جامبىل وبلىسىندا كونگو-قىرىم قاندى بەزگەگىن جۇقتىردى دەگەن كۇدىكپەن سارىسۋ اۋدانىنىڭ ەكى ادامى اۋرۋحاناعا جاتقىزىلدى، دەپ حابارلايدى Qamshy.kz قازاقپاراتقا سىلتەمە جاساپ.
«19 جانە 20 شىلدە كۇندەرى سارىسۋ اۋدانىنىڭ ساۋداكەنت اۋىلدىق اۋرۋحاناسىنا كونگو-قىرىم قاندى بەزگەگىن جۇقتىردى دەگەن كۇدىكپەن ەكى ادام - 40 جاستاعى ەر ادام مەن 65 جاستاعى ايەل ادام جاتقىزىلدى. ەكەۋىنىڭ دە جاعدايى تۇراقتى. ەپيدەمياعا قارسى شارالار جاسالۋدا» دەدى ايماقتىق تجد باسپا ءسوز قىزمەتىنەن.
ايتا كەتەيىك، ءساۋىر ايىندا كەنە شاققان بايزاق اۋدانىنىڭ تۇرعىنى كوز جۇمعان بولاتىن. وبلىستىق دەنساۋلىق ساقتاۋ باسقارماسىندا اتاپ وتكەندەي، بايزاق اۋدانى وسىعان دەيىن كونگو-قىرىم قىزباسىنىڭ وشاعى بار ايماققا جاتپاعان، ەندى جامبىل وبلىسىنىڭ سونداي ايماقتارىنا جاتقىزىلاتىن بولادى. وبلىس بويىنشا كونگو-قىرىم قىزباسىنىڭ وشاعى مويىنقۇم، سارىسۋ مەن تالاس اۋداندارىندا - 70 مىڭ ادام تۇراتىن 49 ەلدى مەكەندە تارالعان بولاتىن.
