بۇعان دەيىن دوپينگ پايدالاندى دەپ ايىپتالعان قازاقستاندىق اۋىراتلەتتەردىڭ قاتارى تاعى ءبىر سپورتشىمەن تولىقتى. الەم جانە ازيا چەمپيونى، پەكين وليمپياداسىندا 4-ورىن العان ۆلاديمير سەدوۆتىڭ دا دوپينگ-سىناماسىنان WADA (بۇكىلالەمدىك دوپينگكە قارسى اگەنتتىك) ماماندارى تىيىم سالىنعان پرەپارات تاپتى، - دەپ حابارلايدى Qamshy.kz Sn.kz -كە سىلتەمە جاساپ.
ماماندار سەدوۆتىڭ پەكين وليمپياداسى كەزىندە تاپسىرعان دوپينگ-سىنامالارىن قايتا تەكسەرۋدەن وتكىزگەن. مۇنداي تالاپتى حالىقارالىق وليمپيادا كوميتەتى ۇسىنىپتى.
تەكسەرۋ ناتيجەسىندە سەدوۆتىڭ "ا" سىناماسىندا ستانوزولول زاتىنىڭ بار ەكەنى انىقتالعان. ءقازىر ونىڭ "ب" سىناماسى تەكسەرىلىپ جاتىر جانە ناتيجەسى كەلەسى اپتادا بەلگىلى بولادى.
ايتا كەتۋ كەرەك، حالىقارالىق اۋىر اتلەتيكا فەدەراسياسى سەدوۆتى 2006 جىلى سپورتتىق جارىستاردان 2 جىلعا شەتتەتكەن بولاتىن. 2008 جىلدىڭ مامارىندا ول ۇلكەن سپورتقا قايتا ورالدى.
"ماعان سەنۋ-سەنبەۋلەرىڭىز ءوز ەرىكتەرىڭىزدە، ءبىراق، مەن تىيىم سالىنعان زاتتاردى پايدالانباعانىما انت ەتەمىن. ءتىپتى، ەڭ العاش رەت مەنى سپورتتان شەتتەتكەن كەزدە دە مەن فەدەراسيا شەشىمىمەن كەلىسپەيتىنىمدى ءبىلدىردىم. مەن ءارقاشان ءادىل جەڭىپ، ءادىل جەڭىلگەن سپورتشىمىن. دوپينگتى ەشقاشان پايدالانعان ەمەسپىن"، - دەيدى سەدوۆتىڭ ءوزى.
ەستەرىڭىزگە سالايىق، بۇعان دەيىن WADA يليا يلين، زۋلفيا چينشانلو، ماييا مانەزا مەن سۆەتلانا پودوبەدوۆالاردى دوپينگ پايدالاندى دەپ، جارىستاردان ۋاقىتشا شەتتەتكەن بولاتىن. سول ساتتە ۆلاديمير سەدوۆ ءيليندى دە، ۇلتتىق قۇرامانىڭ باس باپكەرى الەكسەي ءنيدى دە ايىپتاعان ەدى. ءتىپتى، ءيليندى چەمپيون رەتىندە مويىندامايتىنىن دا ايتقان.
