ءسىبىر جاراسى الماتى وبلىسىنا دا جەتتى. كەربۇلاق اۋدانىنىڭ ءۇش تۇرعىنى اتالعان ىندەتتى جۇقتىرعان، - دەپ حابارلايدى Qamshy.kz 31 ارناعا سىلتەمە جاساپ.
ناۋقاستارعا دەر كەزىندە شارا قولدانىپ، امان قالدى. بۇل ماسەلەنى ءوز باقىلاۋلارىنا العان اۋدان پروكۋرورلارى ءوڭىردىڭ ۆەتەريناريا سالاسىندا ءبىرقاتار زاڭ بۇزۋ فاكتىلەرىن انىقتادى.
انىقتالعانداي كەربۇلاق اۋدانىندا ءسىبىر جاراسىنا قارسى ەگىلەتىن ۆاكسينالار تەك جەرتولەدە ساقتالىپ كەلگەن. سوراقىسى سول، اتالعان پرەپاراتتاردىڭ قۇجات بويىنشا مالدارعا ەگىلدى دەپ ەسەپ بەرىلگەنىن پروكۋرورلار انىقتاعان. ءبىر عانا سارىبۇلاق اۋىلدىق وكرۋگىنە جۇرگىزىلگەن پروكۋرورلىق تەكسەرىس كەزىندە 30 مىڭنان استام ءسىبىر جاراسىنا قارسى ۆاكسينانىڭ قۇجات بويىنشا مالدارعا ەگىلىپ، ال شىن مانىندە تەك جورتولەدە ساقتالىپ تۇرعانى انىقتالدى.
باۋىرجان تويبايەۆ، الماتى وبلىسى پروكۋراتۋراسى باسقارما پروكۋرورى:
- ءسىبىر جاراسىنا قاتىستى 30 مىڭنان استام ۆاكسينا تابىلدى. بۇل ۆاكسينالار ۆەتەرينارلىق قۇجاتقا سايكەس 2015 جىلى قولدانىپ كەتكەن. الايدا، ايتىپ وتكەندەي ۆاكسينالار ءىس جۇزىندە مۇلدەم قولدانىلماعان.
ال كەربۇلاق اۋدانىندا ءسىبىر جاراسىن جۇقتىرعان ءۇش ادام قاراشوقى اۋىلىنىڭ تۇرعىندارى. ولارمەن قاتىناستا بولعاندارعا دا تولىقتاي تەكسەرىس جۇرگىزىلدى. دارىگەرلەردىڭ سوزىنشە ىندەتتى جۇقتىرعاندارمەن قارىم-قاتىناستا بولعان ادامداردىڭ دەنساۋلىقتارىنان ءسىبىر جاراسىنا قاتىستى ەشقانداي بەلگى انىقتالماپتى.
گۇلنارا ءجۇنىسوۆا، الماتى وبلىستىق دەنساۋلىق ساقتاۋ باسقارماسىنىڭ ءبولىم مەڭگەرۋشىسى:
- ءسىبىر جاراسىن جۇقتىرعان 3 اداممەن قاتىناستا بولعان 104 ادام تەكسەرىلدى. پروفيلاكتيكالىق ەمدىك شارالار قولداندى. قاراشوقى اۋىلىنىڭ تۇرعىندارى مالدى سويۋ كەزىندە ءسىبىر جاراسىن جۇقتىرعان. ءقازىر ولار تولىقتاي ەم قابىلداپ، جاعدايلارى جاقسى.
ءقازىر كەربۇلاق اۋدانىنىڭ پروكۋرورلارى ءىس جۇزىندە قولدانىلماعان ۆاكسينالارعا بايلانىستى زاڭ بۇزۋشىلىقتى تەرگەپ، قۇجاتتاردى سوتقا دايىنداپ جاتىر. ال ءسىبىر جاراسىن الماتى وبلىسىنان وزگە قاراعاندى جانە پاۆلودار وبلىسىنىڭ تۇرعىندارى دا اتالعان ىندەتتى جۇقتىرعان ەدى.
