ريو وليمپياداسىنا ساناۋلى كۇندە قالدى. وسى ورايدا قازاقستاننىڭ بوكسشىلارىنا 4 جىلدا ءبىر كەلەتىن ايتۋلى دوداعا كولۋمبيا، دومينيكان، مەكسيكا ەلدەرىنەن كەلگەن كاسىپقوي بوكسشىلار كومەكتەسىپ جاتىر. ولاردىڭ اراسىندا وتانداسىمىز كاسىپقوي بوكستىڭ شەبەرى قانات يسلام دا بار. قانات وليمپيادا ويىندارىنداعى باستى ءۇمىتىمىز دانيار ەلەۋسىنوۆكە سپاررينگ قارسىلاس رەتىندە كومەكتەسەتىن بولادى، - دەپ حابارلايدى Qamshy.kz BNews.kz-كە سىلتەمە جاساپ.

«بارلىق بوكسشىمىز ءھام رۋحاني، ءھام فيزيكالىق تۇرعىدان دايىن. وسى قارقىندارىنان جاڭىلماسا، وليمپيادا شىڭىن باعىندىرادى دەپ ويلايمىن. ەندىگى جەردە ءبىز ءبىر جاعادان باس، ءبىر جەڭنەن قول شىعارىپ، ريوعا اتتاناتىن 10 بوكسشىمىزعا قولدان كەلگەنىنشە ءبىر كىسىدەي قولداۋ كورسەتۋىمىز كەرەك. ءبارىمىزدىڭ دە اسقاق ارمانىمىز – ءانۇرانىمىزدىڭ وليمپيادا كوگىندە شىرقالۋى»، - دەيدى قانات يسلام.

ايتا كەتەيىك، بۇل – وليمپيادا الدىنداعى بوكسشىلارىمىزدىڭ سوڭعى جاتتىعۋ جۇمىستارى. سوڭعى سپاررينگتەر 25 جانە 27 شىلدە كۇندەرى وتەدى. ال 28 شىلدەدە ساڭلاقتارىمىز ريوعا جول جۇرەدى.