شىعىس قازاقستان وبلىسىندا تۋريزم سالاسىن دامىتۋ بويىنشا جوسپار جاڭا سالا - ەتنوتۋريزممەن تولىقتى. ەتنوتۋريزمدى دامىتۋدىڭ ايماقتىق جوسپارىنا كيىز ءۇي ۇلگىسىندەگى ۇلتتىق ناقىشتاعى قوناق ءۇي، ارنايى جابدىقتالعان تاماقتانۋ نىساندارىن سالۋ سىندى شارالار ەنگىزىلمەك.
ايماق باسشىسى دانيال احمەتوۆ كاتونقاراعاي اۋدانىنداعى ساپارىندا بەرەل قورعاندارىنا تۋريستەردى تارتۋ ءۇشىن وسىنداي شەشىم قابىلدادى.
اتالعان جوسپاردى ىسكە اسىرۋ بارىسى قىركۇيەك ايىنىڭ باسىندا وسكەمەن قالاسىندا وتەتىن حالىقارالىق عىلىمي-پراكتيكالىق كونفەرەنسيا بارىسىندا تالقىلانادى. جالپى، كونفەرەنسياعا الەمدىك دەڭگەيدەگى عالىمدار قاتىسادى، ولار قازاقستان تاريحى مەن ارحەولوگيا ماسەلەلەرىن ورتاعا سالماق.
كاتونقاراعاي اۋدانىنىڭ اكىمدىگى ءتۋريزمدى دامىتۋ باعدارلاماسىن دايىنداۋ ماقساتىندا كاسىپكەرلەردى تارتۋمەن اينالىسادى.
«ءبىز قورعانداردىڭ بەتىنە ساركوفاگ ورناتۋ جۇمىستارىن جىل سايىن قارجىلاندىرۋعا دايىنبىز. وسىلايشا، ءبىر جاعىنان، ارحەولوگتار تاريحي مۇرامىزدى زەرتتەۋ جۇمىستارىن جۇرگىزسە، ەكىنشى جاعىنان، عىلىم سالاسىمەن بايلانىستى بيزنەس-ۇردىستى دامىتاتىن بولامىز، - دەدى شقو اكىمى ارحەولوگيالىق ەكسپەديسيا جەتەكشىسى، پروفەسسور زەينوللا ساماشيەۆقا.
شىعىس قازاقستان وبلىسىندا بيىل 2016-2018 جىلدارعا ارنالعان ارحەولوگيا سالاسىندا عىلىمي زەرتتەۋ جۇمىستارىن دامىتۋ جوسپارى شەڭبەرىندە ەلىمىزدىڭ جانە شەت ەلدەردىڭ جەتەكشى عالىمدارى بەس كونە ارحەولوگيا ەسكەرتكىشتەرىندە اۋقىمدى قازبا جۇمىستارىن جۇرگىزىپ جاتقاندىعىن ايتا كەتۋ كەرەك.
