31 ارنادا  تاڭعاجايىپ «ەرتۇعرىل» تەلەحيكاياسىنىڭ ەكىنشى ماۋسىمى باستالادى. بۇل تەلەحيكايا كورەرمەندى تاريح قويناۋىنا سۇڭگىتىپ، وسمان يمپەرياسىنىڭ قالىپتاسۋ كەزەڭى، ۇلى كوش، جاڭا جەرلەردى جاۋلاپ الۋ، تاريحي جورىقتار جانە عاجايىپ عاشىقتىق حيكايالارىنا كۋا ەتەدى. 

تۇركيانىڭ وزىندە تەلەحيكايانىڭ ءبىرىنشى ءبولىمى بارلىق تەلەارنالاردى جارىپ، رەيتينگتىڭ كوشىن باستايدى. تۇركيانىڭ الەۋمەتتىك جەلى قولدانۋشىلارى ونى «تاقتار ويىنى» تەلەحيكاياسىمەن سالىستىرعان. كارتينادا ءى وسماننىڭ اكەسى ەرتۇعرىلدىڭ ءومىرى جانە وسمان يمپەرياسىنىڭ قۇرىلۋ تاريحى باياندالادى. ەرتۇعرىل قايى تايپاسىنىڭ تۇرىك-وعىز رۋىنىڭ كوسەمى. ول رۋم سەلجۇقتارىنا ۆيزانتيالىقتارعا قارسى كۇرەستە كومەكتەسۋ ءۇشىن 400 قولمەن  مەرۆەدەن (تۇركىمەنستان) انادولىعا كەلەدى. وسىدان باستاپ وقيعالار جەلىسى ءوربىپ، وسمان يمپەرياسىنىڭ قۇرىلۋىنا سەبەپ بولادى.

ايتقانداي، وسى جىلدىڭ تامىز ايىندا ەرتۇعرىل تۋرالى تەلەحيكايانىڭ ستامبۋلداعى تۇسىرىلىمىنە قازاقستاندىق  Nomad Stunts كاسكادەرلەر توبى دا قاتىسادى. ول  تۇرىكتىڭ Tekden Film كينوكومپانياسىمەن سەرىكتەستىكتى وسىدان ەكى جىل بۇرىن باستاعان. ول كەزدە قازاقستاندىق كاسكادەرلەردى كۇردەلى تريۋكتەردى ورىنداپ، اكتەرلەردى تەلەحيكاياعا دايىنداۋ ءۇشىن شاقىرعان بولاتىن. ال بيىل، توپ جەتەكشىسى جايداربەك كۇنعوجينوۆتىڭ ايتۋىنشا، «ەرتۇعرىلدىڭ» پروديۋسەرلەرى بۇرىنعىدان دا قيىن ءارى ءقاۋىپتى ساحنالىق كورىنىستەردى بەينەلىگىسى كەلەدى ەكەن.  

- «ەرتۇعرىلدىڭ» جالعاسى ستامبۋلدا تۇسىرىلەدى، - دەيدى جايداربەك كۇنعوجينوۆ. – ءبىز بيىل كوپتەگەن ۇرىس كورىنىستەرىن قازاقستاندا تۇسىرگىمىز كەلگەن. الايدا تۇركيادا ەكىنشى ءفيلمنىڭ ءتۇسىرىلىمى باستالىپ كەتكەندىكتەن ۇلگەرە المادىق. ءبىراق ءبىزدىڭ ورتاق جوسپارىمىز بار. كەلەسى جىلى «ەرتۇعرىلدىڭ» ۇرىس كورىنىستەرىن قازاقستاندا تۇسىرەمىز دەپ ويلاپ وتىرمىز. پروديۋسەر تۇسىرىلىمگە ارنالعان جەرلەردى كوردى. مەن وعان تاۋدىڭ، دالانىڭ سۋرەتتەرىن كورسەتتىم. بىردەن ۇناتىپ قالدى.

تەلەحيكايانىڭ پروديۋسەرى ءارى سەناريستى مەحمەتتىڭ بوزداگتىڭ ايتۋىنشا، ەرتۇعرىل بارلىق يمپەريالىق كۇشپەن باسىپ الىنعانداردى انادولىعا جيناپ، 400 شاتىرلى قالا تۇرعىزعان. ەرتۇعرىل ارمانىنا جەتەمىن دەپ ءجۇرىپ، الەمگە جاڭا مادەنيەت سىيلادى. ول الەمدى وزگەرتكەن مەملەكەتتىڭ ىرگەتاسىن قالادى. ال ءبىز ءوز حيكايامىزدا حالىقتىڭ تاعدىرىن وزگەرتكەن جاننىڭ قايسار مىنەزى، سيقىرلى ماحابباتى جانە ادىلەتكە جەگەن ىڭكارلىگى تۋرالى ءسوز ەتەمىز»، - دەيدى رەجيسسەر. 

ايتا كەتەيىك، تەلەحيكايانىڭ تۇسىرىلىمىنە دايىندىق كەزەڭى ءبىر جىلعاك سوزىلدى. «بۇل ۋاقىت ىشىندە ءبىز سەنارييدى، دەكوراسيالاردى، كوستيۋمدەردى جانە باسقا دا قاجەتتىلىكتەرىمىزدى دايىندادىق. شەتەلدىك ات اكروباتتارىنىڭ، ەكشننىڭ، بي توپتارىنىڭ جانە اسكەري جاساقتاردىڭ كومەگىمەن 13ء-شى عاسىرعا سايكەس كەلەتىن كورىنىس جاساپ، ءتۇسىرىلىمدى ءوز كەستەمىزگە ىڭعايلادىق، - دەيدى مەحمەت بوزداگ.  

 تەلەحيكايا قامتىلعان اۋقىمى جاعىنان ەڭ ۇزدىك گولليۆۋدتىق ەپوپەيالاردان قالىسپايدى. «ەرتۇعرىلدا» نەگىزگى 30 كەيىپكەرلەردەن وزگە قوسىمشا اكتەرلەر بار. ولاردىڭ سانى مىڭعا جۋىقتايدى. ءتۇسىرىلىم توبىنىڭ ءوزى 250 ادامنان تۇرادى. سول كەزەڭگە سايكەس كەلەتىن ەكى شوقىنىڭ دەكوراسياسىن، سونىمەن بىرگە تۇسىرىلىمگە ارنالعان كوستيۋمدەردىڭ بارلىعىن Riva جانە Kundura سياقتى ءىرى فابريكالار دايىنداعان. سونىمەن قاتار، كوستيۋمدەر مەن دەكوراسيالار ءۇشىن 4 مىڭ مەتر ماتا قولدانىلعان. كوپتەگەن كوستيۋمدەر مەن اشەكەيلەر فولكلورلىق انسامبلدەر قولداناتىن اكسەسسۋارلاردان الىنعان. ونىڭ بارلىعىن تۇركيانىڭ ماڭىنان جيناعان. ال اعاش بۇيىمداردىڭ بارلىعى قولدان جاسالعان. ونىڭ ۇستىنە، تەك قانا دەكوراسيا مەن كيىم-كەشەك جاساۋعا 60 ادام جۇمىلدىرىلعان.

ءبىزدىڭ  Nomad توبىمىز تەلەحيكايا ءۇشىن تۇسىرىلگەن 25 اتتى تۇساۋلادى. قاراقۇيرىقتار، تۇيەلەر، قويلار، ەشكىلەر، بۇلبۇلدار جانە شىلدەر – تەلەحيكايادان سىزدەر كورەتىن 50-گە جۋىق جان-جانۋارلاردىڭ ءبارى اكتەرلىك كاستينگ ارقىلى تاڭدالعان. ءتۇسىرىلىم كەزىندە جانىمىزدا مال دارىگەرى بولدى. ال تەاتر اكتەرلەرى ءۇشىن ءتۇسىرىلىم الاڭىندا جەدەل جاردەم كولىگى  ۇنەمى كۇزەتتە تۇردى.

Riva فابريكاسى جالپى سانى 40 مىڭ شارشى مەترلىك شاتىردى جاساپ شىعاردى. ونىڭ ىشىندە 600 شارشى مەترلىك سۇلەيمەن شاحتىڭ شاتىرى، سونىمەن بىرگە ەرتۇعرىلدىڭ كوشىن قۇرايتىن، 13ء-شى عاسىرعا چسايكەس كەلەتىن باسقا دا 35 شاتىر بار.

ال Kundura فابريكاسى اۋماعى 11 مىڭ شارشى مەتر بولاتىن  ءبۇتىن سيريالىق قالا – الەپپونى (حالەپ) تۇرعىزدى.  ونىڭ ىشىندە، الەپپو سارايى مەن ونىڭ قوناق بولمەلەرىن، سونىمەن قاتار سەلجۇقتاردىڭ قوسىن، تامپليەر ساربازدارىنىڭ بەكىنىسىن، ونىڭ زالدارى مەن بولمەلەرىن سول ءداۋىردىڭ قۇرىلىس نىساندارىنىڭ اينىماعان كوشىرمەسىن جاساپ شىعاردى. 

سوندىقتان «ەرتۇعرىلدى» - تەك قانا تۇرىك ەمەس، سونداي-اق الەم كينەماتوگرافياسى تاريحىنداعى ەڭ اۋقىمدى جوبالاردىڭ ءبىرى دەۋگە بولادى. 

31 ارنادان تاماشالاڭىزدار! باعدارلامانى وتكىزىپ الماڭىزدار!