ۇقك باسشىسى ۆلاديمير جۇماقانوۆ قاۋىپسىزدىك كەڭەسىنىڭ جيىنىندا الماتىداعى المالى اۋداندىق ءىىب مەن ۇقكد عيماراتىنا شابۋىلداعان ادام جايلى مالىمەتتى مەملەكەت باسشىسىنا بايانداپ بەردى، - دەپ حابارلايدى Qamshy.kz Tengrinews.kz -كە سىلتەمە جاساپ.
"كۇلىكبايەۆ رۋسلان الپىسباي ۇلى 1990 جىلى 11 ماۋسىمدا دۇنيەگە كەلگەن، قىزىلوردا وبلىسىنىڭ تۋماسى، بۇعان دەيىن بايقوڭىر قالاسىندا تۇرىپ كەلگەن. ۇيلەنگەن. قازىرگى ۋاقىتتا الماتى وبلىسى ىلە اۋدانى ىنتىماق اۋىلىندا تۇردى، ۇيالى تەلەفوندار ساتۋمەن اينالىسقان. 2010 جىلدىڭ 27 تامىزىندا شىمكەنت قالاسىنىڭ ەڭبەكشى اۋداندىق سوتى ونى ق ر قك-نىڭ 178-بابىنىڭ 2-بولىگى بويىنشا (زورلىق كورسەتە وتىرىپ توناۋ) سوتتاعان. 2012 جىلدىڭ 8 مامىرىندا قىزىلوردا وبلىستىق سوتى ونى 251-باپ (قارۋدى زاڭسىز ساتىپ الۋ جانە ساقتاۋ) بابى بويىنشا ەكى جىل 11 ايعا باس بوستاندىعىنان ايىرعان"، - دەپ حابارلادى جۇماقانوۆ.
"اباقتىدا، كولونيادا ول سالافيتتەرمەن بىرىكتى، ءقازىر ماسەلەنى قاراپ جاتىرمىز"، - دەدى ۇقك باسشىسى.
ەسكە سالايىق، 18 شىلدەدە 11.00-دە المالى اۋداندىق ىشكى ىستەر باسقارماسىنا شابۋىل جاسالىپ، ءبىر پوليسەي جاراقات العان بولاتىن، وسىدان كەيىن قىلمىسكەر اۆتومات قارۋىن الىپ، جاسىرىنعان ەدى. وسىعان دەيىن الماتىدا المالى اۋداندىق ءىىب ماڭى قورشاۋعا الىنعان بولاتىن. كۋاگەرلەردىڭ ايتۋىنشا، نيكولسكيي بازارىنىڭ اۋماعىندا اتىس بولىپ جاتىر. بۇل جەردە اۋداندىق پوليسيا باسقارماسى ورنالاسقان. سونىمەن قاتار، كۋاگەرلەر كورشى عيماراتتارداعى ادامداردى كەڭسەلەرىنەن شىعارماي وتىر ەكەن. تاياۋ ماڭدا ورنالاسقان كەڭسەدەگىلەردىڭ ايتۋىنشا، 10 رەت وق اتىلعان.
