شىعىس قازاقستان وبلىسى بيۋدجەتىنىڭ كىرىسى مەن شىعىسىن ونلاين-رەجيمدە كورۋگە بولادى. ايماقتىق بيۋدجەتتىڭ كىرىسى مەن شىعىسى جايلى اقپارات «شقو اكىمدىگىنىڭ قاۋىرت جەلىسى» جوباسى اياسىندا وبلىس تۇرعىنىنان كەلىپ تۇسكەن ارنايى ۇسىنىس نەگىزىندە جاسالىپ وتىر.
«وبلىس اكىمدىگىنىڭ سايتىندا «بيۋدجەت كىرىسى» مەن «بيۋدجەت شىعىسى» مودۋلدەرى ىسكە قوسىلدى. اقپارات كۇندەلىكتى جاڭارتىلىپ وتىرماق»، دەلىنگەن شقو اكىمىنىڭ باسپا ءسوز قىزمەتى تاراتقان اقپاراتتا.
«شقو اكىمىنىڭ سايتىندا وبلىس بيۋدجەتى مەن ونىڭ يگەرىلۋى جايلى مالىمەتتەردى ناقتى ۋاقىت رەجيمىندە كورسەك جاقسى بولار ەدى»، - دەپ جازدى وبلىس تۇرعىنى اكىمدىكتىڭ «WhatsApp» نومىرىنە.
وسى ساۋال نەگىزىندە ەكونوميكا مەن قارجى سالاسىنا جەتەكشىلىك ەتەتىن شقو اكىمىنىڭ ورىنباسارى قۋات تۇمابايەۆتىڭ تاپسىرماسىمەن اتالعان مودۋلدەر جاسالدى.
ەندى ءاربىر ادام شىعىس قازاقستان اكىمىدىگىنىڭ سايتىندا ايماق بيۋدجەتىنىڭ كىرىسى مەن ونىڭ يگەرىلۋى جايلى اقپارات الا الادى.
جوسپارلى جانە ناقتى مالىمەتتەر گرافيكا تۇرىندە بەرىلىپ، كۇندەلىكتى جاڭارتىلىپ وتىرادى.
ايتا كەتسەك، ءبىر ايعا جۋىق ۋاقىت بۇرىن شىعىس قازاقستان وبلىس اكىمىنىڭ باسپا ءسوز قىزمەتىمەن «شقو اكىمدىگىنىڭ قاۋىرت جەلىسى» جوباسى قۇرىلعان بولاتىن.
وبلىس تۇرعىندارى +7 771 202 2002 نومىرىنە «WhatsApp» مەسسەندجەرى ارقىلى ساۋالدارىن جولداپ، ماسەلەلەر جايلى حابارلاپ، سۋرەت، جازبا جانە ۆيدەو ءتۇسىرىلىم ارقىلى اقپارات جولداي الادى.
