تارازدا 8 جاستاعى قىز 4ء-شى قاباتتان قۇلاپ كەتتى، - دەپ حابارلايدى Qamshy.kz كتك ارناسىنا سىلتەمە جاساپ. 

ەكىنشى سىنىپ وقۋشىسى جەرگە وڭباي تۇسكەنىمەن، قۇداي ساقتاپ امان قالعان. قاتتى جاراقات العان ول ءقازىر اۋرۋحانادا جاتىر.

-تۋرا مىنا جەردە جاتتى. مىناۋ جاتىن بولمە عوي. الدىندا جاڭبىر جاۋعان، بالا بىلاي قۇلاعان.

شامامەن 10 مەتر بيىكتىكتەن قۇلاعان قىزدى جەردە تالىپ جاتقان جەرىنەن ەڭ العاش ءبىرىنشى قاباتتاعى تۇرعىن كورىپ، دەرەۋ جەدەل جاردەم شاقىرعان. ايتۋىنشا، ەسەڭگىرەپ جاتقان وقۋشى ەت قىزۋىمەن العان جاراقاتىن سەزىنبەگەن. ونىڭ بەلى توسەك جايماسىمەن بۋىلعان ەكەن. ءقازىر پەرىشتەسى قاققان جەتكىنشەك بالالار اۋرۋحاناسىندا جاتىر. العاش تۇسكەندە ونىڭ ءحالى اۋىر بولعانىمەن، ءقازىر تۇراقتى. دارىگەرلەر ناۋقاستىڭ ميى شايقالىپ، ومىرتقاسىن زاقىمداعانىن ايتادى. ەندى ون كۇندە قۇلان تازا ايىعىپ كەتۋى مۇمكىن. ەل اراسىندا اياگوزدى الدە بىرەۋ ادەيى لاقتىرىپ جىبەرگەن دەگەن قاۋەسەت ايتىلۋدا. الايدا، جەتكىنشەكتىڭ جاقىندارى اياگوز اپكەسىمەن ويناپ ءجۇرىپ ابايسىزدا قۇلاپ كەتكەن دەپ وتىر. 8 جاستاعى وقۋشى ۇيىندە 11 جاستاعى بولەسى جانە ناعاشى اتاسىمەن بىرگە بولعان ەكەن.