جەر رەفورماسى جونىندەگى كوميسسيا وتىرىسىندا اقىن مۇحتار شاحانوۆ وسىنداي ۇسىنىس تاستادى، - دەپ حابارلايدى Qamshy.kz.

«جەر تۋرالى شىندىقتى ايتقان ماكس بوقايەۆ پەن تالعات اياندى تۇرمەدەن بوساتۋدى تالاپ ەتەمىز»، - دەگەن مۇحتار شاحانوۆ جەر يەلەرى، جالعا الۋشىلار تۋرالى اقپاراتتاردى جاريا ەتۋ تۋرالى دا ويىن ايتتى.

«جەردىڭ ءىرى يەلەنۋشىلەرى تۋرالى اقپارات مەملەكەتتىك قۇپيا قاتارىنا جاتادى. ول تۋرالى ارنايى زاڭ بار. جەر يەلەرى تۋرالى اقپارات ولاردىڭ كەلىسىمىمەن عانا جاريالانادى ەكەن. ەلىمىزدىڭ ۇلكەن قالتالىلارى، ۇلكەن ۇرىلارى ءوز جاعدايلارىن جاقسى قاراستىرعان ەكەن. ونداي ادىلدىك، ابىرويدان جۇرداي زاڭدى و دۇنيەگە اتتاندىرۋ كەرەك. ماسەلەن، بارلىق تاۋلاردىڭ ەتەكتەرى، شۇرايلى جەرلەرى ۇلكەن بيلىك باسىنداعىلاردىڭ جاقىن تۋىستارى، ىنىلەرى، قىزدارى جەكەشەلەندىرىپ العان. ەگەر ول مالىمەتتەر جاريالانسا، ميلليون گەكتار جەر يەلەنگەن تەرەششەنكونىڭ ءوزى دالادا قالۋى ابدەن مۇمكىن. بۇل تۇرعىداعى شىندىق اشىلماي ەلىمىزدى ۇلكەن قاۋىپكە بولەگەن جەر ماسەلەسىنىڭ شەشىلۋى مۇمكىن ەمەس»، - دەدى مۇحتار شاحانوۆ.