ماۋسىمنىڭ 5ء-ى قازاقستاندى دۇرلىكتىرگەن اقتوبەدەگى قارۋ-جاراق دۇكەندەرى مەن اسكەري بولىمگە شابۋىلدان باس تارتقان ءۇش ادام كەشە «قىلمىس تۋرالى حابارلامادى» دەگەن ايىپپەن ەكى ايعا قامالدى. ازاتتىق ءتىلشىسى تەرگەلىپ جاتقانداردىڭ ءبىرى رۋستام گاسايەۆ جايلى زەرتتەپ كوردى، - دە پ حابارلايدى Qamshy.kz. 

شىلدەنىڭ 20-سى كۇنى اقتوبە وبلىستىق سوتىنىڭ باسپا ءسوز قىزمەتى ماۋسىمنىڭ 5ء-سى كۇنى 26 ادام جاساعان قارۋلى شابۋىلعا قاتىستى تاعى ءۇش كۇدىكتىنىڭ ەكى ايعا قامالعانىن حابارلادى.

سوت سانكسياسىمەن تەرگەۋ يزولياتورىنا قامالعان ءۇش ازامات- رۋستام گاسايەۆ، اكىمجان كۋسيموۆ پەن قوجامۇرات ساعىنتايەۆ. ۇشەۋىنىڭ جاستارى دا شامالاس - قىرىقتىڭ ۇستىندە.

ازاتتىق اقتوبەدەگى شابۋىلعا قاتىستى ماقالالار تىزبەگىن جالعاستىرا بەرمەك. وسى جولى ازاتتىق ءتىلشىسى رۋستام گاسايەۆ جايلى زەرتتەپ كوردى. تۋىستارى ونىڭ ماۋسىمنىڭ 5ء-سى كۇنى «شابۋىل جاساۋعا داستارقان باسىندا قارسى شىققانىن» ايتادى.

اقتوبە وبلىستىق سوتى تاراتقان مالىمەتكە قاراعاندا، اقتوبە قالاسىنىڭ تۇرعىنى رۋستام گاسايەۆقا قازاقستان قىلمىستىق كودەكسىنىڭ 434-بابى بويىنشا ايىپ تاعىلعان. ياعني، 42 جاستاعى رۋستام گاسايەۆ «قىلمىس تۋرالى حابارلامادى» دەپ ايىپتالىپ وتىر.

قىلمىستىق كودەكستىڭ 434-بابىندا «دايىندالىپ جاتقانى نەمەسە جاسالعانى انىق بەلگiلi اسا اۋىر قىلمىس نە دايىندالىپ جاتقانى انىق بەلگىلى تەرروريزم اكتىسى تۋرالى حابارلاماۋ» قاراستىرىلعان. «التى مىڭ ايلىق ەسەپتىك كورسەتكiشكە دەيiنگi مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە التى جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالانادى».

رۋستام گاسايەۆتىڭ 80 جاستاعى قارت اناسى گۇلارا جەكسەن قىزى، اپكەسى ءماريام جانە ءىنىسى يسكاندەر اقتوبەدەن 25 شاقىرىمداي جەردەگى مارجانبۇلاق اۋىلىندا تۇرادى.

ءاتى-جونىن اتاعىسى كەلمەگەن اۋىلداستارى گاسايەۆتاردى «ءدىن جولىن ۇستاناتىن، ەشكىمگە زيانى جوق جىگىتتەر» دەپ سيپاتتادى. ولاردىڭ سوزدەرىنە قاراعاندا، گاسايەۆتىڭ اناسى گۇلارا جەكسەن قىزى – اۋىل بەلسەندىسىنىڭ ءبىرى. تۇرعىندار «كوشەلەرگە سۋ مەن جارىق سول كىسىنىڭ بەلسەندىلىگى ارقاسىندا تارتىلعان» دەيدى. 

اقتوبەدەگى شابۋىل تۋرالى سۋىق حاباردى ەستىگەن كۇنى ەسىنەن تانىپ قالعان قارت انا ازاتتىق ءتىلشىسى بارعاندا ءالى سىرقاتتانىپ جاتىر ەكەن.

- كۇيەۋىمنىڭ ۇلتى شەشەن بولاتىن. ۇزاق جىل شەشەنستان استاناسى گروزنىيدا تۇردىق. سوعىس باستالعاندا (1991 جىلى) قوبداداعى توركىندەرىمدى ساعالاپ، قازاقستانعا كوشتىك. كۇيەۋىم شەشەنستاندا بومبا جارىلعاندا جارالانىپ، سودان وڭالمادى - دەيدى اۋىلداستارى «كلارا اپا» اتاپ كەتكەن گۇلارا جەكسەن قىزى.

زەينەتكەر ماسەلەنىڭ ءمان-جايى قازاقستان پرەزيدەنتى نۇرسۇلتان نازاربايەۆتىڭ قۇلاعىنا جەتسە، ۇلىنىڭ جازاسى جەڭىلدەيتىنىنە سەنەتىنىن ايتىپ، ازاتتىق تىلشىسىنەن انالىق تىلەگىن جەتكىزۋدى ءوتىندى.

ال اپكەسى ءماريام گاسايەۆانىڭ سوزىنە قاراعاندا، ەكى بالانىڭ اكەسى (ۇلى – 13، قىزى 6 جاستا) رۋستام وتباسىمەن بىرگە اقتوبەدە تۇرادى. قارۋلى شابۋىل بولاتىن كۇنى ول ۇيىنەن «قوناققا بارامىن» دەپ شىعىپ كەتكەن.

- داستارقان باسىندا قارۋلى شابۋىل تۋرالى اڭگىمە قوزعالعاندا رۋستام مەن وزگە دە ەرەسەكتەۋ جىگىتتەر بىردەن قارسىلىق بىلدىرگەن. جاستارعا باسۋ ايتقان. سوعان اشۋلانعان جاستار جاعى داستارقان باسىنان تۇرىپ كەتەدى. ال بۇلار بولسا، الاڭسىز قالا بەرگەن، - دەيدى ول.

ول ءىنىسىن اقتوبەدەگى پاتەرىنەن پوليسيا «ماۋسىمنىڭ 6-سى، تاڭعى ساعات 8-دەر شاماسىندا الىپ كەتكەنىن» ايتتى. سودان بەرى تۋىستارى ونىمەن ءبىر-اق رەت كەزدەسكەن. ءماريامنىڭ ايتۋىنشا، العاشىندا «ماسەلەنىڭ ءمان-جايى انىقتالعانشا ۇستايمىز» دەگەن ۇقك دەپارتامەنتى وكىلدەرى كەزدەسۋگە رۇقسات بەرمەگەن.

ول ءىنىسىنىڭ «5-رازريادتى (جوعارى بىلىكتى) كونديتەر ەكەنىن، سوڭعى جىلدارى كاسىبى بويىنشا جۇمىس تاپپاي، بازاردا قالتا تەلەفونىن ساتقانىن» ايتتى. رۋستام گاسايەۆ جۇبايىمەن بىرگە اقتوبەدە پاتەر جالداپ تۇرعان. ىنىلەرى سەكىلدى ءدىن جولىن ۇستاناتىن ءماريام گاسايەۆا رۋستامنىڭ اقتالىپ شىعاتىنىنا اسا سەنىڭكىرەمەيدى.

- تەرگەۋشىنىڭ سوزىنەن ۇققانىم - ادۆوكات جالداۋدىڭ پايداسى بولمايتىن سياقتى. ءارى وعان اقشامىز دا جوق. مەملەكەت ەسەبىنەن تەگىن ادۆوكات بەرىلدى. قايدام... ولار پروسەستى باستاپ جىبەردى. ەندى كىنالىلەردى جازالاۋ عانا قالعان سياقتى، - دەيدى ءماريام.

2016 جىلى ماۋسىمنىڭ 5ء-ى كۇنى اقتوبەدە 26 ادام ەكى قارۋ-جاراق دۇكەنىنە شابۋىلداپ، ۇلتتىق گۆارديانىڭ اسكەري ءبولىمىن باسىپ الۋعا تىرىسقان. شابۋىل مەن اتىستان رەسمي مالىمەت بويىنشا 7 ادام قازا تاۋىپ، 40 شاقتى ادام جارالانعان. التى كۇنگە سوزىلعان ارنايى وپەراسيادا شابۋىلعا كۇدىكتى دەلىنگەن 18 ادامنىڭ كوزى جويىلىپ، بىرنەشە ادام ۇستالعان ەدى.