اتىراۋدا ءوتىپ جاتقان جەر كوميسسيا جۇمىسى بارىسىندا ءوڭىر تۇرعىندارى دەپۋتاتتارعا قاراتا سىني پىكىرلەر ايتتى. ولاردىڭ ءبىرقاتارىنا ءماجىلىس دەپۋتاتى بەكبولات تىلەۋحان جاۋاپ بەردى، - دەپ حابارلايدى Qamshy.kz.

«جەر ماسەلەسى تارازىعا تۇسكەندە جانىمىز ىشقىنباسا، وندا ۇلت بولىپ جارىتپايمىز. ال، مەنى كىنالاۋعا قاتىستى ايتارىم، ول زاڭدار قابىلدانعاندا مەن دەپۋتات بولمادىم. ۇلتتىق سپورتتا ءوز بەتىممەن ءجۇردىم. مەنىڭ پوزيسيامدى بىلگىلەرىڭىز كەلسە، مەن ونى ايتتىم. شەكارا اۋماعىنداعى جەر، كەپىلدىككە قويۋ تۋرالى ويلارىمدى ەستىدىڭىزدەر. الەۋمەتتىك شيەلەنىس شاقىراتىن ماسەلەلەردەن بارىنشا ساق بولۋى كەرەك. شەكاراداعى جەر ماسەلەسىندە كيلومەترمەن ەمەس، تۇتاستاي اۋدانداردى ەسكەرۋ كەرەكپىز، ءۇرجار، نارىنقول سياقتى اۋدانداردى ەرەكشە نازارعا الۋ كەرەك.

(...) 86-نىڭ جەلتوقسان وقيعاسىنا مەن دە قاتىسقام. پوليتەحتان شىعىپ، كونسەرۆاتورياعا كەتۋگە سول سەبەپ بولعان. ول كەڭەستىك يمپەرياعا قارسى باس كوتەرۋ ەدى. مىنا جاعدايدا ءوزىمىز وتىرعان بۇتاقتى ءوزىمىز ارالاعانداي بولمايىق. بايىپپەن كەلمەسەك، كەي ماسەلەدە اشۋعا سالىنساق، اتا-بابامىز اڭساعان تاۋەلسىزدىككە ءقاۋىپ كەلتىرەمىز. (...) جەر قامىن بىرەن-ساران ادام ايتىپ ءجۇر دەۋگە بولمايدى. ءبارىمىز دە قازاقپىز، ءبارىمىز دە جەر ءۇشىن الاڭدايمىز. شارۋا شەشىلەتىن كەز بولادى، سول كەزدە كىمنىڭ كىم ەكەنى بەلگىلى بولادى. ول ۋاقىت ءالى كەلگەن جوق. ءازىر مەنى قيناماڭىزدار، - دەدى بەكبولات تىلەۋحان.