شقو اكىمى دانيال احمەتوۆ ءوڭىردىڭ ىشكى ىستەر دەپارتامەنتىندە بولدى، وندا جەكە قۇراممەن كەزدەسىپ، ىشكى ىستەر ورگاندارىنىڭ قازا تاپقان قىزمەتكەرلەرىنە ورناتىلعان ەسكەرتكىشكە گۇل شوقتارىن قويدى، دەپ حابارلادى اكىمنىڭ باسپا ءسوز قىزمەتىنەن.

ءوڭىر باسشىسى شقو ءىىد قىزمەتكەرلەرىنە ءتيىمدى جۇمىسى، قالا كوشەلەرىندەگى ءتارتىپ، قىزمەتتىك مىندەتتەرىن ورىنداۋ كەزىندەگى كاسىبيلىگى مەن ەرلىگى ءۇشىن العىس ءبىلدىردى.

 «وتانىمىزعا ادال قىزمەت ەتكەندەرىڭ ءۇشىن شىن جۇرەكتەن العىس بىلدىرەمىن. ەلدىڭ  تىنىشتىعىن قورعاپ جۇرسىڭدەر. ەلگە ءتارتىپ، تىنىشتىق، قاۋىپسىزدىك كەرەك. سەندەردى ەلگە دەگەن ادالدىقتارىڭ، پرەزيدەنت تاپسىرمالارىن مۇلتىكسىز ورىنداعاندارىڭ ءۇشىن قۇرمەت تۇتامىز.  ارداگەرلەرگە جاس ۇرپاققا ۇلگى بولا بىلگەنى ءۇشىن العىسىمىز شەكسىز ، قازاقستاندىق پوليسيا كۇنى قۇتتى بولسىن!، - دەگەن تىلەگىن ءبىلدىردى د. احمەتوۆ. - بىزدە ۇرپاق ساباقتاستىعى بار. وتكەندە اقتوبەدەگى وقيعادا ءىىد قىزمەتكەرلەرى الدىڭعى ۇستانىمدا كەلە جاتقانىن، وتان الدىنداعى بورىشىن ابىرويمەن، ادال ورىندايتىنىن كورسەتتى».

رەسپۋبليكا تاۋەلسىزدىگىنىڭ 25 جىلىندا شقو ءىىو 41 قىزمەتكەرى قىزمەتتىك مىندەتىن ورىنداۋ بارىسىندا قازا تاپتى. ولاردىڭ 11ء-ى باتىرلىقپەن كوز جۇمدى. كوپشىلىگى قايتىس بولعاننان كەيىنگى مەملەكەتتىك جانە ۆەدومستۆولىق ناگرادالارمەن ماراپاتتالدى. قازا تاپقان قىزمەتكەرلەر وتباسىنا ءىىد تاراپىنان ماتەريالدىق جانە باسقا دا كومەكتەر كورسەتىلەدى.

ىشكى ىستەر ورگانىنىڭ قازا تاپقان قىزمەتكەرلەرىنىڭ جەسىرلەرىنە ءسوز ارناعان د. احمەتوۆ: «وتانىنا قىزمەت ەتىپ ءجۇرىپ، جانىن قيعانداردىڭ ەرلىگىن ماڭگى ۇمىتپايمىز»، - دەدى.