«ەۆرازيا» ارناسىنىڭ كورەرمەندى عانا ەمەس، قازاقستاندى مازاق ەتكەن كەزەكتى قويىلىمى تاعى دا ارنا ەفيرىندە جالعاستى.

«ەۆرازيا» ارناسىنىڭ باسشىلىعى بۇل جولى ەفير ارقىلى قازاق ءتىلىن مازاق قىلعىسى كەلدى مە، الدە ارنادا قازاق ءتىلىن بىلەتىن بىردە-بىر ماماننىڭ جوقتىعى  ما، ايتەۋىر ەفيردە «شالا قازاقتىڭ» جازۋى جازىلدى.

كۇنى كەشە استانا كۇنىنە وراي جاڭالىقتار قىزمەتى ۇسىنعان بەينەماتەريالدا ەكى سوزدەن ەكى قاتە جىبەرىپ، قالا كۇنىنە «توسىن سىي» جاساپ جىبەردى.

ەل ەڭسەسى – ەلوردا ەمەس، «ەلردا» ەكەنىن ايتقىسى كەلگەن ارنا باسشىلىعى «سالاتاناتى» جاراسقان استانانى مەرەيتويىمەن وسىلاي ەرەكشە قۇتتىقتاعىسى كەلگەن سياقتى.

وزدەرىن №1 ارنا سانايتىن “ەۆرازيا” ارناسى باس تاقىرىپتىڭ وزىنەن ورەسكەل قاتە جىبەرىپ، ەلوردا دەگەن ءبىر ءسوزدى دۇرىس جازا الماي، «ەلردا ەڭسەسى – ەل ەڭسەسى» دەۋ ارقىلى ەلدىڭ ەڭسەسىن تۇسىرە الماسى انىق. ساۋلەت-سالتاناتى كەلىسكەن قالانىڭ سالاتاناتىن كەلىستىرگەن تىلشىلەر مەن رەداكتورلار قاي ارنادا قىزمەت ەتسە دە، ءوز ءتىلىن قۇرمەتتەمەيتىن بىرەۋ بولسا كەرەك-تى.

ايتپەسە، جاڭالىق ەفيرگە شىعاردىڭ الدىندا ءتىلشى جازعان ماتەريال قانشاما ادامنىڭ (شىعارۋشى رەداكتور، رەداكتور، پروديۋسسەر) الدىنا بارىپ، سۇزگىدەن وتەرى قاراپايىم جۇرتقا ايتپاسا دا تۇسىنىكتى نارسە. ەندەشە ورەسكەل قاتەلەردى «بايقاماي» قالعان ارنا ۇجىمى قازاق ءتىلىن تاپتاعانىمەن قويماي، وزدەرىنىڭ تىم ساۋاتتى ەكەندىكتەرىن كورسەتتى.

ساۋاتى جەتىسپەگەن ارنا ۇجىمىنان كاسىبي بىلىكتىلىكتى تالاپ ەتۋدىڭ ءوزى كۇلكىلى. وسى ورايدا، كۇللى قازاقتىڭ نامىسىنا تيگەن ارنانىڭ الگى قىلىعى... جەر ماسەلەسى كەزىندە دە ورتاعا بۇلىك تاستاپ، ارتىنان ءوز ىستەرىن جۋىپ-شايعان دا وسى ارنا بولاتىن. جەردى ساتۋ مەن جالعا بەرۋگە قارسى ميتينگ قاتىسۋشىلارىنا الدەبىر سىرتقى كۇشتەردىڭ 150 اقش دوللارىنان تاراتىپ جاتقانىن سەنىممەن حابارلاعان ەدى. ال سوسىن بۇل قوعامدا ۇلكەن داۋ تۋدىرىپ، ارتىنان ءوز ارەكەتتەرىن «جۋىپ-شايعان» «ەۆرازيا» ارناسى ەندى كەلىپ تىلىمىزگە «تۇكىرىپ» قالىپتى.

قازاق ءتىلىن كەرەك ەتپەيتىن ارنا قازاققا دا كەرەك ەمەس. كورشىلەس رەسەي فەدەراسياسىنىڭ ارناسى قازاق ءتىلدى تىلشىلەرىن وقىتىپ السىن، ايتپەسە مەملەكەتتىك تىلدە قاتە جازىپ ەفيرگە جىبەرگەن ارەكەتتەرىن ەشنارسە اقتاي المايدى.

ەل اراسىندا قادىر-قاسيەتى قالماي بارا جاتقانىن تۇسىنەتىن باسشىلىعى بولسا، ارنانىڭ ىشكى جاعدايىن تاعى ءبىر رەتتەپ العانى ءجون.

ينديرا قۋات