اياگوز اۋدانىنىڭ مامىرسۋ اۋىلىنداعى س.عابباسوۆ اتىنداعى ورتا مەكتەپتىڭ الدىنا اسىقتاردان ادەمىلەپ جاسالعان اسىقتىڭ كىشى ارحيتەكتۋرالىق ءمۇسىنى قويىلدى، دەپ جازادى «ديدار» گازەتى.

ەرەكشە تۋىندىنى اتالعان ءبىلىم وشاعىنىڭ سۋرەت ءپانىنىڭ ءمۇعالىمى قايرات سىدىقوۆ جاسادى. اسىقتىڭ استىنداعى تاعانى ءبىر مەتر. ويۋلانىپ ورنەكتەلگەن. ال اسىقتىڭ ءوزىنىڭ كولەمىنە كەلسەك، ەنى 30، بيىكتىگى 60 سم. ءمۇسىندى جاساۋ ءۇشىن شامامەن مىڭنان اسا اسىق جۇمسالعان.

جوبانى ىسكە اسىرۋعا 70 مىڭ تەڭگەدەن استام قاراجات كەتكەن. اسىقتاردان اسىق جاساۋ تۋرالى يدەيانىڭ اۆتورى - مەكتەپ ديرەكتورى ريفحات دۇيسەكەنوۆ.

وسى مەكتەپتە وقىپ، بۇگىنگى كۇنى قاسيەتتى قارا شاڭىراقتا قىزمەت اتقارىپ جۇرگەن قايرات راحىمجان ۇلى بۇل تۋىندىسىن «تۋعان جەرگە - تاعزىم» اكسيا اياسىندا ءبىلىم ورداسىنا تارتۋ ەتتى.

ەستەرىڭىزگە سالا كەتەيىك، ءمۇسىنشى بىلتىر دا مەكتەپ الدىنا 100 مىڭ تەڭگە قاراجات شىعىنداپ، تىرنانىڭ ءمۇسىنىن جاساعان بولاتىن. ءوز كەزەگىندە شەبەر بولاشاقتا دا اۋىلدىڭ اباتتانۋى، مەكتەپتىڭ كورىكتەنۋى جولىندا تىڭ جوبالارمەن قۋانتا بەرەتىنىن جەتكىزۋدە.