دايش (قازاقستاندا تىيىم سالىنعان لاڭكەستىك ۇيىم) سودىرلارى ەكى پيلوتى بار رەسەيلىك مي-25 تىكۇشاعىن اتىپ ءتۇسىردى. ەكەۋى دە قازا تاپتى. وقيعا 8 شىلدەدە پالميرا ماڭىنداعى حومس ەلدى مەكەنىندە بولدى، - دەپ حابارلايدى Qamshy.kz Tengrinews.kz -كە سىلتەمە جاساپ.
اسكەري ۇشقىش-ينسترۋكتور - پولكوۆنيك ريافاگات حابيبۋلين مەن ۇشقىش-وپەراتور، لەيتەنانت ەۆگەنيي دولگين سيريالىق قولباسشىلىقتان دايش سودىرلارىن اتقىلاۋعا سۇرانىس العان. بۇل ۋاقىتتا پالميرانىڭ شىعىسىندا سودىرلاردىڭ جاساعى سيريالىق اسكەريلەرگە شابۋىل جاساپ جاتقان.
"ەكيپاج كومانديرى ريافاگات حابيبۋلين لاڭكەستەرگە شابۋىل جاساۋ تۋرالى شەشىم قابىلدادى. رەسەيلىك ەكيپاجدىڭ ساۋاتتى ىس-ارەكەتتەرىنىڭ ارقاسىندا لاڭكەستەردىڭ شابۋىلى توقتادى. اتىس جيىندىعى تاۋسىلعاننان كەيىن كەرى قاراي بۇرىلىپ جاتقاندا تىكۇشاقتى جەردەن لاڭكەستەر اتىپ ءتۇسىردى، ءسويتىپ، تىكۇشاق سيريالىق ۇكىمەتتىك اسكەرىنىڭ باقىلاۋىنداعى ايماققا قۇلادى. تىكۇشاق ەكيپاجى قازا تاپتى"، - دەپ حابارلادى ۆەدومستۆو وكىلدەرى.
قازا بولعان پيلوتتار مەملەكەتتىك ناگرادالارعا ۇسىنىلدى.
RT تەلەارناسىنىڭ مالىمەتىنشە، رەسەيلىك مي-25 اقش-تا شىعارىلعان تانك اتاتىن TOW زىمىرانعا قارسى كەشەنىمەن اتىپ تۇسىرىلگەن. بۇل قارۋ سيرياعا 2013 جىلدان بەرى جەتكىزىلىپ جاتىر، بۇل كەشەندى اقش قانا ەمەس، پارسى شىعاناعىنداعى ەلدەر دە وندىرەدى ەكەن.
ال سەنبى كۇنى اراب باق-تارى رەسەيلىك تىكۇشاققا جاسالعان شابۋىل بەينەلەندى دەپ ءبىر ۆيدەوجازبانى جاريالادى. الايدا كادرلاردان تىكۇشاقتىڭ ماركاسىن، وقيعانىڭ قايدا جانە قاشان بولعانىن انىقتاۋ مۇمكىن ەمەس.
ايتا كەتەيىك، سيرياداعى اسكەري وپەراسيالار باستالعالى بەرى رەسەيلىك اسكەريلەر وسىمەن ەكى تىكۇشاقتان ايىرىلدى. 12 ساۋىردە رەسەيلىك مي-28ن حومس اۋدانىندا قۇلاعان بولاتىن. ەكى ۇشقىش تا قازا تاپقان. ال تاعى ءبىر مي-8 تىكۇشاعى 24 قاراشادا سۋ-24 بومبالاۋشى ۇشاعىنىڭ ەكيپاجىن قۇتقارۋ بويىنشا وپەراسيا كەزىندە جوعالعان ەدى. ايتا كەتەيىك، سۋ-24 بومبالاۋشىسىن تۇركيانىڭ جويعىشتارى اتىپ تۇسىرگەن بولاتىن.
