سيريادا تەررورلىق توپقا مۇشەلىك ەتكەن مارات ءومىرزاقوۆقا قاتىستى سوت ۇكىمى شىقتى. تەرىس اعىمدى ۇستانعان سولتۇستىك قازاقستان وبلىسىنىڭ تۇرعىنى 7 جىلعا باس بوستاندىعىنان ايىرىلدى، - دەپ حابارلايدى  Qamshy.kz استانا ارناسىنا سىلتەمە جاساپ.

پەتروپاۆل قالالىق سوتى بەرگەن مالىمەتكە سايكەس، مارات ءومىرزاقوۆ 2012 جىلى سيرياعا زاڭسىز جولمەن وتكەن. ول ۇكىمەتكە قارسى تەررورلىق اكتىلەردى ۇيىمداستىرعان «ال-مۋحادجەرين ۆال-انسار» اتتى توپقا مۇشەلىك ەتكەن. سۋديانىڭ ايتۋىنشا، سوتتالعان ازامات تەررورلىق اكتىلەرگە تىكەلەي قاتىسپاسا دا، اتالعان ۇيىمنىڭ شەكاراسىن كۇزەتىپ، بارلاۋ جۇمىسىن جۇرگىزگەن. 2015 جىلى تۇركياعا جاسىرىن جولمەن ءوتىپ، وسى ەلدىڭ ميگراسيالىق زاڭىن بۇزعانى ءۇشىن قۇرىقتالعان بولاتىن. كەيىن 2016 جىلدىڭ 14 قاڭتارىندا قازاقستانعا دەپورتاسيالاندى.

"1969 جىلعى ءومىرزاقوۆ مارات ەسكەندىرۇلىن قازاقستان رەسپۋبليكاسى قىلمىستىق كودەكسى 233-بابىنىڭ 2ء-بولىمى بويىنشا كىنالى دەپ تابىلىپ، 7 جىلعا باس بوستاندىعىنان ايىرىلسىن. سوتتالعان ازامات جازاسىن جالپى تارتىپتەگى كولونيادا وتەسىن. دايەك زاتتار رەتىندە قولدانىلعان ديسكىلەر مەن گازەتتىڭ كوشىرمەلەرى قىلمىستىق ءىستىڭ ىشىندە ساقتالسىن"، - دەپ وقىدى پەتروپاۆل قالالىق سوتىنىڭ سۋدياسى ميحايل گۋسيەۆ.

ال ءومىرزاقوۆتىڭ قورعاۋشىلارى سوت ۇكىمىمەن كەلىسپەيتىندىكتەرىن ايتادى. ادۆوكاتتىڭ پايىمداۋىنشا، سوتتالعان ازامات سيرياعا مۇلدەم اياق باسپاعان. جاقتاۋشى تاراپ مارات ءومىرزاقوۆقا تاعىلعان كىنا نەگىزسىز دەپ وتىر.

-كۋاگەرلەر رەتىندە سوتتالىپ كەتكەن كىسىلەردى العان. باسقا دالەلدەمەلەرى جوق. ودان باسقا قىلمىستىق ىستە مارات ءومىرزاقوۆتىڭ قولىندا يسلام ءدىنىن ناسيحاتتايتىن ماتەريالدار تابىلدى دەلىنگەن. ءبىراق بۇل باسىلىمدار زاڭسىز دەپ تانىلماعان. ءبىز سوتتىڭ ۇكىمىمەن كەلىسپەيمىز. اپەللياسيالىق سوتقا ارىز جازامىز، - دەيدى  مارات ءومىرزاقوۆتىڭ ادۆوكاتى قۋاندىق مۇحامەدياروۆ.