشە، بالالاردىڭ جوعالعانى تۋرالى حاباردى پوليسياعا اكەسى بەرگەن. بالالار تۇسكە دەيىنگى ۋاقىتتا ويناپ ءجۇرىپ، كەتىپ قالعان. وسىدان كەيىن ولاردى ەشكىم كورمەگەن.   

"بالالاردىڭ جوعالعانى تۋرالى مالىمەت بىزگە پوليسيادان كەلىپ ءتۇستى، سەبەبى ءبىز ولارمەن بىرگە جۇمىس ىستەيمىز. ءقازىر ءبىز ەرىكتىلەر توبىن قۇرىپ جاتىرمىز. ازىرشە قانشا ادام ەكەنىمىزدى ايتا المايمىن"، - دەدى ەرىكتىلەردىڭ ءبىرى اندرەي حلاششيەۆ.  

جوعالعان بالالاردىڭ بەلگىلەرى: اقارىس تىلەۋكە - 2005 جىلعى. بويى 125 سانتيمەتر، ارىق كەلگەن. شاشى اشىق رەڭكتى، كوزى قوڭىر. جاسىل سپورتتىق كۇرتە كيگەن، شالبارى قارا، فۋتبولكا مەن قارا كروسسوۆكا. 

ايان مەدينوۆ - 2006 جىلعى. بويى 110 سانتيمەتر، ارىقتاۋ كەلگەن. شاشى قارا، كوزى قوڭىر. قارا كۇرتە كيگەن، شالبارى قارا، قارا كروسسوۆكا.

مۇنىمەن قاتار، تاعى ءبىر بالانىڭ جوعالعانى بەلگىلى بولدى. 6 جاستاعى داريا پاحاتايەۆا 4 شىلدەدە قاراعاندىداعى 33-شاحتا ماڭىندا جوعالعان. ول تاڭعى ۋاقىتتا ۇيىنەن شىعىپ كەتكەن، ونى سوڭعى رەت مەكتەپتەگى بالالار الاڭىندا كورگەندەر بار. وسىدان كەيىن ول ۇيىنە ورالماعان. تۋىستارى پوليسياعا 6 شىلدەدە حابار بەرگەن. قىزدىڭ بەلگىلەرى: بويى 110-115 سانتيمەتر. كوزى سۇر، شاشى اشىق، قىسقا. بەتىندە سەكپىل بار. وڭ يىعىندا يت تىستەگەننەن ءىز بار. كوك دجينس، قىزىل ءتۇستى اياق كيىمى بولعان.