وڭتۇستىكتە سىبايلاس جەمقورلىققا قاتىستى قۇقىق بۇزۋشىلىق جاساعان دەگەن كۇدىكپەن بىرنەشە لاۋازىمدى تۇلعا ۇستالدى، - دەپ حابارلايدى Qamshy.kz Otyrar.kz -كە سىلتەمە جاساپ.

بۇل تۋرالى سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ وقو-داعى دەپارتامەنتى اقپارات تاراتقان.

ناقتى ايتقاندا، 200 000 تەڭگە پارا الىپ جاتقان جەرىنەن ءا.قاستەيەۆ اتىنداعى وبلىستىق ونەر جانە ديزاين كوللەدجىنىڭ ديرەكتورى ا.نيازوۆ ۇستالعان. ول بۇل پارانى وقىتۋشىدان كوللەدجگە تالاپكەردىڭ وقۋعا ءتۇسۋى جانە پەداگوگيكالىق ساعاتتى كوبەيتۋ ءۇشىن الماق بولعان.

قازىرگى تاڭدا ۇستالعان ازامات قالالىق ىشكى ىستەر باسقارماسىنىڭ ۋاقىتشا تەرگەۋ اباقتىسىنا قامالدى. ا.نيازوۆ قالالىق ءماسليحاتتىڭ بەسىنشى جانە التىنشى شاقىرىلىمىنا دەپۋتات بولىپ سايلانعان.

بۇعان قوسا «ايسانا انا» جانە «جاس شۋاق» بالاباقشالارىنىڭ قۇرىلتايشىسى مەن مەڭگەرۋشىسى ۇستالدى. ا.بيبولوۆ بالاباقشادا تاربيەلەنەتىن بۇلدىرشىندەردىڭ جالعان ءتىزىمىن جاساۋ ارقىلى «بالاپان» مەملەكەتتىك باعدارلاماسى ارقىلى بولىنگەن بيۋدجەتتىڭ 10 000 000 تەڭگەسىن جىمقىرعان.

ءقازىر بۇل ازامات ماقتاارال اۋداندىق ىشكى ىستەر ءبولىمىنىڭ اباقتىسىندا قاماۋدا جاتىر. وسى ەكى فاكتى بويىنشا تەرگەۋ-تەكسەرۋ جالعاسۋدا.