قازاقستان رەسپۋبليكاسىنىڭ پرەمەر-مينيسترى كارىم ءماسىموۆ موڭعوليانىڭ بايان ولگەي ايماعىنا باردى، - دەپ حابارلايدى Qamshy.kz ۇكىمەت باسشىسىنىڭ تۆيتتەردەگى پاراقشاسىنا سىلتەمە جاساپ.

ساپار بارىسىندا قازاق دياسپوراسىمەن كەزدەسۋ، مۇراجاي مەن دراما تەاترىنا، ولگەيدەگى ورتا مەكتەپكە بارۋ جوسپارلانعان. 

سونداي-اق، ك.ءماسىموۆ موڭعوليادا وتەتىن XI اسەم سامميتىنە قاتىسادى.

اسەم (Asia - Europe Meeting، ASEM) - اشىق، رەسمي ەمەس، ايماقارالىق ديالوگتىك ۇدەرىس بولىپ تابىلادى، ونىڭ اياسىندا قاتىسۋشى ەلدەردىڭ ساياسات پەن قاۋىپسىزدىك، قارجى-ەكونوميكالىق جانە الەۋمەتتىك-مادەني سالالارداعى ىنتىماقتاستىعى جۇزەگە اسىرىلادى.

فورۋمنىڭ كۇن تارتىبىندە جاھاندىق قارجىلىق-ەكونوميكالىق داعدارىس سالدارىن جەڭۋ، قازىرگى جانە جاڭا قاۋىپ-قاتەرلەرگە قارسى ارەكەتتەر، جاپپاي قىرىپ-جويۋ قارۋلارىن تاراتپاۋ، ەنەرگيالىق قاۋىپسىزدىكتى قامتاماسىز ەتۋ، تۇراقتى دامۋ، كليماتتىڭ وزگەرۋى، ەكولوگيا، مادەني بايلانىستاردى ىلگەرلەتۋ جانە ت.ب. باعىتتار قامتىلعان.

قازىرگى كەزدە اسەم قۇرامىنا 53 مەملەكەت كىرەدى.