بۇلار قارۋ كەزەنىپ، وڭدى-سولدى نەگە وق اتىپ ءجۇر؟

مەنىڭشە، بۇعان ەڭ الدىمەن جاستار كەلەشەگىنە سەنىمدى بولۋى ءۇشىن لايىقتى جۇمىس، باسپانا جانە باسقاسىمەن قامتاماسىز ەتە الماعان مەملەكەتىمىز كىنالى.

ەكىنشىدەن، يمامدارىمىز بەن قازاقستان مۇسىلماندارىنىڭ ءدىني باسقارماسىنىڭ ۇلكەن كىناسى. تاۋەلسىزدىك جىلدارى مەشىتتىڭ سانىن كوبەيتتىك راس، باقانداي 2 مىڭعا جەتكىزدىك !!! تەك مەشىتتى كوبەيتكەنىمىزبەن سول ءمىناجات ۇيلەرى ىشىنە سەنىم ءدانىن سەبە الدىق پا؟! وسى جىلداردىڭ بەدەرىندە جاماعات الدىنا ەركىن شىعىپ، قيىن ۇعىمداردى قاراپايىم تىلمەن تاپسىرلەپ، تۋرا جولعا ءجون سىلتەگەن بىردە-بىر ءمۇفتيدى كورگەم جوق. بۇل بۇل ما، بۇكىل بىزدەگى ءمۇفتيات جۇيەسى تۇتاستاي جەڭ ۇشىنان جالعاسىپ، قوعامدى جەگىدەي جەپ جاتقان جەمقورلىق، پاراقورلىق جانە زاڭداستىرىلعان بوپسالاۋمەن ابدەن شىرمالعان.

ءسوزىم جالاڭ بولماس ءۇشىن دالەل كەلتىرەيىن. وتباسىدا بىرەۋ قايتىس بولدى دەلىك. تۇركيادا ماسەلەن، يمام قايتىس بولعان ۇيگە ءوزى بارادى. جانازاسىن شىعارىپ، ماتەريالدىق كومەك، جىلۋ قاجەت بولسا، ونى دا سۇرايدى. جىلۋ قاجەتسىنگەن مۇقتاج جاننىڭ شىعىندارىنىڭ قوماقتى بولىگىن مەشىت كوتەرەدى. ەشكىم ەشكىمگە ۋماجدالعان اقشا تىقپالامايدى. ويتكەنى، ول جاقتا قايعى شەگىپ وتىرعان ادامعا ناعىز يمامدار كومەككە كەلەدى، شىنايى سەنىم سىيلايدى. بىزدە بولسا ءبارى كەرىسىنشە. الدىمەن مەشىتكە بارۋ كەرەك، يمامدى كوندىرۋ كەرەك، الىپ كەتۋ-الىپ بارۋ، تورگە وتىرعىزۋ، ەتكە تولتىرىپ، پاكەت ۇسىنۋ، قالتاسىنا اقشا سالۋ. مۇنىڭ ءبارى يسلامعا ءۇش قايناسا سورپاسى قوسىلمايتىن دورەكى جورالعىلار دەپ بىلەمىن.

بۇدان بولەك، تاعى دا سول تۇركيا مەن ساۋديتتەردە سۋ اپاتى، ءزىلزالا سياقتى تابيعي اپاتتار بولعان جاعدايدا توتەنشە جاعداي جونىندەگى قىزمەتپەن بىرگە مولدالار دا قوسا كەلەدى. جۇرتقا تاماق ۇلەستىرىپ، مال-مۇلىك ۇلەستىرەدى. ءبىزدىڭ جالعان مولدالارعا مۇنداي ىزگى ءىس باستارىنا كىرىپ تە شىقپايدى. وسىدان جەتى جىل بۇرىن مەن كتك ارناسىندا جۋرناليستىك زەرتتەۋ ۇيىمداستىردىم. ءبىزدىڭ ءدىني باسقارما نەمەن اينالىسادى؟ دەگەن ماسەلەنى كوتەرىپ، مۇسىلماندار بەرەتىن ساداقا قالاي جۇمسالاتىنىن زەرتتەدىك. تاعى دا سول تۇركيادا كەز-كەلگەن ساداقاعا فيسكالدى چەك قوسا جۇرەدى. ءاربىر جۇمادا مەشىت يمامى جۇما-نامازدا جاماعاتقا ءبىر اپتادا قانشا سوما جينالعانىن حابارلاپ، ۇجىممەن بىرگە ونىڭ قايدا جۇماسالاتىنى تۋرالى شەشىم قابىلدايدى. ونىڭ باسىم بولىگى قايىرىمدىلىققا، ال قالعانى مۇقتاج جاندارعا اتاۋلى كومەك رەتىندە بەرىلەدى.

سول تۇستا مەن مەنشىكتى تىلشىلەرىمىزگە وبلىستارداعى مەشىتتەرگە بارىپ، كامەرالار كوزىنشە ساداقا جينالعان جاشىكتەردەگى اقشانى ساناۋ ءساتىن ءتۇسىرىپ الۋدى سۇرادىم. قازىرگىدەي ەسىمدە، جەتى بىردەي وبلىستاعى تىلشىلەرىمىزگە بۇلاي جاساۋعا رۇقسات بەرگەن جوق. تەك اقتوبەدە الدىندا عانا يمام كەلىسكەن سياقتى ەدى، الايدا كەشكىسىن كامەرامەن بارعاندا اينىپ شىعا كەلدى. ايتۋىنشا، ءدىني باسقارماداعىلار تەلەفون سوعىپ، ءتۇسىرىلىم جاسالسا، يمام جۇمىسسىز قالاتىنىن قاتاڭ ەسكەرتكەن ەكەن.

وسىلاي بولعاسىن، ساداقا، ءپىتىر مەن باسقا دا قايىرىمدىلىقتاردىڭ ەسەپ-قيسابىن وزىمىزشە جۇرگىزىپ كوردىك. ەڭ ءبىر قاراپايىم ەسەپتەگەننىڭ وزىندە مەشىتتەرىمىزدىڭ جىلدىق اينالىمى 70 ميلليون دوللاردان كەم ەمەس بولدى. حالىق سانى از ءبىزدىڭ ەل ءۇشىن بۇل قىرۋار قارجى. ءدىني باسقارمانىڭ بارلىق شىعىنى بۇل سومانىڭ ۇشتەن ءبىرىن دە قۇرامايدى دەپ ويلايمىن. قالعانىنىڭ بارلىعى شىن مۇقتاج جاندارعا جۇمسالسا بولۋشى ەدى. الايدا ءوزباسىم وسى جىلداردىڭ ىشىندە يمامداردىڭ بىرەۋگە ءۇي سالىپ بەرىپ، بىرەۋدىڭ وقۋىن تولەپ بەرگەنىن ەستىمەپپىن.

بۇل ءمۇفتيات ەمەس، ۆەرتيكال بويىنشا جولعا قويىلعان جەمقورلىق پيراميداسى. مۇنى مەن عانا ەمەس، جۇزدەگەن بالالار دا تۇسىنەدى. ولار مارمارمەن اپتالىپ، كۇمبەزىن التىن جالاتقان مۇنارالى سارايلاردان سەنىم تابا الماي قىنجىلىپ، وزگە دۇمشە دىندەرگە ۇرىنىپ قالىپ جاتۋى دا سودان. وسى جاعداي وزگەرمەيىنشە، سالافيتتەر قاپتاعان ۇستىنە قاپتاي بەرەدى.

اعىنان جارىلعانداعى ءسوزىم وسى.

ارمان شورايەۆ، فەيسبۋك پاراقشاسىنان الىندى.