كۇرشىم جانە زايسان اۋداندارىنىڭ تاۋلى مەكەندەرىندەگى مانۋل، ارقار جانە باسقا دا فاۋنا وكىلدەرى كادرعا ىلىنگەن، دەپ حابارلادى YK-news.kz.

شقو وسى اۋداندارىنداعى فوتوقاقپانداردى نوۆوسىبىرلىك «سيبەكوسەنتر» قوعامدىق بىرلەستىگى وتكەن جىلى ورناتقان. وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ سايتىندا «سيبەكوسەنتردىڭ» دالالىق ەكوجۇيەلەردى زەرتتەۋمەن اينالىساتىنى جازىلعان.

ماۋسىم ايىنىڭ اياعىندا ۆيدەوباقىلاۋدىڭ ناتيجەسىن تەكسەرگەن رەسەيلىك ماماندار باقىلاۋ ناتيجەسىنىڭ كوڭىلدەن شىققانىن ايتۋدا.

«فوتوكادرلاردىڭ بىرىنەن مانۋلدى بايقادىق. بۇل جانۋاردىڭ ءالى دە وزىنە ۇيرەنشىكتى جەردە مەكەندەپ كەلە جاتقانىن دالەلدەيدى، - دەپ جازىلعان تابيعي رەسۋرستار باسقارماسىندا. -  «سيبەكوسەنتر» قىزمەتكەرلەرى ءبىزدىڭ دالامىزدى رەسەيمەن، موڭعوليامەن سالىستىرىپ، اياگوز، اباي، تارباعاتاي، كۇرشىم اۋداندارىنداعى دالالىق جىرتقىش قۇستار مەن مانۋلدار اناعۇرلىم جاقسى ەكولوگيالىق ورتادا ەكەنىن ايتتى».

باسقارما مەن سىبىرلىكتەردىڭ بىرىككەن جۇمىسى كەلەر جىلى دا جالعاسىن تابادى.