شىعىس قازاقستاننىڭ 5 كونە ەسكەرتكىشتەرىندە ەلىمىزدىڭ تانىمال عالىمدارىنىڭ جەتەكشىلىگىمەن ارحەولوگيالىق قازبا جۇمىستارى باستالدى. قازىرگى تاڭدا تاريحي جەرلەردى تونوپلانمەن ءتۇسىرىپ، اەروفوتو ءتۇسىرىلىم جاساۋدا. بارلىق جۇمىستار ارحەولوگيا سالاسى بويىنشا   عىلىمي-زەرتتەۋ جۇمىستارىنىڭ دامۋ جوسپارىنىڭ ورىندالۋ بارىسىمەن تانىستى، - دەپ حابارلايدى Qamshy.kz.

جوسپارعا سايكەس ارحەولوگيالىق ەكسپەديسيالار كاتونقاراعاي اۋدانىنداعى بەرەل قورعانىندا، زايسان اۋدانىنداعى شىلىكتى جازىعىندا، ۇلان اۋدانىنداعى ابلايكيت ءقامال-موناستىرى، ابايداعى قىرىقۇڭگىر جانە تارباعاتاي اۋدانىنداعى ەلەكە سازى ەسكەرتكىشتەرىندە جۇرگىزىلىپ جاتىر.

 وسى جولعى قازبا جۇمىستارىنا 10 مەملەكەتتەن 20 ماماننىڭ تارتىلۋ ونىڭ اۋقىمدىلىعىن كورسەتەدى. اتاپ ايتساق، زەرتتەۋ جۇمىستارىنا جاپونيانىڭ پالەوگەنەتيكتەرى، ۇلىبريتانيا، ۆەنگريا، تۇكيا مەن جۇڭگو پروفەسسورلارى مەن عالىمدارى، يتاليا مەن بەلگيانىڭ گەوارحەولوگتارى، رەسەي عىلىم اكادەمياسىنىڭ وكىلدەرى قاتىسادى.

– قازاقستان تاۋەلسىزدىگىنىڭ 25 جىلدىعىنا وراي ارحەولوگياىق دامۋ جوسپارىن جۇزەگە اسىرۋىمىز وتە ورىندى، – دەدى دانيال احمەتوۆ. – ەڭ باستىسى ءبىز ءوزىمىزدىڭ عالىمدارىمىزبەن عانا شەكتەمەي، الەم تانىعان ارحەولوگتاردى شاقىرىپ وتىرمىز. بارلىق جەردە سولاي بولعان. مىسىرداعى اتاقتى حەوپس پيراميداسىن اشقان كەزدە ارحەولوگيا سالاسىنىڭ بارلىق ۇزدىكتەرى جينالعان بولاتىن. ءبىزدىڭ بەرەل، شىلىكتى قورعاندارىمىز، ابلايكيت كامال-موناستىرى الەمدىك عالىمداردىڭ نازارىنا ءتيىستى.  

تاريح عىلىمدارىنىڭ دوكتورى، پروفەسسور زەينوللا ساماشيەۆتىڭ ايتۋىنشا، زەرتتەۋ جۇمىستارى جوعارى دەڭگەيگە كوتەرىلدى، ال شەتەلدىك مامانداردىڭ تارتىلۋى ەكى جاققا دا قولايلى.