يسلامتانۋشى عالىم قايرات جولدىباي ۇلى وزىنە قارسى تەرىس اعىم وكىلدەرى قيتۇرقى ارەكەتتەرىن جالعاستىرىپ جاتقانىن مالىمدەدى، - دەپ حابارلايدى Qamshy.kz. ول بۇل تۋرالى ءوزىنىڭ الەۋمەتتىك جەلىدەگى پاراقشاسىندا جازىپ وتىر.
«مەن گۇلەنشىمىن بە؟» دەگەن سۇراققا جاۋاپ بەرگەن عالىم وزىنە سالافيتتەر تاراپىنان جالا جابىلىپ جاتقانىن ايتادى.
«سالافيتتەر ماعان قارسى نەبىر قيتۇرقى ارەكەتتەرىن جاساۋدا. اسىرەسە قازاقستان مۇسىلماندارى ءدىني باسقارماسىندا اپپارات جەتەكشىسى بولعان كۇننەن باستاپ جالعان اۆتورلاردىڭ اتىمەن ماعان ءتۇرلى جالالارىن جاۋىپ كەلەدى. سەبەبى – بەلگىلى. مەن سالافيتتەرگە تۇبەگەيلى قارسىمىن. «ءدىن مەن ءدىل» اتتى ەكى تومدىق كىتابىمدا سالافيتتەردىڭ قاتەلىكتەرىن اشكەرەلەپ، حانافي ءمازھابى مەن ءماتۋرۋدي اقيداسىنىڭ دۇرىستىعىن، قوجا احمەد ءياساۋيدىڭ سوپىلىق جولىنىڭ شاريعاتقا قايشى ەمەس ەكەندىگىن دالەلدەۋگە تىرىستىم. بۇل ولارعا اۋىر ءتيدى»، - دەيدى عالىم.
قايرات جولدىباي ۇلى اداسقان اعىم وكىلدەرىنىڭ ءدىني كىتاپتى جويۋعا ارەكەتتەنگەنىن دە جايىپ سالدى.
«ءتىپتى، ەلباسىنىڭ تىكەلەي قولداۋىمەن اشىلعان «يسلام جانە ءبىلىم» قورىنىڭ قارجىلاندىرۋىمەن نەشە رەت باسىلىپ، تەگىن تاراتىلعان وسى كىتابىمدى كورگەن جەرلەرىندە جويۋعا تىرىسقاندىقتارىنا دا كۋا بولدىم»، - دەيدى ول.
اشۋعا مىنگەن سالافيتتەر قايرات جولدىبايۇلىنان باسقا دا عالىمدارعا كۇن كورسەتپەي جاتقان كورىنەدى.
«ولاردىڭ نەگىزسىز قارالاۋ ارەكەتتەرى مەنىمەن شەكتەلىپ وتىرعان جوق. بۇگىندە سالافيتتەرمەن بەلسەندى كۇرەسىپ جۇرگەن ەرسىن امىرە مەن ارمان قۋانىشبايەۆ، سانسىزباي شوقانوۆ، ريزابەك باتتالوۆ سەكىلدى بىلىكتى مامانداردى دا قارالاپ، ولاردى شييت، حاباشيت جاساپ جۇرگەندەر دە وسى سالافيتتەر. مەنى بىرەسە، مىسىرداعى كوتەرىلىستى ۇيىمداستىرعان يۋسۋف ءقارداۋيدىڭ شاكىرىتى، مەملەكەتكە قارسى ادام دەسە، ەندى بىردە نۇرشى-گۇلەنشى دەپ ايىپتادى. ەشبىر دالەلسىز ارنايى تاپسىرىسپەن جازىلعان بۇل سۇيكەمەلەردىڭ اۆتورلارىنىڭ كىم ەكەنىن دە، قاي اۋىلدان ەسىپ تۇرعانىن دا جاقسى بىلەمىن. راس، دوكتورلىق ديسسەرتاسيامدى جازىپ جاتقان سوڭعى ءۇش جىلدا بۇلاردىڭ مەنى قارالاۋى باسەڭسىدى. الايدا. كەشەگى اقتوبەدەگى وقيعادان كەيىن سالافيتتەردى زاڭمەن تىيىم سالۋ كەرەك دەگەن ۇسىنىستارىمنان سوڭ بۇلاردىڭ ماعان شابۋىلى قايتا باستالىپ كەتتى»، - دەپ جازادى ول.
«ءبىراق بۇل جولى ايتارعا ەشنارسە تابا الماعاننان كەيىن بۇرىنعى جازدىرعان شيمايلارىن جەلىلەرگە كۇمپىلدەتىپ قايتا سالىپ جاتىر. اشىعىن ايتايىن مەن فەتحۋللاح گۇلەن جاماعاتىنىڭ قازاقستانداعى كوسەمى دە، بەلسەندى مۇشەسى دە ەمەسپىن. ءبىراق ولار جايلى وبەكتيۆتى پىكىردەمىن. قۇراندا: «قانداي ءبىر قاۋىمعا (توپقا، رۋعا، جاماعاتقا، ۇلتقا) دەگەن دۇشپاندىقتارىڭ سەندەردى ولارعا قارسى ادىلەتسىزدىككە يتەرمەلەمەسىن» دەلىنەدى. يسلامدى بالاق پەن ساقالدىڭ دەڭگەيىنە ءتۇسىرىپ، ءدىندى سىرتقى پىشىنمەن عانا شەكتەپ، ءدىندارلىقتى جاتتاندى شابلوندارمەن سويلەۋ دەپ تۇسىنەتىن، ەلدىڭ ىشىنە ىرىتكى سالۋدان باسقا ماقتاناتىن ىستەرى جوق سالافيلەر مەن سىبىردەن باستاپ، افريكاعا دەيىن، جاڭىلىسپاسام الەمنىڭ 160 مەملەكەتىندە مىڭنان اسا مەكتەپ اشىپ، اعارتۋشىلىقپەن اينالىسىپ جاتقان گۇلەن جاماعاتىن ءبىر دەڭگەيگە قويا المايمىن. گۇلەننىڭ اقيداسى ءماتۋرۋدي، ءمازھابى حانافي ەكەندىگى ءمالىم. ال ونىڭ جاماعاتى بولاشاقتا مەملەكەتىمىزگە ءقاۋىپتى مە؟ ونى مەملەكەتىمىزدىڭ قۇرىعى ۇزىن قۇزىرلى ورىندارى انىقتاۋى ءتيىس. مەنىڭ وسىنداي وبەكتيۆتى كوزقاراسىم ءۇشىن مەنى گۇلەنشى دەيتىندەر دە تابىلا كەتەر. كىمنىڭ اۋزىنا قاقپاق بولاسىڭ؟!»، - دەگەن قايرات جولدىباي ۇلى وزىنە تاعىلعان ايىپتاردىڭ نەگىزسىزدىگىن ايتادى.
ال، ف. گۇلەنگە قاتىستى داۋ بەيتاراپ كوميسسيا ارقىلى قارالۋى ءتيىس دەپ سانايدى.
«كەشەگى تۇركيادا بولعان مەملەكەتتىك توڭكەرىسكە ۇمتىلۋ ارەكەتى گۇلەنمەن بايلانىستىرىلىپ جاتىر. ال، گۇلەن: «مەنىڭ ەشقاتىسىم جوق. حالىقارالىق دەڭگەيدە بەيتاراپ كوميسسيا قۇرىلىپ، توڭكەرىس ارەكەتىنە مەنىڭ قاتىسىمنىڭ بار-جوقتىعى انىقتالسىن، ناتيجەسى نەندەي بولسا دا، مەن وعان ريزامىن. ەگەر مەنىڭ قاتىسىمنىڭ بار ەكەندىگى انىقتالسا، بۇل جەردەن مەنى ەشكىمنىڭ الىپ كەتۋىنىڭ قاجەتى جوق، ءوزىم بيلەت الىپ، ءوز اياعىممەن بارامىن» دەگەن ۇسىنىسىن ايتتى. گۇلەننىڭ ۇسىنىسى بويىنشا حالىقارالىق كوميسسيا قۇرىلىپ، ونىڭ قاتىسى بار ەكەندىگى راسىمەن دە دالەلدەنىپ جاتسا، وندا ەشكىمنىڭ كوز جاسىنا قاراماستان قازاقستانداعى ليسەيلەرىن جابۋ كەرەك. جاستارىمىزعا كەرەمەت ءبىلىم بەرىپ جاتقاندىقتارى ولاردى اقتاپ الا المايدى. مەملەكەتىمىزدىڭ قاۋىپسىزدىگى ءبىرىنشى ورىندا بولۋعا ءتيىس!»، - دەيدى قايرات جولدىباي ۇلى.
