وڭتۇستىك قازاقستان وبلىسى سارىاعاش اۋدانىنا قاراستى دوستىق اۋىلىنىڭ ون شاقتى ءۇيى شەكارانى بەلگىلەۋ كەزىندە وزبەكستان تەرريتورياسىندا قالىپ قويعان بولاتىن. سالدارىنان، اتالعان ءۇي تۇرعىندارىنىڭ ەلمەن بايلانىسى دا قيىنداي تۇسكەن ەدى، - دەپ حابارلايدى Qamshy.kz skifnews.kz -كە سىلتەمە جاساپ.
شەكارادا قالعان 10 وتباسىنى كوشىرۋ ماقساتىندا دوستىق اۋىلىنا باراتىن اباي-كالحاباد تاس جولىنىڭ ەكى بەتىنەن 80 گا جەردى بەرۋ ءۇشىن دوستىق ەلدىمەكەنىنىڭ وڭتايلاندىرىلعان جوسپارى جاسالعان.
وبلىس اكىمىنىڭ ورىنباسارى ج.بوكەنبايەۆ تۇرعىنداردىڭ مۇلكىن زاڭداستىرۋعا كومەكتەسۋىن جانە مەملەكەت تاراپىنان وتەماقى الىپ، باسقا جەرگە كوشىرۋ تۋرالى وتىنىشتەرىن جەتكىزدى.
سونداي-اق، وبلىس اكىمىنىڭ ورىنباسارى بۇل اۋماققا مەملەكەت ەسەبىنەن گاز، سۋ تارتۋ ەكونوميكالىق جاعىنان ءتيىمسىز بولعاندىقتان بۇگىنگە دەيىن اۋىل تۇرعىندارى كوگىلدىر وتىنسىز جانە اۋىز سۋدى 3 شاقىرىم قاشىقتىقتا ورنالاسقان ۇشقىن ەلدى مەكەنىنەن تاسىمالداپ ءىشىپ كەلەتىنىن ايتتى.
جيىندى قورىتىندىلاعان وبلىس اكىمى بۇل ماسەلە بويىنشا ارنايى جۇمىس توبىن قۇرۋدى جانە اۋىل تۇرعىندارىن باسقا جەرگە قونىستاندىرعانشا اۋىز سۋمەن قوسا سىعىمدالعان گازبەن قامتاماسىز ەتىلۋى قاجەتتىگىن ايتتى. سونىمەن قاتار، اۋدان اكىمدىگىنە شۇعىل تۇردە اتالعان ۇيلەر بويىنشا تۇگەندەۋ جۇمىستارىن جۇرگىزۋدى جانە مۇلىكتى زاڭداستىرۋ بويىنشا قۇجاتتارىن راسىمدەۋگە كومەكتەسۋدى تاپسىردى.
