قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىنا قاراستى 5513 اسكەري ءبولىمىنىڭ بازاسىندا وڭىرلىك قولباسشىلىق اسكەري بولىمدەرىنىڭ جەرگىلىكتى ۇلت وكىلى ەمەس اسكەري قىزمەتشىلەرى اراسىندا «مەملەكەتتىك ءتىل – مەنىڭ ءتىلىم!»، مەملەكەتتىك ءتىلدى ەنگىزۋگە جاۋاپتى ماماندار اراسىندا «ۇزدىك مامان»، مەملەكەتتىك ءتىلدى وقىتۋ كابينەتتەرىنىڭ ماتەريالدىق بازاسىن مولايتۋ جانە ۇزدىك تاجىريبەلەردى ءبولىسۋ ماقساتىندا «ۇلگىلى قازاق ءتىلى كابينەتى» بايقاۋ-سايىستارى وتكىزىلدى، - دەپ حابارلايدى Qamshy.kz.
قازاق حالقى قالىپتاسقالى بەرگى داۋىردە قانشاما تاعدىردىڭ تەزىنەن، توزاقتىڭ وزىنەن امان ءوتىپ، بۇگىنگى كۇندە «مەملەكەتتىك ءتىل – قازاق ءتىلى» دەگەن ۇعىمعا يە بولعان انا ءتىلىمىز – وتكەن تاريحىمىزدىڭ بىردەن-بىر جەمىسى. ويتكەنى وسى مارتەبەگە جەتۋ ءۇشىن قازاق ەلى سان سوقپاقتان سۇرىنبەي ءوتىپ تەر توكتى، سول ەڭبەكپەن اققان تەرى اقتالدى دا. سەبەبى قازاقستان رەسپۋبليكاسىندا مەكەندەپ جاتقان سان ءتۇرلى ۇلتتاردىڭ بارلىعى دەرلىك قازىرگى ۋاقىتتا قازاق ءتىلىن ۇيرەنۋگە زور تالپىنىس ءبىلدىرىپ ءجۇر.
مەملەكەتتىك ءتىلدى ۇيرەنۋگە دەگەن ىنتا-جىگەر ۇلتتىق ۇلاندا دا ءوز ناتيجەسىن بەرىپ كەلە جاتىر. بۇعال دالەل رەتىندە، بۇگىنگى وتكەن سايىستى ايتىپ وتۋگە بولادى. بايقاۋ بارىسىندا قاتىسۋشىلار قازىرگى زامانداعى مەملەكەتتىك ءتىلدىڭ ماڭىزدىلىعىنا باسا توقتالا وتىرىپ، قازاقشا ماقال-ماتەل جاتتاۋ، ءسوز جارىسى، قازاقشا كورىنىس قويۋ سەكىلدى نوميناسيالار بويىنشا باسەكەگە ءتۇستى. ءبىر قۋانارلىعى، ولاردىڭ بارلىعى دەرلىك بايقاۋعا مول دايىندىقپەن كەلگەندىگىن كورسەتتى. سايىسقا وڭىرلىك قولباسشىلىق اسكەري بولىمدەرىنەن 12 اسكەري قىزمەتشى قاتىستى. بايقاۋعا ۇلتتىق ۇلان باس قولباسشىلىعىنىڭ وفيسەرلەرى، ءتىلشى ماماندار مەن كورنەكتى ادەبيەت وكىلدەرى قازىلىق جاسادى جانە ءادىل-قازىلاردىڭ شەشىمى بويىنشا ۇزدىك دەپ تانىلعان 4 اسكەري قىزمەتشى جۇلدەلى ورىندارعا يە بولدى.
اتاپ ايتساق، وسى سايىستا توپ جارعان 5513 اسكەري ءبولىمىنىڭ اسكەري قىزمەتشىسى، تۇرىك ۇلتىنىڭ وكىلى كىشى سەرجانت كامران فازايروۆ 1 ورىنعا يە بولدى. 2 ورىنعا يە بولعان 6506 اسكەري ءبولىمىنىڭ اسكەري قىزمەتشىسى، وزبەك ۇلتىنىڭ وكىلى سەرجانت ەركينباي شامۋراتوۆ تا مەملەكەتتىك ءتىلدى ءبىلۋ دەڭگەيىنىڭ وسال ەمەستىگىن كورسەتتى. 3 ورىندى قانجىعاسىنا بايلاعان 5547 اسكەري ءبولىمىنىڭ اسكەري قىزمەتشىسى، ورىس ۇلتىنىڭ وكىلى كاپيتان ميحايل ميسكيۆ پەن 5572 اسكەري ءبولىمىنىڭ وفيسەرى، وزبەك ۇلتىنىڭ وكىلى مايور نۇرجان سادىقوۆ تا اتالعان بايقاۋدا ءسوز شەبەرلىگىن تانىتۋدا الدىنا جان سالماي، ماقال-ماتەل جارىسىندا كوزگە ءتۇسىپ، بارشا جينالعان قاۋىمدى ءبىر ءتانتى ەتىپ تاستادى. كورەرمەن كوزايىمىنا اينالعان سايىس جەڭىمپازدارى بايقاۋ قورىتىندىسى بويىنشا باعالى سىيلىقتارمەن جانە ۇلتتىق ۇلان «وڭتۇستىك» وڭىرلىك قولباسشىلىعى قولباسشىسىنىڭ گراموتاسىمەن ماراپاتتالدى.
وسىنداي كيەلى ۇلتىمىزدى ىدىراتپاي، تالاي تاريحي تاعدىردىڭ تارازىسىنان تاپجىلماي وتكەن مەملەكەتتىك ءتىل – قازاق ءتىلى قاشان دا ەلدىگىمىزدىڭ، بىرلىگىمىزدىڭ، ءھام ۇلى تاۋەلسىزدىگىمىزدى قورعاۋ جولىندا ۇلتىمىزدىڭ تەگەۋرىندى تەتىگى بولۋى ءتيىس!
ايدوس بايشاعىروۆ،
«وڭتۇستىك» وڭىرلىك قولباسشىلىعىنىڭ باسپا ءسوز قىزمەتى
