شقو-دا ايماقتىق ب ا ق باسشىلارى مەن اكىمدىك وكىلدەرىنىڭ قاتىسۋىمەن كەزەكتى اقپاراتتىق كەڭەستىڭ وتىرىسى ءوتتى. كەڭەس بارىسىندا وبلىس اكىمىنىڭ ورىنباسارى جاقسىلىق ومار اۋدان اكىمدىكتەرى مەن وبلىستىق باسقارمالارعا الەۋمەتتىك جەلىلەردەگى رەسمي پاراقشالارىن جانداندىرۋدى تاپسىردى، - دەپ حابارلايدى Qamshy.kz.

جيىندا وبلىستىق باسقارمالار مەن اۋداندىق اكىمدىكتەردىڭ الەۋمەتتىك جەلى مەن ينتەرنەت رەسۋرستارداعى جۇمىستارى قاتاڭ سىنعا الىندى. اتاپ ايتار بولساق، ءبىرقاتار مەملەكەتتىك ورگاندار رەسمي سايت جانە الەۋمەتتىك جەلىدەگى پاراقشالارىن تەك كورسەتكىش ءۇشىن قولدانىپ كەلگەن.   

– ەگەر الەۋمەتتىك جەلىدەن پاراقشا اشساڭىزدار، وعان كۇندەلىكتى اقپارات سالىپ، جۇرگىزىپ وتىرۋ قاجەت. ءدال سول سياقتى رەسمي سايتپەن دە قارقىندى جۇمىس جاساڭىزدار. تەك كورسەتكىش ءۇشىن پاراقشا اشىپ قويعان جارامايدى. ءقازىر اقپاراتتىق اعىن زامانى بولعاندىقتان، تۇرعىنداردىڭ كوبى جاڭالىقتى الەۋمەتتىك جەلىدەن وقىپ، بولىسەدى، – دەدى جاقسىلىق ومار.

سونداي-اق، ايماق باسشىسىنىڭ ورىنباسارى ايتىپ وتكەندەي، اتالعان جۇمىستار جۇرگىزىلگەن جاعدايدا، مەملەكەتتىك ورگان جانە تۇرعىندار اراسىنداعى قارىم-قاتىناس نىعايا تۇسپەك.