ۋكراينالىق ايەلدەر "#مەنايتۋعاقورىقپايمىن" (#يانەبويۋسسكازات) اتتى فلەشموب باستاپ كەتتى. اتالمىش فلەشموبقا ەلىمىزدەگى پەدوفيلدەردىڭ قۇرباندارى دا قوسىلىپ، تۋىسقاندارىنان قالاي ءجابىر كورگەندەرىن باياندادى، - دەپ حابارلايدى Qamshy.kz Nur.kz -كە سىلتەمە جاساپ.

ۋكراينالىق جۋرناليست اناستاسيا مەلنيچەنكو بارلىق پەدوفيلدىڭ قۇربانىنا اينالعان نازىك جاندىلاردى ءۇنسىز قالماۋعا شاقىردى.

ودان كەيىن جۋرناليسكە ‪"#مەنايتۋعاقورىقپايمىن" حەشتەگى ارقىلى زورلىق كورگەن جۇزدەگەن بويجەتكەن قوسىلعان. ولاردىڭ اراسىندا قازاقستاندىق اينۇر نۇرسەيىتوۆا بار.

"اكەسىنىڭ قامقورلىعىندا جۇرگەن ماعان ون ءبىر جاسىمدا قوناققا كەلگەن ماس تۋىسقان تيىسكەن. ول كەزدە مەن ادام اناتومياسى تۋرالى كوپ كىتاپ وقىپ، سەكسۋالدى ءومىر تۋرالى ازىن-اۋلاق بىلەتىنمىن. اكەم ول تۇرعىدان كىتاپتار بەرىپ، ساۋاتىمدى اشپاعاندا، مەن الگى اعانىڭ ماعان نە ىستەمەك بولعانىن ۇقپاس تا ەدىم. ول مەنى قاراڭعى بولمەگە ەرتىپ الىپ بارىپ، "كەلشى، بەتىڭنەن ءبىر سۇيەيىن" دەگەندە باستاپقىدا جامان ويى بارىن بىلمەدىم. كەيىن ول قاسىنا جاتقىزىپ، قول جۇگىرتىپ، ەرنىمدى قاناعانشا سۇيە باستاعاندا مەن جىلاپ، بار كۇشىممەن ونى يتەرىپ جىبەردىم. ودان قۇتىلىپ ۇلگەردىم، دەگەنمەن سول ارەكەتى ءۇشىن قاتتى ۇيالعان ەدىم"، - دەپ ەسىنە الدى نۇرسەيىتوۆا.

بويجەتكەن سول جايتتان كەيىن ءىنىسى مەن اكەسىنەن وزگە ەشبىر ەر ازاماتقا سەنىم بىلدىرە الماي كەلگەن.

"وسى جايتتان كەيىن مەن، ءتىپتى تۋعان اعالارىممەن ءبىر بولمەدە ۇيىقتاۋدان قورقاتىنمىن. بولعان جايتتى تەك جيىرما جىل وتكەسىن اناما عانا ايتا الدىم. سەبەبى انام تاعى دا بىزگە قوناققا تۋىسقاندار كەلەتىنىن ايتتى. قىزىنىڭ باسى تومەن ءتۇسىپ، ەرنى قاناپ، ەلدىڭ كوزىنە قاراي الماي جۇرگەنىن بايقاماعانى ءۇشىن اناما رەنىشىمدى ايتتىم. دەگەنمەن جيىرما جىل وتسە الگى وڭباعان پەدوفيلدى تاۋىپ، ءولتىرىپ تاستاي ما دەگەن قورقىنىشپەن اكەمە سول بەتى ايتا المادىم"، - دەپ جالعاستىردى اينۇر.

دىناركو قاسىمبەكوۆا ەسىمدى تاعى ءبىر قولدانۋشى پەدوفيلدەن ءجابىر كورگەن ەكەن.

ەكى قاباتتى ءۇيدىڭ بىرىندە ويناپ وتىرعان ون جاسار قىز بالاعا 15 جاستاعى جيەنى كەلىپ، ءبىر قىزىقتى "ەرەسەكتەردىڭ ويىنىن" ويناۋعا ۇسىنىس جاسايدى.

ءبارى ەرىننەن سۇيۋدەن باستالىپ، كەيىن الگى جەتكىنشەك قىز بالامەن جىنىستىق قاتىناسقا تۇسەدى. ول كەزدە ءوزىنىڭ ۇياتتى ارەكەتكە بارىپ جۇرگەنىن تۇسىنبەگەن قىز بالا جاز بويى ەرەسەكتەر ۇيدە جوق كەزدە جيەنىمەن وسىلاي ويناپ جۇرگەن.

"سول ون جاسار قىز مەن ەدىم. كەيىن بۇرىس دۇنيە جاساعانىمدى تۇسىنە باستاپ، جيەنىمنەن قاشقاقتايتىن بولدىم. ال بۇل تۋرالى اتا-انام ءالى كۇنگە دەيىن تۇك بىلمەيدى"، - دەيدى قاسىمبەكوۆا.

ودان كەيىن بويجەتكەن 23 جاسىندا دا زورلانعان.

"الماتى. جاڭبىرلى كۇن. جۇمىستان كەلە جاتقانىمدا اينالا تىم-تىرىس بولدى. ءبىر كەزدە قاراڭعى بۇرىلىستان وتە بەرگەنىمدە ارتىمنان ءبىر جىگىت سوققى جاسادى. ەسىمنەن تانىپ قالدىم. ول مەنىڭ دەنەمدى باسقا جاققا سۇيرەپ اپارىپ، ءاميانىمدى الىپ، تايىپ تۇرعان. ەسىمدى جيعاسىن، تاكسيمەن ۇيگە زىمىرادىم. اتا-اناما جەتكەندە عانا زورلانعانىمدى ءتۇسىندىم"، - دەيدى بويجەتكەن.

فلەشموبقا اينۇر ابسەمەتوۆا ەسىمدى تۇرعىن دا قوسىلعان.

"ماعان توعىز جاسىمدا ستۋدەنت اعام ءۇش ءتۇن بويى تيىسۋگە ارەكەت ەتكەن. مەن قورعانۋ ءۇشىن جاستىعىمنىڭ استىنا قايشى سەكىلدى وتكىر زاتتار جاسىرمايىنشا، ۇيقىعا جاتپايتىنمىن. وزگە بولمەدە اتا-انام ۇيىقتاپ جاتتى. انام مەنىڭ نە ءۇشىن توقتاۋسىز جىلاعانىمدى تۇسىنگەن جوق. مەن قاتتى قورقىپ، قاتتى ۇيالعاننان بولعان جايتتى دۇرىستاپ تۇسىندىرە المادىم. ال جىلاۋىمدى تەك انام قاتتى شاپالاقپەن ۇرعاندا عانا قويا الدىم"، - دەپ ەسىنە الدى ابسەمەتوۆا.

بويجەتكەندى 17-18 جاسىندا تاعى ەكى رەت زورلاعان.

"بەيتانىس ادام سەنىمىڭە كىرەدى (ورتاق تانىستارى بارىن جەلەۋ ەتىپ)، كۇشتەپ سەنى سۇيرەپ اكەتەدى، كەيىن زورلاپ، ءىسىن تىندىرعاسىن ەسىكتەن لاقتىرا سالادى. مەن وزىمە سەنىمدى قايتارا الماي كوپ قينالدىم"، - دەيدى اينۇر.