قازاقستاننىڭ ىشكى ىستەر مينيسترلىگىنىڭ تەرگەۋ دەپارتامەنتى استانادا ستۋدەنت ەراسىل اۋباكىروۆتىڭ ءولىمى بويىنشا ءىستى تەرگەۋدى اياقتادى، - دەپ حابارلايدى Qamshy.kz Tengrinews.kz -كە سىلتەمە جاساپ. بۇل تۋرالى ق ر ءىىم مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋبايەۆ حابارلادى.

"ە.و.اۋباكىروۆتىڭ ءولىمى دەرەگى بويىنشا قىلمىستىق ءىستىڭ سوتقا دەيىنگى تەرگەۋى اياقتالدى. قازىرگى ۋاقىتتا قىلمىستىق ءىس بويىنشا جابىرلەنۋشىلەر مەن ولاردىڭ وكىلدەرىنە، كۇدىكتىلەرگە، سونىمەن قاتار ولاردىڭ قورعاۋشىلارىنا تەرگەۋ ارەكەتتەرىنىڭ اياقتالىپ، قىلمىستىق ءىس ماتەريالدارىمەن تانىسۋدىڭ باستالعانى حابارلاندى"، - دەپ حابارلادى رەداكسيانىڭ رەسمي ساۋالىنا بەرىلگەن جاۋاپتا الماس سادۋبايەۆ.

الايدا ق ر ءىىم وكىلدەرى سوتقا دەيىنگى تەرگەۋدىڭ مالىمەتتەرىن جاريا ەتپەي وتىر. "ق ر قپك تالاپتارىنا سايكەس، سوتقا دەيىنگى تەرگەۋدىڭ مالىمەتتەرى جاريا ەتۋگە جاتپايدى. مالىمەتتەر پروكۋروردىڭ رۇقساتىمەن، ەگەر تەرگەۋ مۇددەسىنە قايشى بولماسا جانە وزگە تۇلعاداردىڭ قۇقىعىن بۇزۋ مەن زاڭدى مۇددەلەرىن بۇزباسا جاريا ەتىلۋگە جاتادى"، - دەپ حابارلادى ءىىم وكىلدەرى. 

وسىعان دەيىن ەراسىل اۋباكىروۆتىڭ ءولىمى بويىنشا ىستە ايان مەيىربايەۆتىڭ كەپىلاقىمەن بوساپ شىققانى بەلگىلى بولعان ەدى. ايان مەيىربايەۆقا قاتىستىقىلمىستىق قۋدالاۋ توقتاتىلعان بولاتىن.

ەسكە سالايىق، 23 جاستاعى ەراسىل اۋباكىروۆتىڭ زورلىق بەلگىلەرى بار ءمايىتىن پوليسەيلەر 10 اقپاندا تاپقان بولاتىن. كىسى ءولتىردى دەگەن كۇدىكپەن ءتورت ادام ۇستالدى. ەراسىل اۋباكىروۆ ەلورداداعى مەديسينالىق ۋنيۆەرسيتەتتىڭ التىن كۋرسىنىڭ ستۋدەنتى ەدى. ول 3 اقپاندا ۇيىنەن شىعىپ كەتىپ، قايتا ورالماعان. كەلەسى كۇنى ونىڭ جوعالعانى جايلى حاباردى دوستارى تاراتتى.