اتىراۋ وبلىسىنىڭ ماحامبەت اۋداندىق سوتىندا وزگەشە ازاماتتىق ءىس قارالدى. قۇدالار كەلىن جاساۋىنا تالاسىپتى، - دەپ حابارلايدى Qamshy.kz اق جايىققا سىلتەمە جاساپ.

جاستار بىرگە تۇرا باستاعان، ءبىراق رەسمي تۇردە نەكەلەرىن تىركەمەپتى. ءبىراز ۋاقىت وتكەننەن كەيىن ەنە مەن كەلىن اراسىندا تۇسىنىسپەۋشىلىك تۋىنداۋى سەبەپتى قىز ءوز ۇيىنە كەتىپ قالعان. قىزدىڭ اناسى ءالى قۇدا بولىپ ۇلگەرمەگەن ۇيدەن قىزىنىڭ جاساۋى رەتىندە بەرىلگەن زاتتارىن قايتارىپ الماق بولادى. ال، ولار قۇنى 24 مىڭ تەڭگە تۇراتىن حروم مەن اينەكتەن جاسالعان ەكى ۆازادان باسقاسىن قايتارىپ بەرەدى. قىزدىڭ اتا-اناسى وسىعان قاتىستى سوتقا تالاپ-ارىز بەرگەن.

ماحامبەت اۋداندىق سوتىنىڭ باسپا ءسوز قىزمەتى حابارلاعانداي، «سوت وتىرىسى بارىسىندا تاراپتار مەدياسيا كومەگىمەن كەلىسىمگە كەلدى: بۇرىنعى قۇدالار ىدىستى قايتاردى، ال تالاپ-ارىز بەرۋشىلەر ءوز تالاپتارىنان باس تارتتى. سوت ءىس جۇرگىزۋدى توقتاتىپ، مەدياتيۆتىك كەلىسىمدى بەكىتتى».

سوت ۇيعارىمى زاڭدى كۇشىنە ەندى.