18 شىلدە كۇنى الماتىدا بولعان تەراكتىدە قولعا ءتۇسىپ، كەيىن ءىىم ق. قاسىموۆ «پوليسياعا جاسالعان شابۋىلعا قاتىسى جوق تاكسيشى ەكەن» دەگەن ازامات تا كۇدىككە ءىلىنىپ وتىر. پوليسيا ۇستاعان ساتتە ونىڭ قالتاسىنان ەرجان قوشايەۆ دەگەن ازاماتتىڭ جەكە ءباس كۋالىگى مەن ءدىني مازمۇنداعى ءماتىن جازىلعان قاعاز تابىلعان،  - دەپ حابارلايدى Qamshy.kz 365info.kz – ke  سىلتەمە جاساپ.

پورتالدىڭ جازۋىنشا جۋرناليست سەرىك جولداسباي ەرجان قوشايەۆقا قاتىستى مالىمەتتەردى زەرتتەگەن. وسى سۇراققا جاۋاپ ىزدەگەن ەكەن. س. جولداسباي ءوزىنىڭ الەۋمەتتىك جەلىدەگى پاراقشاسىندا جۋرناليست «ەرجاننىڭ سالافيت بولۋىنا كىم كىنالى؟» دەگەن سۇراققا جاۋاپ ىزدەپتى.

– الماتىداعى قىرعىندا قولعا تۇسكەن ەكىنشى كۇدىكتى ەرجان قوشايەۆتىڭ ۆكونتاكتە الەۋمەتتىك جەلىسىندەگى پاراقشاسىنا كىرىپ، قاراپ شىقتىم. ول سوڭعى رەت ۆك-عا كەشە ساعات 14:18 كىرگەن ەكەن. اتالعان الەۋمەتتىك جەلىدە ەرجان ءبىرىڭعاي ءدىني مازمۇنداعى جازبالارمەن ءبولىسىپ وتىرعان، – دەيدى جۋرناليست.

الايدا، سەرىك جولداسبايدىڭ ايتۋىنشا، وسىدان ءۇش جىل بۇرىن عانا ەرجان قازاقشا حيت اندەردى تىڭداپ جۇرگەن، ونى ءاندى ورىنداعان انشىلەرگە «جارايسىڭ» دەپ ماقتاۋ ءسوز ايتقان ازاماتتاردىڭ ءبىرى بولعانىن بايقاۋعا بولادى.

– سونداي-اق ول ءبىرىڭعاي ءدىني ۋاعىزدار تىڭداماي نەمەسە وقىماي، جەلىدە ءارتۇرلى ويىندار ويناعان. ەڭ العاش رەت ەرجان 2014 جىلعى 24-مامىر كۇنى قۇراننان ءۇزىندى جاريالاعان ەكەن. الايدا، ول 2015 جىلدىڭ 27-ناۋرىزىنا دەيىن تاعى دا ءارتۇرلى ويىندار ويناعان سياقتى. ءدال وسى كۇننەن باستاپ، ءبىرىڭعاي ءدىني مازمۇنداعى جازبالاردى ءبولىسىپ، جاريالاي باستايدى، – دەيدى سەرىك جولداسباي.

ەڭ قىزىعى،ەرجان ۆك الەۋمەتتىك جەلىسىندە دارىن مۋباروۆتىڭ پاراقشاسىنا تىركەلىپ، ونىڭ ۋاعىزدارىن تىڭداپ جۇرگەن.

ءجۋرناليستىڭ سوزىنە قاراعاندا، ول دارىننىڭ «جاننات پەن توزاق» ۆيدەوۋاعىزىن بولىسكەن ەكەن.  

– دەمەك، ونىڭ سالافيلىك جولعا تۇسۋىنە دارىن مۋباروۆتىڭ ىقپالى باسىم بولىپ تۇر. سوندىقتان دا قۇزىرلى ورگان ءوزىن دارىننىڭ شاكىرتى سانايتىن كەز كەلگەن ادامدى ءقاۋىپتى ساناپ، ولاردى ارنايى تىركەۋگە الۋى كەرەك، – دەپ تۇيىندەيدى سەرىك جولداسباي.

سونداي-اق، پوليسيا قۇرىقتاعان كەزدە ەرجان قوشايەۆتىڭ قالتاسىنان ءدىني جازۋلار جازىلعان ءبىر جاپىراق قاعاز تابىلعان بولاتىن. بۇل ءوز كەزەگىندە الەۋمەتتىك جەلىدە كەڭىنەن تالقىلانىپ، كۇدىكتىنىڭ ءدىني اعىمداردىڭ بىرىنە قاتىسى بارى ايتىلعان ەدى. اتالعان ماسەلەگە ءدىنتانۋشىلار مەن يمامدار دا بەيجاي قاراماعانعا ۇقسايدى. 

سولاردىڭ ءبىرى — يمام يسمايىل سەيىتبەكوۆ كۇدىكتى ەرجان قوشايەۆتىڭ قالتاسىنان تابىلعان جازبا ءسالافي اعىمىنىڭ اقيداسى بويىنشا كاليمانىڭ 7 شارتى ەكەنىن ايتىپ وتىر. 

«بۇگىنگى الماتىداعى تەررورلىق ارەكەتتى جاساعاندار سالافيتتەر ەكەنى تاعى دالەلدەندى. سالافيتتەر وزدەرىن سۋدان تازا، سۇتتەن اقپىز، تەررورلىق ارەكەتتى جاسايتىندار تاكفيرلەر دەپ، تاكفيرلەردى جامانداۋعا كىرىسەدى. ال، ۇستالعان جىگىتتىڭ قالتاسىنان شىققان قاعازدا مۇحاممەد يبن ابدۋلۋاھھاب نەگىزىن قالاعان ۋاھھابي، ءسالافي اعىمىنىڭ اقيداسى بويىنشا. كاليمانىڭ 7 شارتى جازىلعان.

سالافيلەر سول شارتتارعا سايكەسپەگەن ادامدى مۇسىلمان ساناماي كاپىرگە، اداسقانعا شىعارادى.

پايعامبارىمىزدىڭ (س.ا.ۋ.) حاديسىندە مۇنداي 7 شارت جوق جانە ەشبىر جانعا يسلامدى قابىلدار كەزىندە مۇنداي تالاپ قويماعانىن بىلەمىز. ءاھلۋ سۇننەت سەنىمى بويىنشا ءلا ءيلاھا يللالاھ مۋحاممادۋر راسۋلۋللاھ دەگەن ادام مۇسىلمان سانالادى. سول قاعاز لاڭكەس جىگىتتىڭ ءسالافي ەكەنىنە ناقتى دالەل دەپ سانايمىن. بۇعان سالافيلەر نە ءۋاج ايتار ەكەن؟»، — دەيدى يمام يسمايىل سەيىتبەكوۆ ءوز سوزىندە.

كۇدىكتى قولعا تۇسكەن كەزدە halyknews.kz سايتى ونىڭ قالتاسىنان تابىلعان قۇجاتتىڭ جالعان ەكەندىگى تۋرالى مالىمەت تاراتقانىن ەستەرىڭىزگە سالامىز.