استانا اكىمى اسەت يسەكەشيەۆ قالا تۇرعىندارى مەن قوناقتارىنان تولاسسىز جاۋعان جاڭبىر سالدارىنان بولعان قولايسىزدىقتار ءۇشىن كەشىرىم سۇرادى، - دەپ حابارلايدى Qamshy.kz.

ءوزىنىڭ فەيسبۋك جەلىسىندەگى پاراقشاسىندا قالا باسشىسى كارىز جۇيەلەرىنىڭ قۇرىلىس قارقىنىنان كەيىن قالىپ كەلە جاتقانىن جازدى.

«قۇرمەتتى استانالىقتار مەن قالا قوناقتارى! نوسەر جاڭبىردىڭ تولاستاماۋى سالدارىنان قالا جولدارىندا تۋىنداعان قولايسىزدىقتار ءۇشىن اكىمدىك اتىنان كەشىرىم سۇرايمىن. ەلوردانىڭ قارىشتاپ دامۋى قالانىڭ سۋاعار كارىز جۇيەلەرىنىڭ قۇرىلىس قارقىنىنان ىلگەرى كەلە جاتقانى نوسەرلى كۇندەرى باستى پروبلەماعا اينالىپ وتىر»، - دەگەن اكىم سوڭعى كۇندەرى استانادا جاڭبىردىڭ ءبىر ايلىق مولشەرى جاۋعانىن ايتادى. 

«قازگيدرومەتتىڭ حابارلاۋىنشا سوڭعى نوسەرلى جاڭبىر كۇندەرى جاڭبىردىڭ ءبىر ايلىق مولشەرى جاۋعان ەكەن. بۇگىنگى تاڭدا اكىمدىك قالىپتاسقان جاعدايدى تەز ارادا رەتكە كەلتىرۋ ءۇشىن بارلىق شارالاردى قولدانۋدا. قولدا بار بارلىق 107 دانا ارنايى تەحنيكا جۇمىلدىرىلىپ، سۋ باسقان اۋدانداردا تاۋلىك بويى سۋ سورىپ جاتىر. سوڭعى كۇندەرى عانا قوسىمشا سۋسورعىلارمەن 100 مىڭ ت.م. سۋ سورىلدى، تازارتقىش عيماراتتار ارقىلى 150 ت.م. سۋ ءوتتى. ءبىزدىڭ كوممۋنالدىق قىزمەتتەر 300 كم-گە جۋىق كوللەكتوردى بوساتۋ ءۇشىن ەندى ءبىر تاۋلىك كەرەك»، - دەيدى ول.

تۇرعىندار مەن قالا قوناقتارىنان جولداردىڭ ۋاقىتشا جابىلۋى سياقتى قولايسىزدىقتارعا تۇسىنىستىكپەن قاراۋدى سۇراعان ول اكىمدىكتىڭ رەسمي اقپارات كوزدەرى ارقىلى تۇرعىنداردى بارىنشا اقپاراتتاندىرۋدى قولعا الاتىنىن جازادى.

اسەت يسەكەشيەۆ بۇل تۇيتكىلدى پروبلەمانى شەشۋدىڭ كەشەندى جوبالارى جاسالعانىن دا ايتىپ وتىر.

«بىلتىر نوسەر كارىزىنىڭ قىزمەتىنە بايلانىستى ماسەلەلەردى شەشۋدىڭ جاڭا جولدارى ازىرلەندى. ناقتىراق ايتقاندا، №31 كوشەدە سۋ تازارتۋ قۇرىلىستارىن سالۋ بويىنشا جوبالار ىسكە اسىرىلدى، «مىڭجىلدىقتا» سۋ تازارتۋ قۇرىلىستارى ىسكە قوسىلدى، سونداي-اق، يمانوۆ كوشەسىندەگى سورعىلاردىڭ قۋاتتىلىعى ۇلعايتىلدى»، - دەيدى اسەت يسەكەشيەۆ.

قالا باسشىسى سونداي-اق: «ۇستىمىزدەگى جىلى وماروۆ – وتىرار كوشەلەرىنىڭ قيىلىسىنداعى كوللەكتور قالپىنا كەلتىرىلدى، تامىزدىڭ سوڭىنا دەيىن تۇران داڭعىلى مەن №27 كوشەنىڭ قيىلىسىنداعى سۋ تازارتۋ قۇرىلىستارى سالىنىپ بىتەدى. مۇنىمەن قوسا، بيىل كىشى تالدىكولدەن ەسىل وزەنىنە سۋ جىبەرەتىن كوللەكتور مەن ساۋران كوشەسىندەگى رىسقۇلوۆ كوشەسىنەن №31 كوشەگە دەيىنگى نوسەر كارىزى كوللەكتورىن، سونداي-اق، سەيفۋللين كوشەسىندەگى پمك-86 سۋ تازارتۋ قۇرىلىستارىن سالۋ اياقتالادى، تۇران داڭعىلى مەن سىعاناق كوشەسىنىڭ قيىلىسىنداعى سۋ تازارتۋ قۇرىلىستارىن قايتا جوندەۋ قولعا الىندى. قازىرگى كەزدە بەيسەكوۆ كوشەسى مەن قورعالجىن تاسجولىنىڭ قيىلىسىنداعى، لوگيستيكالىق ورتالىق اۋدانى مەن پريگورودنىي كەنتىندەگى سۋ تازارتۋ قۇرىلىستارىن سالۋ جۇمىستارى جالعاسۋدا. ءۇشقوڭىر كوشەسىندە قۇرىلىس جۇمىستارى باستالادى. ءتيىستى جۇمىستار قاتتى جاڭبىر جاۋعاندا قالاداعى جاعدايدى قالپىنا كەلتىرۋگە مۇمكىندىك بەرەدى»، - دەيدى.

اكىم كارىز جۇيەسىندەگى تۇيتكىلدەردى شەشۋگە حالىقارالىق ماماندار مەن ينجەنەرلەر توبىنىڭ جۇمىلدىرىلىپ جاتقانىن ايتادى.

«بۇگىندە ماسەلەنى جۇيەلى تۇردە تۇتاستاي قالا بويىنشا شەشۋ ءۇشىن حالىقارالىق ينستيتۋتتارمەن، ينجەنەرلەرمەن جانە ەكسپەرتتىك توپتارمەن بىرلەسىپ نوسەر كارىزى جۇيەلەرىن ودان ءارى دامىتۋ باعدارلاماسىمەن جۇمىس ىستەپ جاتىرمىز. ءتيىستى جۇمىستاردىڭ ناتيجەلەرىن مىندەتتى تۇردە كۇزگە قاراي قالالىق قوعامدىق كەڭەستىڭ تالقىلاۋىنا ۇسىناتىن بولامىز»، - دەيدى اسەت يسەكەشيەۆ.