بۇگىن ەل الماتىدا ورىن العان تەراكت قۇرباندارىن اقتىق ساپارعا شىعارىپ سالىپ، ازا تۇتىپ جاتىر. حالىقتىڭ تىنىشتىعى ءۇشىن كۇرەسكەن جاس-جاس جىگىتتەر ءبىر-اق ساتتە لاڭكەستىڭ قولىنان قازا تاپتى. بۇل تەك مارقۇمداردىڭ وتباسىنا تۇسكەن اۋىرتپالىق ەمەس، قازاقستان حالقىنىڭ قايعىسى. رەسمي تۇردە ەلدە قارالى كۇن جاريالانباعانىمەن، حالىقتىڭ كوبى قايعىلى كوڭىل-كۇيدە. بولعان جايتتان ءالى ەسىن جيا الار ەمەس.
الايدا، بۇل قارالى حابار، قايعىلى كوڭىل-كۇي پرەمەر-مينيستر كارىم ماسىموۆكە ونشا اسەر ەتە قويماعان سەكىلدى. الماتىعا بارىپ، قارالى وتباسىعا كوڭىل ايتۋدىڭ ورنىنا كارىم قاجىمقان ۇلى سەرىلىك قۇرعان جىگىتتىك شاعىن ەسكە الىپ، شالقىپ وتىر. ۇكىمەت باسشىسى ءوزىنىڭ Instagram-پاراقشاسىنا جاستىق شاعىندا تۇسكەن بەينەجازبانى جۇكتەپ، كوپشىلىكپەن ءبولىستى. ارينە، پرەمەردىڭ ىشىنە كىرىپ-شىققان جوقپىز، قايعىرسا قايعىرىپ-اق جۇرگەن شىعار. ءبىراق، ءدال بۇگىن، ياعني جانازا شىعىپ جاتقان كەزدە كوڭىل كوتەرمەي-اق قويسا بولاتىن ەدى عوي؟!
مۇنى اۋىلداعى "سارسەنباي"، الدە "بەيسەنبايلار" جاساپ جاتسا ۇندەمەس ەدىك. ءتىپتى، بىلمەس تە ەدىك. ال، ءبۇتىن ءبىر مەملەكەتتىڭ ۇكىمەتىن باسقارىپ وتىرعان تۇلعانىڭ وسىناۋ ارەكەتى كوڭىلگە ءتۇرلى وي سالىپ وتىر.
ماسىموۆكە رەنىشىن، الەۋمەتتىك جەلىلەردە جەتكىزىپ جاتقاندار از ەمەس. سولاردىڭ ءبىرى تانىمال جۋرناليست - دينا ەلگەزەك.
«بۇگىن قازاق ءۇشىن قارالى كۇن... قاپىدا قازا تاپقان ءۇش ارىسىن ەل اقتىق ساپارعا شىعارىپ سالدى... ال، پرەمەر~مينيستر كارىم ءماسىموۆ بولسا بۇگىن سەرىلىك قۇرعان جىگىتتىك بال شاعىن ەسكە الىپ شالقىپ وتىر... سوناۋ ستۋدەنتتىك كەزەڭنەن ساقتالىپ قالعان بەينەجازبانى كوپپەن ءبولىسىپ، كوڭىل بىرلەدى... قولدان ساياساتكەر جاساۋدىڭ كۋلميناسيالىق ءساتى وسى شىعار... بۇدان ارى كەتسە، نە بولارىن بولجاۋ قيىن... ءيا، مولىقبايدىڭ ۇرپاعى ەكەنى راس بولسا، وتكەنگە ەمىرەنىپ ەمەس، ءۇش بوزداقتى شىعارىپ سالعان ازالى توپتىڭ ورتاسىندا كۇڭىرەنىپ تۇرار ەدى-اۋ...»، - دەيدى ول.
ەستەرىڭىزگە سالايىق، الماتىداعى لاڭكەستىك وقيعا 18 شىلدە كۇنى تاڭەرتەڭ ورىن العان بولاتىن. سۋىق قارۋلانعان ەر ازامات قالاداعى پوليسيا بولىمشەلەرىنىڭ بىرىنە كەلىپ، بىرنەشە قىزمەتكەرى اتىپ سالعان. لاڭكەس مۇنىمەن توقتاماي، كوشەدەگى بەيبىت تۇرعىندارعا وق جاۋدىرىپتى. سالدارىنان 4 پوليسەي مەن 2 قاراپايى ازامات كوز جۇمدى. بۇگىن الماتى مەن جامبىل وبلىستارىندا ولاردى جەرلەۋ راسىمدەرى ءوتتى.
