مەملەكەت باسشىسى نۇرسۇلتان نازاربايەۆ جۇمىس ساپارىمەن شىعىس قازاقستان وبلىسىنا كەلدى. جۇمىس ساپارىنىڭ بارىسىندا ەلباسى وبلىس اكىمى دانيال احمەتوۆپەن بىرگە وسكەمەندەگى وبلىستىق قان ورتالىعىندا جانە «ازيا اۆتو قازاقستان» اكسيونەرلىك قوعامى كاسىپورىنىندا بولدى، - دەپ حابارلايدى Qamshy.kz.

وتكەن جىلى قولدانىسقا بەرىلگەن مەديسينا مەكەمەسىن ارالاپ كورگەن پرەزيدەنت زاماناۋي قوندىرعىلارمەن مۇزداي جابدىقتالعان ورتالىقتىڭ قىزمەتىمەن تانىستى. ادام ءومىرىنىڭ اراشاشىسى دەگەن ابىرويلى مىندەتتى ارقالاعان اق حالاتتى جاندارمەن، سونداي-اق، قان تاپسىرۋشى دونورلارمەن تىلدەستى. قازىرگى ۋاقىتتا ءوتىپ جاتقان دونور ايلىعى اياسىندا قان تاپسىرۋعا وسكەمەندەگى 27943 اسكەري ءبولىمىنىڭ قىزمەتكەرلەرى مەن ساربازدارى دا كەلگەن ەكەن.

– اسا مارتەبەلى ەلباسى! ءبىز اسكەرمىز. ءبىزدىڭ مىندەتىمىز وتاندى قورعاۋ. ءبىز ءۇشىن ەڭ باستىسى – ەلدەگى ءسىز ورناتقان تىنىشتىقتى قورعاۋ. وتكەندە اقتوبەدە بولعان وقيعا ول – ناعىز ساتقىندىق. قۇرمەتتى نۇرسۇلتان ءابىش ۇلى! ءسىز بىزگە بۇيرىق بەرىڭىز. ونداي ساتقىنداردىڭ كوزىن قۇرتامىز. تۇبىمەن جويامىز. مەملەكەتتى قورعاۋ ءبىزدىڭ پارىزىمىز، – دەدى ەلباسىمەن كەزدەسكەندە 27943 اسكەري ءبولىمىنىڭ قىزمەتكەرى، لەيتەنانت ولجاس ابەنوۆ.

سونداي-اق، ەلىمىزدىڭ پرەزيدەنتى، باس قولباسشىمىز نۇرسۇلتان نازاربايەۆ الدىندا قاتارداعى ساربازدار بەرلى ورازاليموۆ پەن دميتريي اندريۋشەنكو دا ءسوز سويلەپ، وتاندى قورعاۋ جولىندا قاجەت بولسا جاندارىن قيۋعا دايىن ەكەندىكتەرىن جەتكىزدى. 

– بۇل ارينە دۇرىس. الايدا سىزدەر ومىرلەرىڭىزدى دە ساقتاپ، وتاندى دا قورعاۋلارىڭىز كەرەك. قان تاپسىرۋ ارقىلى ءقازىردىڭ وزىندە ادامداردىڭ ءومىرىن قۇتقارۋعا كومەكتەسىپ جاتىرسىزدار. بۇل دا ۇلكەن ءىس، – دەپ اتاپ كورسەتكەن مەملەكەت باسشىسى بۇگىنگىدەي اۋمالى-توكپەلى شاقتا ەلدىڭ تۇراقتىلىعىن ساقتاپ، تىنىشتىعىن كۇزەتۋ بارىنەن دە ماڭىزدى ەكەنىن باسا ايتتى.

شىعىس-اقپارات