ولجاس سۇلەيمەنوۆ، بيبىگۇل تولەگەنوۆا، توقتار اۋباكىروۆ، مۇرات اۋەزوۆ، ءاسانالى ءاشىموۆ، مۇحتار شاحانوۆ، دۋلات يسابەكوۆ، يگور ۆوۆنيانكو، وراز جاندوسوۆ، روزا رىمبايەۆا، تامارا كالەيەۆا، ەرمەك تۇرسىنوۆ مەملەكەت باسشىسىنى حات جازىپ، ودان قازاقستان جۋرناليستەر وداعىنىڭ ءتوراعاسى سەيىتقازى ماتايەۆقا قاتىستى قوزعالعان قىلمىستىق ءىستىڭ وبەكتيۆتى تۇردە قارالىپ، ءادىل شەشىم شىعۋىنا ىقپال ەتۋدى سۇرادى، - دەپ حابارلايدى Qamshy.kz قازتاگ-قا سىلتەمە جاساپ.
«ءبىزدىڭ تەرگەۋ ورگاندارى، پروكۋراتۋرا مەن سوت قىزمەتىنە باعا بەرۋ ويىمىز جوق، ءبىزدىڭ ماقساتىمىز – سىزگە قۇقىققورعاۋ ورگاندارىنىڭ قولىمەن 25 جىل بۇرىن باسقا دا تۇلعالارمەن بىرگە قازاقستان تاۋەلسىزدىگىنىڭ باستاۋىندا بولعان ءسىزدىڭ ءبىرىنشى باسپا ءسوز حاتشىڭىزدىڭ اتىنا كىر كەلتىرىلىپ جاتقانىن جەتكىزۋ»، - دەلىنگەن حاتتا.
حاتقا قول قويعاندار س. ماتايەۆ «ۇلتتىق باسپا ءسوز كلۋبىن» ەلباسىنىڭ جەكە تاپسىرماسىمەن قۇرعانىن، قازاقستان جۋرناليستەر وداعىنىڭ جۇمىسىن جانداندىرعانىن، ونىڭ فيليالدارى بارلىق وڭىردە جۇمىس ىستەپ تۇرعانىن، استانادا رەسپۋبليكالىق جۋرناليستەر ءۇيىن سالعانىن، قازتاگ حالىقارالىق اقپارات اگەنتتىگىن ۇيىمداستىرعانىن، ونىڭ قىرعىزستان، تاجىكستان، وزبەكستان، اۋعانستان، جۇڭگو مەن يراندا دا جەلىلەرى بارىن العا تارتقان.
«كەز-كەلگەن ادامنىڭ ومىرىندە تابىس تا، قاتەلىكتەر دە بولادى. ءومىر سونداي، ادامنىڭ تابيعاتى سونداي. ءبىزدىڭ مىندەتىمىز – وسى جاعدايدا سەيىتقازى ماتايەۆ پەن ونىڭ وتباسىن قولداۋ. ول وزىنە تاعىلىپ وتىرعان ايىپتارمەن كەلىسپەيدى، ءوزىنىڭ ابىرويىن سوتتا قورعاۋعا دايىن. ءبىز ءىستىڭ وبەكتيۆتى تۇردە قارالىپ، سوتتا ءادىل شەشىم شىعۋىنا ىقپال ەتۋدى سۇراپ حات جازىپ وتىرمىز. ءبىز ونىڭ ءوزىنىڭ كىناسىزدىگىن دالەلدەپ شىعاتىنىنا كۇماندانبايمىز. سوندىقتان، سىزدەن ءسىزدىڭ قىزمەتتەگى ادىلدىگىڭىز بەن بىتىمگەرلىك قاسيەتتەرىڭىزدى ەسكەرە وتىرىپ، اتالعان ءىستىڭ بارىسىن جەكە باقىلاۋعا الۋىڭىزدى ءوتىنىپ سۇرايمىز»، دەيدى حاتقا قول قويعاندار.
جەمقورلىققا قارسى ءىس-قيمىل جونىندەگى ۇلتتىق بيۋرو قوزعاعان قىلمىستىق ءىس بويىنشا تەرگەلىپ جاتقان س. ماتايەۆتى ءۇي قاماقتا ۇستاۋ مەرزىمى 22 شىلدەگە دەيىن ۇزارتىلعان ەدى.
وسى ءىس باستالعاندا جۋرناليستەر قاۋىمى باس پروكۋرور اتىنا حات تا جازعان بولاتىن.
