د.سەرىكبايەۆ اتىنداعى شقمتۋ-دىڭ 1-كۋرس ستۋدەنتى ماليكا احمەتجانوۆا تانىمال ءانشى ەرلان كوكەيەۆتىڭ جاڭا جوباسىنا قاتىسۋعا شاقىرتۋ الدى، - دەپ حابارلايدى Qamshy.kz Altaynews.kz -كە سىلتەمە جاساپ.

ايتا كەتەيىك، ماليكا احمەتجانوۆا استاناداعى بەيبىتشىلىك جانە كەلىسىم سارايىندا وتكەن 25ء-ىنشى «جاس قانات» رەسپۋبليكالىق بايقاۋىنىڭ اقتىق سىنىنا دەيىن ءوتتى. ناتيجەسىندە، استانا قالاسى اكىمدىگىنىڭ ارنايى جۇلدەسىنە يە بولدى. بايقاۋدا بريتني حيۋستوننىڭ «I have nothing» ءانىن ورىنداعان جاس انشىگە جانار دۇعالوۆا العىسىن ءبىلدىرىپ: «شىنىمدى ايتسام، وسى ۋاقىتقا دەيىن بريتني حيۋستوننىڭ «I have nothing» ءانىن ورىنداۋعا باتىلىم جەتپەي جۇرگەن بولاتىن. ال بۇگىن سەنىڭ نار تاۋەكەلگە بەل بۋىپ، مۇنداي ۇلكەن شىعارماشىلىق تۋىندىنى قورىقپاي ورىنداعان وجەتتىلىگىڭدى كورىپ، ساعان جوعارى باعا قويامىن» دەگەن ەكەن. 

ماليكا احمەتجانوۆانىڭ ايتۋىنشا، ونىڭ كاسىبي مۋزىكالىق ءبىلىمى جوق. سوندىقتان، ول انشىلىكپەن ازىرشە تەك حوببي رەتىندە اينالىسىپ ءجۇر. 

– بايقاۋعا قاتىسقان كەزدە باستىسى جەڭىس ەمەس، تاجىريبە ەكەنىن ۇقتىم. ويتكەنى، مۇندا تورەشىلىك ەتەتىن قازىلار القاسى قاتىسۋشىلاردىڭ دايىندىعىن بىردەن بايقايدى. «سىن تۇزەلمەي، ءمىن تۇزەلمەيدى» دەگەندەي بولاشاقتا وزىمە قاتىستى ايتىلعان سىندى تۇزەيتىن بولامىن، - دەيدى ماليكا احمەتجانوۆا.

اتالمىش بايقاۋدا «سۇلۋلىق بايقاۋىنا قاتىسساڭ باس جۇلدەنى الاسىڭ. الايدا، ءان بايقاۋىندا اقساڭداپ تۇرسىڭ، ساعان ءالى تىڭعىلىقتى دايىندىق قاجەت» دەپ سىن-پىكىرىن بىلدىرگەن ەرلان كوكەيەۆ جاس ءانشىنى ءوزىنىڭ جاڭا جوباسىنا قاتىسۋعا شاقىرعان.

– اتالعان جوباعا قاتىسۋعا كەلىسىم بەرگەن جاعدايدا استاناعا قونىس اۋدارۋىما تۋرا كەلەدى. سول جاعى ازداپ قيىندىق تۋعىزىپ وتىر. سوندىقتان ەرلان كوكەيەۆتىڭ ۇسىنىسىن ويلانىپ ءجۇرمىن، - دەيدى ماليكا احمەتجانوۆا.

اجار ساعاتبەكوۆا